ശബരിമല യുവതീപ്രവേശനവുമായി ബന്ധപ്പെട്ട് ആര്‍.എസ്.എസ് വ്യാപകമായി നുണപ്രചരണം അഴിച്ചുവിടുകയാണെന്നും ഇക്കാര്യത്തില്‍ അവരോട് മത്സരിക്കാനാകില്ലെന്നും അതിന്റെ മാസ്‌റ്റേഴ്‌സാണ് അവരെന്നും മുഖ്യമന്ത്രി പിണറായി വിജയന്‍ ആരോപിച്ചു. കലാപങ്ങള്‍ ഉണ്ടാക്കിയിട്ട് അവരാദ്യം ചെയ്യുന്നത് നുണപ്രചരണങ്ങള്‍ അഴിച്ചുവിടുകയാണ്.

കേരളത്തിന്റെ ദൃഢമായ മതനിരപേക്ഷ മനസ് ഉലയ്ക്കാനും, ജനങ്ങളെ ഭിന്നിപ്പിച്ച് ചേരിതിരിച്ച് നിര്‍ത്താനുമാണ് ശ്രമം. ശബരിമലയില്‍ പണം ഇടാന്‍ പാടില്ലെന്നാണ് ആര്‍.എസ്.എസ് ഇപ്പോള്‍ പ്രചരിക്കുന്നത്. 1987-88 കാലത്ത് ആര്‍.എസ്.എസ് ഗുരുവായൂരില്‍ ഒരു സമരം നടത്തിയിരുന്നു. അവിടെ ആരും ചെല്ലാന്‍ പാടില്ല, ഭണ്ടാരത്തില്‍ പണം ഇടാന്‍ പാടില്ല, അതിന് അവര്‍ പ്രത്യേകം ഭണ്ടാരവും സ്ഥാപിച്ചു. അവസാനം എല്ലാം പൊളിച്ചുകെട്ടി അവര്‍ തന്നെ പോയെന്നും മുഖ്യമന്ത്രി ഓര്‍മിപ്പിച്ചു. 

ശബരിമലയില്‍ പണം സര്‍ക്കാര്‍ എടുക്കുന്നെന്നും പ്രചരണം നടത്തുന്നുണ്ട്. യഥാര്‍ത്ഥ വസ്തുത എന്താണ്?, അവിടുത്തെ ചില്ലി കാശ് സര്‍ക്കാര്‍ ഖജനാവിലേക്ക് പോകുന്നില്ല.അത് ദേവസ്വം ബോര്‍ഡിന്റെ ആവശ്യത്തിനാണ് ഉപയോഗിക്കുന്നത്. മാത്രമല്ല ശബരിമലയുടെ വികസനത്തിന് സര്‍ക്കാരുകള്‍ പണം നല്‍കുന്നുണ്ട്. യു.ഡി.എഫ് സര്‍ക്കാര്‍ 2013-14 വര്‍ഷത്തില്‍ 47 കോടിയും, 14-15ല്‍ 48 കോടിയും എല്‍.ഡി.എഫ് സര്‍ക്കാര്‍ 16-17 ല്‍ 137 കോടിയും 17-18ല്‍ 202 കോടിയും നല്‍കി. ഈ വസ്തുതകള്‍ മറച്ച് വെച്ചാണ് പ്രചരണം നടക്കുന്നത്. സര്‍ക്കാര്‍ ശബരിമലയ്ക്ക് എതിരെ ഒന്നും ചെയ്യുന്നില്ല, സംരക്ഷിക്കുകയാണ് ചെയ്യുന്നതെന്നും മുഖ്യമന്ത്രി പറഞ്ഞു.