ഒക്‌ടോബര്‍ 16ന് ശേഷം മുഖ്യമന്ത്രിയുടെ ദുരിതാശ്വാസ നിധിയില്‍ ലഭിച്ചത് 460 കോടി രൂപ. കേരളത്തിന്റെ മതേതര മനസ് തകര്‍ന്നിട്ടില്ലെന്നതിന് വ്യക്തമായ തെളിവാണിതെന്ന് സര്‍ക്കാരും സി.പി.എമ്മും വിശ്വസിക്കുന്നു. കഴിഞ്ഞ മാസം 16 മുതലാണ് ശബരിമല പ്രശ്‌നങ്ങള്‍ ആരംഭിച്ചത്. 17ന് നിലയ്ക്കലില്‍ അക്രമവും ലാത്തിച്ചാര്‍ജ്ജും നടന്നു. തുടര്‍ന്ന് നട അടയ്ക്കുന്ന 22 വരെ സംഘര്‍ഷാവസ്ഥയിലായിരുന്നു കേരളം. അതിന് ശേഷവും ഈ വിഷയം ഇപ്പോഴും കത്തി നില്‍്ക്കുകയാണ്. 16 മുതല്‍ നവംബര്‍ രണ്ട് വരെയാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് 480 കോടി രൂപ സുമനസുകള്‍ നല്‍കിയത്.

മുഖ്യമന്ത്രിയുടെ ദുരിതാശ്വാസനിധിയിലേക്ക് പണം നല്‍കരുതെന്ന് ആവശ്യപ്പെട്ട് സംഘപരിവാറും ബി.ജെ.പിയും വ്യാപകപ്രചരണം നടത്തുമ്പോഴാണ് കൂടുതല്‍ ജനപങ്കാളിത്തം ഉണ്ടാവുന്നത്. ഒക്ടോബര്‍ 16 വരെ മുഖ്യമന്ത്രിയുടെ ദുരിതാശ്വാസ നിധിയില്‍ ഉണ്ടായിരുന്നത് 1871 കോടി രൂപയായിരുന്നു. രണ്ടാഴ്ചയ്ക്കിടെ ഇത് 2351 കോടിയായി ഉയര്‍ന്നു. കേരളത്തില്‍ വര്‍ഗീയത വളരില്ലെന്നും അത് പടര്‍ത്താന്‍ ശ്രമിക്കുന്നവര്‍ പരാജയപ്പെടുമെന്നും ഉള്ളതിന്റെ വ്യക്തമായ മുന്നറിയിപ്പാണ്. പ്രളയകാലത്തുണ്ടായ മതേതര ഐക്യം ശബരിമല വിഷയത്തോടെ നശിപ്പിക്കാന്‍ സംഘപരിവാര്‍ ശക്തികള്‍ ശ്രമിച്ചിരുന്നു. അതിനുള്ള തിരിച്ചടിയാണിതെന്നും സി.പി.എം ആരോപിക്കുന്നു.