കമാന്‍ഡോകള്‍, ദ്രുതകര്‍മ സേന, മൊബൈല്‍ ജാമറുകള്‍, മൂവായിരത്തോളം പൊലീസ്, പതിനഞ്ച് വനിതാ പൊലീസ് പഴുതടച്ച സുരക്ഷ; ചിത്തിര ആട്ടവിശേഷത്തിന് ശബരിമല നടതുറന്നപ്പോള്‍ പൊലീസ് ഒരുക്കിയ ഈ സംവിധാനങ്ങളെല്ലാം പാളി. ഇതോടെ വരുന്ന മണ്ഡലകാലത്ത് സുരക്ഷയ്ക്ക് പുതിയ തന്ത്രങ്ങള്‍ മെനയുകയാണ് പൊലീസ്. ചിത്തിര ആട്ടവിശേഷത്തിന് ഒരുദിവസം നടതുറന്നപ്പോള്‍, സുരക്ഷയുടെ പേരില്‍ അന്യസംസ്ഥാന തീര്‍ത്ഥാടകരെയടക്കം എരുമേലിയിലും വിദൂരപ്രദേശങ്ങളിലും മണിക്കൂറുകളോളം തടഞ്ഞിട്ടത് കൂട്ട പ്രതിഷേധങ്ങള്‍ക്ക് വഴിവച്ചിരുന്നു.

63 ദിവസമാണ് മണ്ഡലകാലത്ത് നടതുറക്കുക. ഏതാണ്ട് അഞ്ചരക്കോടിയിലേറെ ഭക്തരെത്തും. ആ സമയം ഈ നിയന്ത്രണങ്ങള്‍ ഫലപ്രദമാവില്ലെന്നാണ് പൊലീസ് വിലയിരുത്തുന്നത്. ഇന്നലെ നടപ്പാക്കിയ സുരക്ഷാസ്‌കീമില്‍ മാറ്റങ്ങള്‍ വേണ്ടിവരുമെന്നും മണ്ഡലകാലത്തേക്ക് പുതിയ സ്‌കീം വരുമെന്നും പൊലീസ് മേധാവി ലോക്‌നാഥ് ബെഹ്‌റ വ്യക്തമാക്കി. പമ്പ മുതല്‍ സന്നിധാനം വരെയുള്ള നാലരകിലോമീറ്റര്‍ സുരക്ഷാ ഇടനാഴിയാക്കി, സേനയെ വിന്യസിച്ച്, ബാരിക്കേഡുകളും നിരീക്ഷണ കാമറകളും നിറയ്ക്കുന്നതാണ് പൊലീസിന്റെ സുരക്ഷാപദ്ധതി. 

ശബരിമലയിലും സന്നിധാനത്ത് ജാമറുകളുപയോഗിച്ച് മൊബൈല്‍, ഇന്റര്‍നെറ്റ് ബന്ധം വിച്ഛേദിക്കാനുള്ള പദ്ധതിയും ഉപേക്ഷിച്ചേക്കും. ശബരിമലയില്‍ നടക്കുന്നത് പുറംലോകം അറിയാതിരിക്കാനാണ് ജാമറുകളെന്ന് ആരോപണമുയര്‍ന്ന സാഹചര്യത്തിലാണിത്. സിംകാര്‍ഡുകള്‍ ഉപയോഗിക്കുന്ന അത്യാധുനിക സംവിധാനത്തിലൂടെയാണ് ചാനലുകള്‍ തത്സമയ സംപ്രേഷണം നടത്തുന്നത്. ശബരിമലയിലുള്ള രാഷ്ട്രീയനേതാക്കള്‍ അടക്കമുള്ളവരുടെ ഫോണ്‍വിളികള്‍ 24 മണിക്കൂറും പൊലീസ് നിരീക്ഷിക്കുന്നുണ്ട്.

മകരവിളക്കിനു മാത്രം 30ലക്ഷത്തിലേറെ ഭക്തരാണ് ശബരിമലയിലെത്തും. പ്രതിവര്‍ഷം 20ശതമാനം തീര്‍ത്ഥാടകര്‍ വര്‍ദ്ധിക്കുന്നുണ്ട്. കര്‍ശന നിയന്ത്രണങ്ങള്‍ ഇനിയും തുടര്‍ന്നാല്‍ മണ്ഡലകാലത്ത് അത്യാഹിതങ്ങള്‍ക്ക് വഴിവയ്ക്കുമെന്നാണ് പൊലീസ് വിലയിരുത്തുന്നു. നാലുഘട്ടമായി 20,000 പൊലീസുകാരെയാണ് മണ്ഡലകാലത്ത് സുരക്ഷയ്ക്ക് നിയോഗിക്കാറുള്ളത്. പുതിയ സ്‌കീമില്‍ 2300 പൊലീസും കമാന്‍ഡോകളടക്കം സായുധവിഭാഗങ്ങളുമുണ്ട്. മണ്ഡലകാലത്ത് വിവിധ സേനകളെ വിന്യസിച്ച് സുരക്ഷ ഒരുക്കുക പ്രയാസമായിരിക്കും.