പമ്പയിലേക്ക് പ്രവേശനം നല്‍കിയ മാദ്ധ്യമപ്രവര്‍ത്തകരെ ത്രിവേണി പാലത്തിന് സമീപം പൊലീസ് വീണ്ടും തടഞ്ഞു. മാദ്ധ്യമ പ്രവര്‍ത്തകരുടെ വാഹനങ്ങള്‍ക്ക് ത്രിവേണി പാലം വരെ മാത്രമേ അനുമതി ഉള്ളൂവെന്ന് പറഞ്ഞാണ് തടഞ്ഞത്. വാഹനങ്ങള്‍ പാലത്തിന് സമീപം ഇട്ടശേഷം നടന്ന് പമ്പയിലെത്താനാണ് പൊലീസ് മാദ്ധ്യമപ്രവര്‍ത്തകരോട് ആവശ്യപ്പെട്ടത്. ഡി.എസ്.എന്‍.ജി ഉള്‍പ്പെടെയുള്ള വാഹനങ്ങളാണ് തടഞ്ഞത്. നേരത്തെ കര്‍ശന പരിശേധനകള്‍ക്ക് ശേഷം രാത്രി എട്ടരയോടെ പൊലീസ് മാദ്ധ്യമങ്ങള്‍ക്ക് പ്രവേശനം അനുവദിച്ചിരുന്നു. അതിനിടെയിലാണ് പുതിയ സംഭവ വികാസങ്ങള്‍

ചിത്തിര ആട്ട പൂജയ്ക്കായി ശബരിമല നട നാളെ തുറക്കാന്‍ ഇരിക്കെ മാദ്ധ്യമങ്ങള്‍ക്ക് പമ്പയിലേക്ക് പ്രവേശിക്കാന്‍ നേരത്തെ അനുമതി നല്‍കിയിരുന്നില്ല. നിലയ്ക്കല്‍ വരെമാത്രമാണ് മാദ്ധ്യമങ്ങള്‍ക്ക് പ്രവേശിക്കാന്‍ അനുമതി ഉണ്ടായിരുന്നത്. മാദ്ധ്യമങ്ങളെ കടത്തിവിടാത്തതിനെതിരെ പ്രതിഷേധം ഉയര്‍ന്നിരുന്നു.

നേരത്തെ, മാദ്ധ്യമങ്ങളെ വിലക്കിയിട്ടില്ലെന്ന് മന്ത്രി കടകംപള്ളി സുരന്ദ്രനും ഡി.ജി.പി ലോക്‌നാഥ് ബഹ്‌റയും വ്യക്തമാക്കിയിട്ടും ശബരിമലയുടെ പരിസര പ്രദേശങ്ങളില്‍ മാദ്ധ്യമ പ്രവര്‍ത്തകര്‍ക്ക് പൊലീസ് അനുമതി നിഷേധിച്ചിരുന്നു. നിലയ്ക്കലില്‍നിന്നു പമ്പയിലേക്ക് കടത്തിവിടില്ലെന്നാണ് അറിയിച്ചിരുന്നത്. ഐജി അശോക് യാദവാണ് ഇതു സംബന്ധിച്ച നിര്‍ദേശം നല്‍കിയത്.

ശബരിമലയില്‍ മാധ്യമങ്ങള്‍ക്കു വിലക്കില്ലെന്ന് മന്ത്രി കടകംപള്ളി സുരേന്ദ്രന്‍ ഇന്ന് ഗുരുവായൂരില്‍ വച്ചും ആവര്‍ത്തിച്ചിരുന്നു. സുരക്ഷാ സംവിധാനങ്ങള്‍ ഏര്‍പ്പെടുത്തുന്നതിനാണ് തുടക്കത്തില്‍ മാദ്ധ്യമങ്ങളെ കടത്തിവിടാതിരുന്നതെന്നാണു വിശദീകരണം.

മാദ്ധ്യമങ്ങള്‍ക്ക് വിലക്ക് ഏര്‍പ്പെടുത്തില്ലെന്ന് രാവിലെ സംസ്ഥാന പൊലീസ് മേധാവി ലോക്‌നാഥ് ബെഹ്‌റ വ്യക്തമാക്കിയിരുന്നു. ശബരിമലയിലെ സുരക്ഷാ ക്രമീകരണങ്ങള്‍ പൂര്‍ത്തിയായാല്‍ ഉടന്‍ മാദ്ധ്യമങ്ങളെ കടത്തിവിടുമെന്നും അദ്ദേഹം അറിയിച്ചിരുന്നു. കഴിഞ്ഞ തവണ മാദ്ധ്യമപ്രവര്‍ത്തകരെ പ്രതിഷേധക്കാര്‍ ആക്രമിച്ചത് ഏറെ വിമര്‍ശനങ്ങള്‍ക്കിടയാക്കിയിരുന്നു.

അതേസമയം, പരമാവധി ആളുകളെ സന്നിധാനത്ത് എത്തിച്ച് പ്രതിഷേധം കടുപ്പിക്കാനാണ് ബി.ജെ.പിയും വിവിധ ഹിന്ദു സംഘടനകളും തീരുമാനിച്ചിരിക്കുന്നത്.