ചിത്തിര ആട്ടവിശേഷത്തിന് തിങ്കളാഴ്ച നട തുറക്കാനിരിക്കെ ശബരിമല പൂര്‍ണമായും പൊലീസ് നിയന്ത്രണത്തില്‍. വാര്‍ത്ത റിപ്പോര്‍ട്ട് ചെയ്യാനെത്തിയ മാധ്യമങ്ങളെ പോലീസ് തടഞ്ഞു. ഇലവുങ്കല്‍ കവലയിലാണ് മാധ്യമ പ്രവര്‍‌ത്തകരെ തടഞ്ഞത്.നിലയ്ക്കലിലേക്ക് പോകാനെത്തിയ മാധ്യമങ്ങളെയാണ് തടഞ്ഞത്.

നിലയ്ക്കലിനു മൂന്ന് കിലോമീറ്റര്‍ മുന്‍പാണ് ഇലവുങ്കല്‍ കവല ഇവിടെ പോലീസ് ബാരിക്കേഡും കാവലും ഏർപ്പെടുത്തി. . നിലയ്ക്കല്‍ ബേസ് കാംപ് വരെ മാധ്യമങ്ങളെ പോകാന്‍ അനുവദിക്കൂ എന്നാണ് പോലീസ് അറിയിച്ചത്. ഇതാദ്യമായാണ് നിലയ്ക്കൽമുതൽ സന്നിധാനംവരെ മാധ്യമവിലക്ക് ഏർപ്പെടുത്തുന്നത്.

ശനിയാഴ്ച രാവിലെ നിലയ്ക്കൽ ഇടത്താവളത്തിലെത്തി സുരക്ഷാനടപടികൾ റിപ്പോർട്ട് ചെയ്യവേ മാധ്യമപ്രവർത്തകരോട് ഇവിടെനിന്ന് പോകണമെന്ന് പോലീസ് ആവശ്യപ്പെട്ടു. ചുമതലക്കാരോട് ചോദിച്ചപ്പോൾ ഉന്നതോദ്യോഗസ്ഥർ നിർദേശിച്ച പ്രകാരമാണെന്ന് അറിയിച്ചു. മാധ്യമപ്രവർത്തകർ നിലയ്ക്കലിന് രണ്ടുകിലോമീറ്റർ അകലെയുള്ള വനത്തിൽവരെയേ വരാവു എന്നറിയിച്ചു.