സന്നിധാനത്തെ നിയന്ത്രണം പൊലീസിന് തന്നെയെന്ന് മുഖ്യമന്ത്രി പിണറായി വിജയന്‍. ശബരിമലയിലെ സമാധാന അന്തരീക്ഷം നിലനിര്‍ത്തണം. അതിന് വിഘ്‌നം സംഭവിച്ചാലേ പൊലീസ് ഇടപെടൂ. ശബരിമലയെ ഉപയോഗിച്ച് ക്രമസമാധാനം തകര്‍ക്കാന്‍ ആരെയും അനുവദിക്കില്ല. സമാധാന അന്തരീക്ഷം തകര്‍ക്കാനാണ് ചില ശക്തികള്‍ ശ്രമിക്കുന്നത്. അവിടെ എത്തുന്ന തീര്‍ഥാടകരെ തടയാനാണ് ചിലര്‍ ശ്രമിക്കുന്നത്. ഇത്തരക്കാരെ യഥാര്‍ഥ വിശ്വാസികളും സമൂഹവും തിരിച്ചറിയുമെന്നും മുഖ്യമന്ത്രി പറഞ്ഞു. 

പ്രശ്‌നക്കാരുടെ തന്ത്രങ്ങള്‍ വിലപോവില്ല. ക്രമസമാധാനം തകര്‍ക്കാനാണ് ബിജെപി പ്രവര്‍ത്തകര്‍ അവിടെ തമ്പടിക്കുന്നത്. അവര്‍ക്ക് പറ്റിയ മണ്ണ് ഇതല്ലെന്ന് ഉടന്‍ തിരിച്ചറിയുമെന്നും മുഖ്യമന്ത്രി പറഞ്ഞു. ശബരിമലയിലെ പൊതുവായ അവസ്ഥ തകര്‍ക്കാന്‍ ശ്രമിക്കുന്ന ശക്തികളുണ്ട്. അവരറിയേണ്ട ഒരു കാര്യമുണ്ട്, അതിനുള്ള ശേഷി അവര്‍ക്കില്ല. കേരളത്തിന് പുറത്തും പലയിടത്തും പയറ്റിത്തെളിഞ്ഞത് ഇവിടെ നടക്കില്ലെന്നും മുഖ്യമന്ത്രി വ്യക്തമാക്കി.

ശബരിമലയില്‍ ക്രമസമാധാന പ്രശ്‌നം ഉണ്ടായാലേ പൊലീസ് ഇടപെടൂ. മാധ്യമപ്രവര്‍ത്തകരെ അടക്കം ആക്രമിച്ചത് പൊലീസല്ല, കലാപം ഉണ്ടാക്കാന്‍ ശ്രമിച്ചവരാണ്. നാടിന്റെ അന്തരീക്ഷം തകര്‍ക്കാന്‍ ശ്രമം നടക്കുന്നുണ്ട്. അത് മാധ്യമപ്രവര്‍ത്തകരടക്കം മനസിലായതാണെന്നും മുഖ്യമന്ത്രി വ്യക്തമാക്കി.