കൗണ്‍സിലിംഗിനിടെ പിതാവിന്റെ ക്രൂരതകള്‍ പുറത്ത് പറഞ്ഞ് ഏഴുവയസുകാരന്‍. ദിവസങ്ങളോളം നീണ്ട കൗണ്‍സിലിംഗിന് ഒടുവിലാണ്, പിതാവ് ചട്ടുകം പഴുപ്പിച്ച് പൊള്ളലേല്‍പ്പിച്ച വിവരം കുട്ടി തുറന്നുപറഞ്ഞത്. ഏഴുവയസുകാരനെ മര്‍ദ്ദിക്കുകയും ചട്ടുകം പഴുപ്പിച്ച് പൊള്ളലേല്‍പ്പിക്കുകയും ചെയ്ത സംഭവത്തില്‍ പിതാവിനെതിരെ പൊലീസ് കേസെടുത്തു. ജുവനൈല്‍ ജസ്റ്റിസ് ആക്ടിലെ ജാമ്യമില്ലാ വകുപ്പുകള്‍ ചുമത്തിയാണ് പൊലീസ് കേസെടുത്തത്. ചൈല്‍ഡ് വെല്‍ഫെയര്‍ കമ്മിറ്റിയുടെ സംരക്ഷണയില്‍ അഭയകേന്ദ്രത്തിലുള്ള കുട്ടി ആദ്യം പിതാവിന്റെ ക്രൂരത വെളിപ്പെടുത്താന്‍ തയ്യാറായിരുന്നില്ല.

ദേഹമാസകലം പൊള്ളലേറ്റ നിലയില്‍ ജൂണ്‍ ഒന്നിന് വൈകിട്ടാണ് എറണാകുളം മെഡിക്കഷ കോളേജ് ആശുപത്രിയില്‍ ഏഴുവയസുകാരനെ പ്രവേശിപ്പിച്ചത്. ഇന്‍ഡക്ഷന്‍ കുക്കര്‍ ദേഹത്ത് വീണ് പരിക്കേറ്റെന്നായിരുന്നു കുട്ടി ആദ്യം പറഞ്ഞത്. എട്ടുദിവസത്തെ ചികിത്സയ്ക്ക് ശേഷം ചൈല്‍ഡ് വെല്‍ഫെയര്‍ കമ്മിറ്റി സിറ്ങറിംഗില്‍ ഹാജരാക്കിയപ്പോള്‍ അഭയകേന്ദ്രത്തിലേക്ക് മാറ്റുകയായിരുന്നു. അഭയകേന്ദ്രത്തിലെ പരിചരണത്തിന് ഒടുവിലാണ് കാര്യങ്ങള്‍ വെളിപ്പെടുത്താന്‍ കുട്ടി തയ്യാറായത്.

മാതാവ് ബന്ധം വേര്‍പെടുത്തിയതിനാല്‍ പിതാവിനും അമ്മൂമ്മയ്ക്കും രണ്ട് സഹോദരങ്ങള്‍ക്കും ഒപ്പമായിരുന്നു കുട്ടി താമസിച്ചിരുന്നത്. മതപഠന കേന്ദ്രത്തിലാക്കിയിട്ടും തിരിച്ചെത്തിയത് പിതാവിനെ പ്രകോപിപ്പിച്ചിരുന്നു. സംഭവ ദിവസം മതഗ്രന്ഥം വലിച്ചെറിഞ്ഞതും മൂത്രമൊഴിച്ചതുമാണ് പൊള്ളലേല്‍പ്പിക്കാന്‍ കാരണം. മേയ് 31ന് വൈകിട്ട് വീട്ടില്‍ നിന്ന് കുട്ടിയുടെ ഉച്ചത്തിലുള്ള നിലവിളി കേട്ടതായി അയല്‍വാസികളും പൊലീസില്‍ അറിയിച്ചിരുന്നു. അതേസമയം കുട്ടിയെ വിട്ടുതരണമെന്ന് ആവശ്യപ്പെട്ട് പിതാവ് ഹൈക്കോടതിയെ സമീപിച്ചിരിക്കുകയാണ്.