ശബരിമലയിലെ യുവതീ പ്രവേശനത്തിനെതിരെ കേരളത്തില്‍ അങ്ങോളമിങ്ങോളം പ്രതിഷേധം ഇരമ്പുന്നതിനിടയില്‍ വിശ്വാസികള്‍ വീണ്ടും പൊടിപ്പും തൊങ്ങലും വച്ചുള്ള കഥകളുമായി രംഗത്തെത്തുകയാണ്. കോടതി വിധി നടപ്പാക്കുകയല്ലാതെ സര്‍ക്കാറിന് മുന്‍പില്‍ മറ്റ് വഴികളില്ലെന്ന് തുറന്ന് പറയുമ്പോഴും പ്രതിഷേധത്തിന് ശമനമില്ല. ഇതിനിടെ പ്രകൃതിയുടെ വിളയാട്ടം ഭക്തിയുമായി കൂട്ടിക്കുഴയ്ക്കുകയാണ്. കേരളം ഒരിക്കലും കണ്ടില്ലാത്ത ഭക്തജന പ്രക്ഷോഭങ്ങള്‍ക്ക് വേദിയാകുമ്പോള്‍ ശബരിമലയെ ചുറ്റിപ്പറ്റി കഥകളും പടരുകയാണ്. പണ്ടൊക്കെ പറഞ്ഞ് പറഞ്ഞ് പരത്തിയ കഥകള്‍ ഇപ്പോള്‍ വേഗത്തില്‍ പടര്‍ത്തുന്നത് സോഷ്യല്‍ മീഡിയകളിലൂടെയാണ്. 

ശബരിമലയില്‍ പുലിയിറങ്ങി എന്ന രീതിയില്‍ നേരത്തെ വാര്‍ത്ത വന്നിരുന്നു. അന്നും ഇതിനെ ഭക്തിയുമായി കൂട്ടിക്കുഴച്ചിരിക്കുകയാണ്. ഇതോടൊപ്പമാണ് തീപിടുത്തവും പെരുമഴയും ദുശ്ശകുനമായി പലരും കാണുന്നത്. കഴിഞ്ഞ ദിവസമാണ് ദേവസ്വം മന്ത്രിയുടെ നിയോജക മണ്ഡലമായ കഴക്കൂട്ടത്തിന് സമീപം പ്ലാസ്റ്റിക് കമ്പനി കത്തി ചാമ്പലായത്. തീയണയ്ക്കാനാകാതെ ഒരു രാത്രിയാണ് കേരളം മുള്‍മുനയില്‍ നിന്നത്. ഇതോടൊപ്പം മുഖ്യമന്ത്രിയുടെ വേദി പോലും തകര്‍ന്നിരുന്നു. ഇതിന്റെ ആഘാതത്തില്‍ നിന്നും മുക്തി നേടുന്നതിന് പിന്നാലെയാണ് ഇടവപ്പാതി ശക്തി പ്രാപിച്ചതോടെ തിരുവനന്തപുരത്ത് കനത്ത മഴ ഇപ്പോഴും തുടരുന്നത്. ഡാമുകളുടെ ഷട്ടറുകള്‍ തുറന്ന് തുറന്നുവിട്ടുകയാണ്. 

അതേസമയം ശബരിമലയിലും ശക്തമായ മഴ ഉണ്ടാകുമെന്നാണ് കാലാവസ്ഥാ കേന്ദ്രം അറിയിക്കുന്നത്. അയ്യപ്പന്‍മാരുടെ മലകയറ്റം കടുക്കുമെന്നാണ് വിലയിരുത്തുന്നത്. ശബരിമലയിലേക്ക് സുരക്ഷ ഒരുക്കുന്ന പോലീസുകാരുടെ അവസ്ഥയും വളരെ കഠിനമാണ്. മഴക്കാലത്ത് അവരുടെ യാത്രയും വിന്യാസവും എല്ലാം വെല്ലുവിളിയാണ്. ഇതിനിടയ്ക്ക് യുവതീ പ്രവേശനവും പ്രതിഷേധവും വിഷയമാകും. ഇതുകൂടാതെ ശബരിമലയിലെത്തുന്ന മാധ്യമ പ്രവര്‍ത്തകരും നന്നേ കഷ്ടപ്പെടും.

ശബരികാടുകളില്‍ പുലിയിറങ്ങുന്നത് അപൂര്‍വ്വമായ സംഭവമല്ലെങ്കിലും സന്നിധാനത്ത് പുലിയിറങ്ങിയത് അയ്യപ്പ കോപമാണെന്ന് ചിലരുടെ വിശ്വാസം. അടുത്തിടെ പമ്പയെയും കേരളത്തെയും മുക്കിയ പ്രളയം വന്നതും അയ്യപ്പകോപം കാരണമാണെന്ന് പ്രചരിപ്പിക്കുന്നത്. കാലം തെറ്റി കന്നി മാസത്തില്‍ തന്നെ തുലാമഴയെത്തിയതും മഴ ശക്തി പ്രാപിച്ചതും എല്ലാം അയ്യപ്പ കോപമാണെന്നാണ് ഭക്തരുടെ പ്രചരണം. അതിന് പിന്നാലെയാണ് തുലാം മാസ അവസാനം തുലാവര്‍ഷം വീണ്ടും ശക്തി പ്രാപിക്കുന്നത്. കാലാവസ്ഥ മോശമായാല്‍ ഇത്തവണ ശബരിമല തീര്‍ത്ഥാടനം ദുരിത പൂര്‍ണമാകും ഭക്തര്‍ക്കും പ്രതിഷേധക്കാര്‍ക്കും പോലീസിനും മാധ്യമ പ്രവര്‍ത്തകര്‍ക്കും എല്ലാം...