ശബരിമല സ്ത്രീപ്രവേശനം തടയുന്നവരെ എതിര്ക്കണമെന്ന് ആവശ്യപ്പെട്ട് അട്ടപ്പാടിയില് ഭവാനി ദളത്തിന്റെ പോസ്റ്റര്, നിലയ്ക്കല് ആക്രമത്തില് മാവോയിസ്റ്റുകള് നുഴഞ്ഞ് കയറിയെന്ന് വ്യാപകമായ ആക്ഷേപമുണ്ടായിരുന്നു
ശബരിമല സ്ത്രീപ്രവേശനം തടയുന്നവരെ എതിര്ക്കണമെന്ന് ആവശ്യപ്പെട്ട് അട്ടപ്പാടിയില് മാവോയിസ്റ്റുകളുടെ പോസ്റ്റര്. ആനമൂളി ചെക്ക് പോസ്റ്റിന് സമീപത്തായാണ് പോസ്റ്ററുകള്. ഭവാനി ദളത്തിന്റെ പേരിലുള്ള പോസ്റ്ററുകള് ഇന്ന് രാവിലെയാണ് ശ്രദ്ധയില് പെട്ടത്. പോസ്റ്റര് പതിച്ചത് ആരാണെന്ന് വ്യക്തമല്ല. സ്ഥലത്തെത്തിയ പൊലീസ് പ്രദേശത്ത് പരിശോധന നടത്തി. സംഭവത്തില് കൂടുതല് അന്വേഷണം നടത്തുമെന്നും പൊലീസ് അറിയിച്ചു.
തുലാമാസ പൂജകള്ക്ക് നട തുറന്നപ്പോള് നിലയ്ക്കലിലും മറ്റും നടന്ന അക്രമസംഭവങ്ങളില് മാവോയിസ്റ്റുകള് നുഴഞ്ഞ്കയറിയതായി ആക്ഷേപം ഉയര്ന്നിരുന്നു. വനമേഖലയായതിനാല് മാവോയിസ്റ്റുകള്ക്ക് എളുപ്പം കടന്ന് ചെല്ലാനാവുമെന്നാണ് സുരക്ഷാ ഉദ്യോഗസ്ഥരടക്കം പറയുന്നത്. ചിത്തിര ആട്ടത്തിന് നടതുറക്കും മുമ്പ് പോസ്റ്ററുകള് പ്രത്യക്ഷപ്പെട്ടതിനാല് ഇതേ കുറിച്ച് പൊലീസും ഇന്റലിജന്സ് അന്വേഷണം ആരംഭിച്ചിട്ടുണ്ട്.
അതേസമയം സ്ത്രീപ്രവേശന വിധി നടപ്പാക്കാന് സര്ക്കാരും പ്രതിരോധിക്കാന് സമരക്കാരും ഉറച്ച നിലപാട് സ്വീകരിച്ചതോടെ ശബരിമല വീണ്ടും മുള്മുനയിലായി. ചിത്തിര ആട്ടവിശേഷത്തിന് നട തുറക്കുന്നത് അഞ്ചിന് വൈകിട്ട് അഞ്ചിനാണെങ്കിലും നാളെ മുതല് ആറാം തീയതി വരെ ശബരിമലയില് 5000 പൊലീസുകാരെ വിന്യസിച്ച് സുരക്ഷാ വലയമൊരുക്കും. ആറിന് രാത്രി 10 മണിക്കാണ് നട അടയ്ക്കുന്നത്. നട തുറന്നിരിക്കുന്ന 29 മണിക്കൂര് നിര്ണായകമാകും.
https://www.facebook.com/Malayalivartha
