ശബരിമല അക്രമങ്ങളില് പങ്കാളികളായവര്ക്ക് മുന്കൂര് ജാമ്യം അനുവദിക്കുന്നതിനെതിരേ സര്ക്കാര് ഹൈക്കോടതിയില്
ശബരിമല അക്രമങ്ങളില് പങ്കാളികളായവര്ക്ക് മുന്കൂര് ജാമ്യം അനുവദിച്ചാല് അത് വീണ്ടും പ്രതിഷേധങ്ങള്ക്ക് കാരണമാകുമെന്നു സര്ക്കാര് ഹൈക്കോടതിയില്. അക്രമങ്ങളില് ഉള്പ്പെട്ടവര്ക്ക് ജാമ്യം നല്കരുതെന്ന് സംസ്ഥാന സര്ക്കാര് കോടതിയില് ബോധിപ്പിച്ചു.
വീണ്ടും നട തുറക്കാന് പോകുന്ന സാഹചര്യത്തില് അക്രമികള് പ്രശ്നങ്ങളുണ്ടാക്കാന് സാധ്യതയുണ്ടെന്ന് സര്ക്കാര് കോടതിയെ അറിയിച്ചു. അതേസമയം, അക്രമസംഭവങ്ങളുടെ ദൃശ്യങ്ങള് ഹൈക്കോടതി ആവശ്യപ്പെട്ടിട്ടുണ്ട്. തിങ്കളാഴ്ച ദൃശ്യങ്ങള് ഹാജരാക്കണമെന്നാണ് കോടതി സര്ക്കാരിനോട് ആവശ്യപ്പെട്ടിട്ടുള്ളത്.
ദൃശ്യങ്ങള് കൈവശമുണ്ടെന്നും മാധ്യമങ്ങളില്നിന്ന് കൂടുതല് ദൃശ്യങ്ങള് ആവശ്യപ്പെട്ടിട്ടുണ്ടെന്നും സര്ക്കാര് അറിയിച്ചു. ദൃശ്യങ്ങളും തെളിവുകളും മുദ്രവച്ച കവറില് സൂക്ഷിച്ചിരിക്കുകയാണെന്ന് സര്ക്കാര് വ്യക്തമാക്കി. തൃപ്പൂണിത്തുറ സ്വദേശി ഗോവിന്ദ് മധുസൂദനന് നല്കിയ ഹര്ജിയിലാണ് കോടതിയുടെ നിര്ദേശങ്ങള്. പ്രതിക്കെതിരേ പ്രഥമദൃഷ്ട്യാ തെളിവുണ്ടെന്നും പ്രതിയെ തിരിച്ചറിഞ്ഞ മൊഴികളുണ്ടെന്നും ദൃശ്യങ്ങളുണ്ടെന്നും കൂടുതല് ദൃശ്യങ്ങള് ഹാജരാക്കാന് തയാറാണെന്നും പ്രോസിക്യുഷന് കോടതിയില് ബോധിപ്പിച്ചു.
ഒക്ടോബര് 17 നു നിലയ്ക്കലില് നടന്ന സംഘര്ഷത്തില് കെ.എസ്.ആര്.ടി.സി ബസുകള് നശിപ്പിക്കുകയും പോലിസ് ഉദ്യോഗസ്ഥരെ ആക്രമിക്കുകയും ചെയ്തുവെന്നാണ് ഹര്ജിക്കാരനെതിരേയുള്ള ആരോപണം
"
https://www.facebook.com/Malayalivartha
