തിന്മക്ക് മേല് നന്മയുടെ വിജയം ആഘോഷിക്കുന്ന ഉത്സവമായ ദീപാവലി ഇന്ന്, പടക്കം പൊട്ടിക്കലും, മധുര വിതരണവുമായി നാടെങ്ങും ദീപാവലി ആഘോഷിക്കുന്നു
ദീപങ്ങളാല് നാടും നഗരവും ദീപാവലി ആഘോഷിക്കുന്നു. തിന്മയ്ക്ക് മേല് നന്മയുടെ വിജയം ആഘോഷിക്കുന്ന ഉത്സവമാണ് ദീപാവലി. ചിരാതുകളില് ദീപങ്ങളുടെ നിരയൊരുക്കിയും മധുര പലഹാരങ്ങള് വിതരണം ചെയ്തും പടക്കങ്ങള്പൊട്ടിച്ചും ദീപാവലി ആഘോഷിക്കുകയാണ് മലയാളികള്. മുഖ്യമന്ത്രി പിണറായി വിജയനും ഗവര്ണ്ണര് പി.സദാശിവവും ദീപാവലി ആശംസകള് നേര്ന്നു. ജനങ്ങളില് ഐക്യത്തിന്റെയും സാഹോദര്യത്തിന്റെയും നന്മയുടെയും വിജ്ഞാനത്തിന്റെയും വെളിച്ചം പരത്തുന്നതാകട്ടെ ദീപാവലി ആഘോഷമെന്നും പിണറായി വിജയന് പറഞ്ഞു .ഗവര്ണ്ണറും എല്ലാ മലയാളികള്ക്കും ദീപാവലി ആശംസകള് നേര്ന്നു.
കാര്ത്തിക മാസത്തിലെ കൃഷ്ണപക്ഷ ചതുര്ദശി ദിവസം വരുന്ന ദീപാവലി ഭാരതത്തിലെ ഏറ്റവും കൂടുതല് ജനവിഭാഗം കൊണ്ടാടുന്ന മഹോത്സവമാണ്. പേര് സൂചിപ്പിക്കുന്നതുപോലെ ദീപങ്ങളുടെ ആവലിയാണ് ദീപാവലി. സംസ്കാരത്തിന്റെ സംരക്ഷണവും പോഷണവുമാണല്ലോ ആഘോഷങ്ങളുടെ മുഖ്യധര്മ്മം. വിജ്ഞാനവും വിനോദവും നല്കുന്ന ആചാരാനുഷ്ഠാനങ്ങളോടുകൂടിയ ഉത്സവങ്ങള് നിരക്ഷരനുപോലും വിജ്ഞാനം പകര്ന്നുകൊടുക്കുന്ന അനൗപചാരിക വിദ്യാഭ്യാസ പ്രക്രിയയാണ്. പൈതൃകത്തിലെ നന്മകള് പാരമ്പര്യമായി പകര്ന്നു നല്കാന് പരിഷ്കൃത മനുഷ്യന് കണ്ടെത്തിയ ശരിയായ വിദ്യാവിവരണമായിരുന്നു ഇതിലൂടെ നിര്വഹിച്ചിരുന്നത്. എങ്കിലും കേരളത്തില് ദീപാവലിയ്ക്ക് വലിയ ആഘോഷങ്ങളൊന്നും ഇല്ല എന്നുതന്നെ പറയാം.
എന്നാല് മറ്റു സംസ്ഥാനങ്ങളില് ദീപാവലി ഭയങ്കര ആഘോഷമാണ്. വടക്കേ ഇന്ത്യയിലാണ് ദീപാവലി ആഘോഷം പൊടിപോടിക്കുന്നതെന്നുതന്നെ പറയാം. ദീപാവലിയുമായി ബന്ധപ്പെട്ട ആചാരങ്ങള്, അനുഷ്ഠാനങ്ങള്, വിശ്വാസങ്ങള്, സങ്കല്പ്പങ്ങള്, കലാപരിപാടികള് എന്നിവ ജനങ്ങളെ സ്വാധീനിച്ചതുപോലെ മറ്റൊരു ആഘോഷമില്ലെന്നു തന്നെ പറയാം. കുടില് മുതല് കൊട്ടാരം വരെയും പാമരനും പണ്ഡിതനുമൊക്കെ ഒരുപോലെ നെഞ്ചിലേറ്റിയ ഒരു ഉത്സവമാണ് ദീപാവലി. വിശ്വാസഭേദങ്ങളും ആചാരവ്യത്യാസങ്ങളും ഓരോ പ്രദേശത്തും കണ്ടെന്നിരിക്കാം. ഭാരതീയമായ ഉത്സവത്തിന്റെ പ്രത്യേകതകളില് ഒന്ന് അവയ്ക്ക് ഇതിഹാസപുരാണങ്ങളുമായോ സനാതനമാര്ഗ്ഗത്തില് സഞ്ചരിച്ച മഹാപുരുഷന്മാരുടെ ജീവിതവുമായോ ബന്ധമുണ്ടായിരിക്കും.
പതിനാല് വര്ഷത്തെ വനവാസത്തിന് ശേഷം ശ്രീരാമന് അയോദ്ധ്യയില് തിരിച്ചെത്തിയപ്പോള് രാജ്യം മുഴുവന് ദീപങ്ങള് തെളിയിച്ച് പ്രജകള് അദ്ദേഹത്തെ വരവേറ്റതിന്റെ ഓര്മ്മയാണ് ദീപാവലിയെന്നാണ് വിശ്വാസം. എന്നാല് തിന്മയുടെ പ്രതീകമായ നരകാസുരനെ വധിച്ച് ശ്രീകൃഷ്ണന് നന്മയുടെ വെളിച്ചം പകര്ന്നതിന്റെ ഓര്മ്മക്കായാണ് ദീപാവലി ആഘോഷിക്കുന്നതെന്നും ഐതിഹ്യവും ഇതിന് പുറകിലുണ്ട്.
"
https://www.facebook.com/Malayalivartha
