നിലയ്ക്കലില് പോലീസും ബിജെപി നേതാക്കളുമായി വന് വാക്കേറ്റം... സ്വകാര്യ വാഹനങ്ങള് കടത്തി വിടുന്നതിനെ ചോദ്യം ചെയ്ത് നേതാക്കള്
നിലയ്ക്കലില് പോലീസും ബിജെപി നേതാക്കളും തമ്മില് വാക്കേറ്റം. പമ്പയിലേക്ക് തങ്ങളുടെ വാഹനങ്ങള് കടത്തി വിടണമെന്ന് ആവശ്യപ്പെട്ടാണ് ബിജെപി നേതാക്കള് പോലീസുമായി തര്ക്കത്തിലേര്പ്പെട്ടത്. സ്വകാര്യ വാഹനങ്ങള് കടത്തിവിടാനാവില്ലെന്ന് പോലീസ് നിലപാടെടുക്കുകയും അതേസമയം വിവിഐപി സ്വകാര്യ വാഹനങ്ങള് കടത്തി വിട്ടതോടെയാണ് ഉന്നത പോലീസ് നേതാക്കളുമായി ബിജെപി നേതാക്കളായ കൃഷ്ണദാസ്, എ.എന്. രാധാകൃഷ്ണന്, ശശികലടീച്ചര് തുടങ്ങിയവര് പോലീസുമായി വാക്കേറ്റത്തില് ഏര്പ്പെട്ടത്. കഴിഞ്ഞ ദിവസം ശശികല ടീച്ചറെ നിലയ്ക്കലില് തടഞ്ഞതും വന് വിവാദമായിരുന്നു.
മറ്റുള്ള സ്വകാര്യ വാഹനങ്ങള് കടത്തി വിട്ടതാണ് ബിജെപി നേതാക്കളെ പ്രകോപിതരാക്കിയത്. നിലയ്ക്കലിലേക്ക് കെഎസ്ആര്ടിസി ബസ് ഒഴികെ മറ്റൊരു വാഹനവും കടത്തി വിടില്ലെന്ന് പോലീസ് നേരത്തെ തന്നെ വ്യക്തമാക്കിയിരുന്നു. മാധ്യമ പ്രവര്ത്തകരെ പോലും കര്ശന പരിശോധനയ്ക്കുശേഷമാണ് കടത്തി വിട്ടത്. എന്നാല് ഈ ബിജെപി നേതാക്കള് നോക്കി നില്ക്കെ പല സ്വകാര്യ വാഹനങ്ങളും പോലീസ് കടത്തി വിട്ടതാണ് പ്രകോപനം സൃഷ്ടിച്ചത്. കഴിഞ്ഞ ദിവസം 125 സ്വകാര്യ വാഹനങ്ങള് കടത്തിവിട്ടെന്നാണ് കൃഷ്ണദാസ് പറഞ്ഞത്. ഇതിനെ ചോദ്യം ചെയ്താണ് ഉന്നത പോലീസ് ഉദ്യോഗസ്ഥരുമായി ബിജെപി നേതാക്കള് വാക്കേറ്റത്തില് ഏര്പ്പെട്ടത്.
മനപൂര്വ്വം പ്രശ്നങ്ങള് സൃഷ്ടിക്കരുതെന്ന് പറഞ്ഞാണ് നേതാക്കള് തട്ടിക്കയറിയത്. നിങ്ങള് മനപൂര്വ്വം പിണറായിക്കുവേണ്ടിയാണ് വാദിക്കുന്നതെന്നാണ് ബിജെപി നേതാക്കള് പറഞ്ഞത്. സമാധാനത്തെ തകര്ക്കാനാണ് പോലീസ് ശ്രമിക്കുന്നതെന്ന് അവര് ആരോപിച്ചു. ഇപ്പോഴും സംഘര്ഷാവസ്ഥയിലാണ് നിലയ്ക്കല്.
"
https://www.facebook.com/Malayalivartha
