എല്ലായിപ്പോഴും ഭക്തരുടെ കണ്ണീര്‍ കണ്ടയാളാണ് ദേവസ്വം ബോര്‍ഡ് പ്രസിഡന്റ് പത്മകുമാര്‍. ഭക്തര്‍ക്ക് വേദനയുണ്ടാക്കാത്ത തരത്തില്‍ പത്മകുമാര്‍ തീരുമാനമെടുത്ത എല്ലാ സന്ദര്‍ഭങ്ങളിലും തൊട്ടു പിന്നാലെ സര്‍ക്കാര്‍ അത് അട്ടിമറിയ്ക്കുകയായിരുന്നു. പലതവണ മുഖ്യമന്ത്രി ശകാരിക്കുകയും ചെയ്തു. ഇതിനെ തുടര്‍ന്ന് അദ്ദഹം മലക്കം മറിയുകയും ചെയ്തു. ഇതിനിടയ്ക്ക് പത്മകുമാര്‍ ബിജെപിയിലേക്ക് പോകുന്നുവെന്ന തരത്തിലുള്ള വാര്‍ത്തയും വന്നു. അവസാനം ചിത്തിര ആട്ടവിശേഷത്തിന് നട തുറന്നപ്പോള്‍ ശബരിമലയുടെ ചാര്‍ജ് ഏല്‍പ്പിച്ചത് ശങ്കരദാസിനേയാണ്. ശങ്കരദാസ് വലിയ ആളായി പത്മ കുമാറിനെ തള്ളിപ്പറയുകയും ചെയ്തു. അതിനിടയ്ക്കാണ് അയ്യപ്പന്‍ പത്മകുമാറിന്റെ വേദന അറിഞ്ഞത്. കൈയ്യോടെ പണിയും കിട്ടി.

ആര്‍.എസ്.എസ്.നേതാവ് വത്സന്‍ തില്ലങ്കേരി ഇരുമുടിക്കൊട്ടില്ലാതെ പതിനെട്ടാംപടി ചവിട്ടിയെന്ന ആരോപണങ്ങള്‍ ഉയര്‍ന്നുവരുന്ന പശ്ചാത്തലത്തിലാണ് ദേവസ്വംബോര്‍ഡ് അംഗം ശങ്കര്‍ദാസും വിവാദത്തിന്റെ പിടിയിലായത്. ചിത്തിര ആട്ടവിശേഷത്തിനായി ശബരിമല നട തുറന്നപ്പോള്‍ ശങ്കര്‍ദാസ് മേല്‍ശാന്തിക്കൊപ്പം ഇരുമുടിക്കൊട്ടില്ലാതെ പലതവണ പതിനെട്ടാംപടി കറിയിറങ്ങിയെന്നാണ് ആരോപണം. അധികാരത്തില്‍ കയറുന്നതിനു മുമ്പ് ആചാരങ്ങള്‍ പാലിക്കുമെന്ന് സത്യപ്രതിജ്ഞ ചെയ്ത ദേവസ്വം ബോര്‍ഡ് പ്രതിനിധി തന്നെ ആചാരങ്ങള്‍ ലംഘിച്ചത് സത്യപ്രതിജ്ഞാ ലംഘനമാണെന്നും ആരോപണമുയരുന്നുണ്ട്.

ഇന്നലെ രാവിലെ ദര്‍ശനത്തിനെത്തിയ യുവതികളെ പ്രായത്തെച്ചൊല്ലിയുണ്ടായ തര്‍ക്കത്തിനിടെയാണ് ആര്‍.എസ്.എസ് നേതാവ് വത്സന്‍ തില്ലങ്കേരി പതിനെട്ടാംപടി വഴി ഇരുമുടിക്കെട്ടില്ലാതെ തിരിച്ചിറങ്ങിയത്. ഇത് ആചാരലംഘനമാണെന്നും ഇക്കാര്യത്തില്‍ അന്വേഷണം നടക്കുമെന്നും ദേവസ്വം ബോര്‍ഡ് അംഗമായ കെ.പി.ശങ്കര്‍ദാസ് അറിയിച്ചിരുന്നു. ഇതിന് പിന്നാലെ കഴിഞ്ഞ ദിവസം ശങ്കര്‍ദാസ് ആചാരങ്ങള്‍ ലംഘിച്ച് പതിനെട്ടാംപടി കയറിയതിന്റെ ദൃശ്യങ്ങള്‍ ഒരു സ്വകാര്യ ചാനല്‍ പുറത്തുവിടുകയായിരുന്നു.

അതേസമയം ശങ്കര്‍ദാസിന് അബദ്ധം പറ്റിയതാകാമെന്നുള്ള നിലപാടുമായി മുന്‍ ദേവസ്വം ബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍ രംഗത്തെത്തി. നല്ലൊരു വിശ്വാസിയായ ശങ്കര്‍ദാസിന് ഇത്തരമൊരു തെറ്റുണ്ടാകാന്‍ പാടില്ലായിരുന്നു. ഇക്കാര്യങ്ങളെക്കുറിച്ച് അദ്ദേഹത്തിന് വ്യക്തമായ ധാരണയില്ലെന്നാണ് മനസിലാക്കുന്നത്. തന്ത്രിമാരുമായി ആലോചിച്ച ശേഷം ഇക്കാര്യത്തില്‍ പരിഹാര ക്രിയകള്‍ നടത്തണമെന്നും അദ്ദേഹം ഒരു സ്വകാര്യ ചാനലിനോട് പ്രതികരിച്ചു. ഇതിനിടെയാണ് യേശുദാസിനെതിരെ ഹൈക്കോടതി കേസെടുത്ത കാര്യവും വരുന്നത്. അങ്ങനെ ഹൈക്കോടതി കേസെടുത്താല്‍ ശങ്കരദാസിന്റെ കാര്യം സ്വാഹ.