ശബരിമല സുപ്രീംകോടതി വിധി മറികടക്കാന്‍ ഓര്‍ഡിനന്‍സ് കൊണ്ടുവന്നാല്‍ നിലനില്‍ക്കില്ലെന്ന് മുഖ്യമന്ത്രി പിണറായി വിജയന്‍. ഭരണഘടനാ മൂല്യങ്ങള്‍ പാലിക്കേണ്ടതില്ലെന്ന് പറഞ്ഞായിരിക്കണം ഓര്‍ഡിനന്‍സ് കൊണ്ടുവരേണ്ടത്. രാജ്യത്തെ ഇന്നത്തെ അവസ്ഥയില്‍ ഭരണഘടനാ വ്യവസ്ഥയില്‍ അത് നിലനില്‍ക്കില്ലെന്നും മുഖ്യമന്ത്രി പറഞ്ഞു. അതുകൊണ്ടാണ് ഭരണ ഘടന പിച്ചിച്ചീന്തണമെന്ന് ആര്‍.എസ്.എസ് മുമ്പും നിലപാട് എടുത്തിട്ടുള്ളത്. പഴയ ചാതുര്‍വര്‍ണ്യ വ്യവസ്ഥ കൊണ്ടുവരാനാണ് അവര്‍ നോക്കുന്നതെന്നും അദ്ദേഹം പറഞ്ഞു. ഏതെങ്കിലും ഒരു കൂട്ടരുടെ ആരാധാനാലയം മാത്രമേ പാടുള്ളൂ എന്ന് ആരെങ്കിലും വിചാരിച്ചാല്‍ അതിവിടെ നടപ്പാവില്ല. സ്ത്രീക്ക് തുല്യമായി പുരുഷനും ആരാധാനാ സ്വാതന്ത്ര്യമുണ്ട്. അത് തന്നെയാണ് സര്‍ക്കാര്‍ നിലപാടെന്നും മുഖ്യമന്ത്രി വ്യക്തമാക്കി. 

ആര്‍.എസ്.എസ് ദേശീയ ജനറല്‍ സെക്രട്ടറിയായ ഭയ്യാജി ജോഷി തന്നെ പറഞ്ഞു സ്ത്രീക്ക് തുല്യരാണ് പുരുഷന്‍മാരും. അതുകൊണ്ട് പുരുഷനുള്ള സ്വാതന്ത്ര്യം സ്ത്രീക്കുമുണ്ടെന്നും അദ്ദേഹം കഴിഞ്ഞ ആര്‍.എസ്.എസ് നേതൃസംഗമത്തിന് ശേഷം പറഞ്ഞു. കേരളത്തില്‍ ഇതുവരെയില്ലാത്ത വിശ്വാസി, അവിശ്വാസി എന്നൊരു ചേരിതിരിവിന് ശ്രമം നടക്കുന്നു. അതിലൂടെ ആളുകളെ അകറ്റിനിര്‍ത്താന്‍ ശ്രമം. അതിന് വ്്യക്തമായ ലക്ഷ്യമുണ്ട്. നിലയ്ക്കലിലും പമ്പയിലും വിശ്വാസികളെ ആക്രമിച്ചു. സന്നിധാനത്ത് ഇക്കൂട്ടര്‍ പ്രശ്‌നമുണ്ടാക്കുമെന്ന് സര്‍ക്കാര്‍ ആലോചിച്ചില്ല. പക്ഷെ, അതും നടന്നു. അത് വിശ്വാസം സംരക്ഷിക്കാനോ, വിശ്വാസികളെ സംരക്ഷിക്കാനോ അല്ല. വിശ്വാസത്തിന്റെ പേരില്‍ ചേരിതിരിവുണ്ടാക്കാന്‍ ആര്‍.എസ്.എസ് ശ്രമിക്കേണ്ട, വിശ്വാസികള്‍ക്ക് എല്ലാ സംരക്ഷണവും സര്‍ക്കാര്‍ നല്‍കും അവരോടൊപ്പം സര്‍ക്കാരുണ്ടാകും. വിശ്വാസം ഇല്ലാത്തവര്‍ക്ക് അവരുടെ വിശ്വാസം അനുസരിച്ച് ജീവിക്കാനും ഇവിടെ അവകാശമുണ്ടെന്നും പിണറായി വ്യക്തമാക്കി. 

ശബരിമലയില്‍ അക്രമത്തിന് നേതൃത്വം നല്‍കിയവര്‍ അത് എന്തിനാണെന്ന് വ്യക്തമാക്കി. ശബരിമലയെ കലാപഭൂമിയാക്കാന്‍ ആര്‍.എസ്.എസ് നീക്കം നടത്തുന്നു. ഇത് ഞങ്ങള്‍ ആദ്യമേ പറഞ്ഞതാണ്. അന്ന് ഞങ്ങളെ സംശയിച്ച ശുദ്ധാത്മാക്കള്‍ തെറ്റിദ്ധരിച്ചിട്ടുണ്ടാവാം. കാരണം വിശ്വാസത്തിന്റെ പേരിലായിരുന്നല്ലോ, അതുകൊണ്ട് അവരെ കുറ്റം പറയാനാവില്ലെന്നും മുഖ്യമന്ത്രി വ്യക്തമാക്കി.