ചിത്തിര ആട്ടവിശേഷത്തിനായി തിങ്കളാഴ്ച വൈകുന്നേരം തുറന്ന ശബരിമല നട ചൊവ്വാഴ്ച രാത്രി അടക്കുന്നതുവരെ ശരണ പാതയില്‍ സുരക്ഷ തുടരും. എരുമേലി, പമ്പാവാലി, കണമല, ഇലവുങ്കല്‍ എന്നിവിടങ്ങളിലാകും ഇത്. എരുമേലി ടൗണും പള്ളിയും കൊച്ചമ്പലവും വലിയമ്പലവും പൊലീസ് നിയന്ത്രണത്തിലാണ്. യുവതികളുടെ സാന്നിധ്യവും നിരീക്ഷണത്തിലാണ്. ഇതര സംസ്ഥാനങ്ങളില്‍നിന്നുള്ള തീര്‍ഥാടകര്‍ കൂടുതലായി എത്തിയിട്ടുണ്ട്. തമിഴ്‌നാട്ടില്‍നിന്നുള്ളവരാണ് ഏറെ. ചെറുപേട്ടതുള്ളലും സജീവമാണ്.എരുമേലിയില്‍നിന്ന് പമ്പക്ക് തിങ്കളാഴ്ച കെ.എസ്.ആര്‍.ടി.സി കൂടുതല്‍ സര്‍വിസ് നടത്തി.

രാവിലെ കെ.എസ്.ആര്‍.ടി.സി ബസുകളും സ്വകാര്യ വാഹനങ്ങളും എരുമേലിയില്‍ പൊലീസ് തടഞ്ഞെങ്കിലും തീര്‍ഥാടകരുടെ പ്രതിഷേധത്തെ തുടര്‍ന്ന് രണ്ടുമണിക്കൂറിനുശേഷം സര്‍വിസ് ആരംഭിച്ചു. പൊലീസ് നിര്‍ദേശമില്ലാതെ സര്‍വിസ് നടത്താനാകില്ലെന്ന് കെ.എസ്.ആര്‍.ടി.സി അധികൃതര്‍ അറിയിച്ചതാണ് പ്രതിഷേധത്തിനു കാരണമായത്. തീര്‍ഥാടകരെ ഉച്ചയോടെ മാത്രമേ പമ്പയിലേക്ക് കടത്തിവിടൂ എന്നായിരുന്നു പൊലീസ് നിലപാട്. എന്നാല്‍, തീര്‍ഥാടകര്‍ പ്രതിഷേധിച്ചതിനെത്തുടര്‍ന്ന് തീരുമാനം മാറ്റി.ശബരിമല സന്നിധാനത്ത് ദര്‍ശനത്തിനെത്തിയവരും സുരക്ഷക്കായി നിയോഗിച്ച പൊലീസുകാരും പലയിടത്തും വാഹനങ്ങള്‍ പൊലീസ് തടഞ്ഞെങ്കിലും ഉന്നത ഉദ്യോഗസ്ഥരുടെ നിര്‍ദേശപ്രകാരം കടത്തിവിട്ടു.
എരുമേലിയിലും സമീപത്തുമായി 200ലധികം പൊലീസിനെയാണ് വിന്യസിച്ചിട്ടുള്ളത്. ജില്ല പൊലീസ് മേധാവി ഹരിശങ്കര്‍ സ്ഥലത്ത് ക്യാമ്പ് ചെയ്ത് സുരക്ഷക്ക് നേതൃത്വം നല്‍കുന്നു. എറണാകുളത്തുനിന്നുള്ള അയ്യപ്പഭക്തര്‍ വിവിധ ഹിന്ദുസംഘടനകളുമായി സഹകരിച്ചാണ് എരുമേലിയില്‍ പ്രതിഷേധിച്ചതെന്ന് പൊലീസ് പറഞ്ഞു.