വണ്ടി പാര്‍ക്ക് ചെയ്യുന്നതുമായി ബന്ധപ്പെട്ട തര്‍ക്കത്തില്‍ യുവാവിനെ നെഞ്ചില്‍ തള്ളിയിട്ട് കൊന്ന ഡിവൈ എസ് പി, സിപിഎം തിരുവനന്തപുരം ജില്ലാ നേതാവിന്റെ ഉറ്റസുഹൃത്ത്. കൊലക്കേസില്‍ പ്രതിയായി തീര്‍ന്ന ഹരികുമാറിനെ നെയ്യാറ്റിന്‍കരയില്‍ നിയമിച്ചതും ഇതേ സി പി എം നേതാവ്. 

നെയ്യാറ്റിന്‍കരയില്‍ നടന്ന അനിഷ്ട സംഭവം സി പി എമ്മിന്റെ ജില്ലാ നേതാവ് അപ്പോള്‍ തന്നെ അറിഞ്ഞു എന്നാണ് റിപ്പോര്‍ട്ട്. യുവാവിന്റെ മരണം പ്രാദേശിക സിപിഎം നേതാക്കളും ജില്ലാ നേതാവിനെ അറിയിച്ചു. ഡി വൈ എസ്പിക്ക് എല്ലാ പിന്തുണയും ജില്ലാനേതൃത്വം നല്‍കിയെന്നാണ് വിവരം. ഡി വൈ എസ്പിയോട് ഒളിവില്‍ പോകാന്‍ നിര്‍ദ്ദേശി ച്ചതും അദ്ദേഹം തന്നെയാണ്. 

സി പി എം എം എല്‍ എ ആന്‍സലന്‍ മരിച്ച യുവാവിന്റെ ബന്ധുക്കള്‍ക്കൊപ്പം രംഗത്തെത്തിയത് ജില്ലാ നേതാവിനെ അതിഭുതപ്പെടുത്തി. ആന്‍സലന്‍ എം എല്‍ എ മൃതദേഹവുമായി നാട്ടുകാര്‍ നടത്തിയ ഉപരോധസമരത്തില്‍ പങ്കെടുത്തത് ജില്ലാ നേതാവിനെ അമ്പരപ്പിച്ചു. ജില്ലാ നേതാവ് എം എല്‍ എയുമായി നടത്തിയ ചര്‍ച്ചയിലും എം എല്‍ എ പിന്‍വാങ്ങിയില്ല. അതില്‍ ജില്ലാ നേതാവിന് വിഷമമുണ്ട്. 

ജില്ലാ നേതാവാണ് തിരുവനന്തപുരം ജില്ലയിലെ പോലീസ് ഉദ്യോഗസ്ഥരെ നിയമിക്കുന്നത്. അദ്ദേഹം നല്‍കുന്ന പട്ടികയുടെ അടിസ്ഥാനത്തിലാണ് നിയമനം. നേമം പോലുള്ള ചില സ്ഥലങ്ങളില്‍ മാത്രം മുന്‍ സി പി എം എം എല്‍ എയുടെ വേണ്ടപ്പെട്ടവരെ നിയമിക്കാറുണ്ട്. സി പി എമ്മിന്റെ ജില്ലാ നേതാക്കളില്‍ ഏറ്റവുമധികം ഇടപെടലുകള്‍ ആഭ്യന്തരവകുപ്പില്‍ നടത്തുന്നത് ഇദ്ദേഹമാണ്. പ്രാദേശിക തലത്തില്‍ എം എല്‍ എ മാര്‍ പറയാറുള്ളതൊന്നും അദ്ദേഹം കേള്‍ക്കാറില്ല. ജില്ലയിലെ എം എല്‍ എമാരില്‍ പലരും പുതുമുഖങ്ങളായതിനാല്‍ അത് എളുപ്പവുമാണ്.

അതേസമയം ഉദ്യോഗസ്ഥ നിയമനത്തില്‍ ചില ആരോപണങ്ങളും ഉയര്‍ന്നുവരുന്നുണ്ട്. നെയ്യാറ്റിന്‍കര പോലൊരു സ്ഥലത്ത് ഉദ്യോഗസ്ഥര്‍ക്ക് സുവര്‍ണ കൊയ്ത്ത് നടത്താന്‍ അവസരമുണ്ട്. അത്തരം ഉദ്യോഗസ്ഥരില്‍ നിന്നും വരുമാനത്തിന്റെ ഒരു പങ്ക് അവരെ നിയമിച്ച പ്രാദേശിക നേതാക്കള്‍ക്കാണ് പോകാറുള്ളത്. ഏത് രാഷ്ട്രീയപാര്‍ട്ടി അധികാരത്തില്‍ ഉണ്ടായിരുന്നാലും ഇതാണ് അവസ്ഥ. ഇഷ്ടപ്പെടുന്ന സ്ഥലങ്ങളില്‍ നിയമനം ലഭിക്കാന്‍ ഉദ്യോഗസ്ഥര്‍ പലതരത്തിലുള്ള സ്വാധീനങ്ങളും രാഷ്ട്രീയക്കാരില്‍ ചെലുത്താറുണ്ട്. അതില്‍ സാമ്പത്തിക സ്വാധീനവുമുണ്ടെന്നാണ് ഞ്ഞെട്ടിക്കുന്ന വസ്തുത. യു ഡി എഫില്‍ ആണെങ്കില്‍ അതെല്ലാം സഹിക്കാവുന്നതേയുള്ളു. ഇടത് മുന്നണിയുടെ കാര്യം അങ്ങനെയല്ല. ഒരു കാരണവശാലും അവിടെ അഴിമതി വച്ചു പൊറുപ്പിക്കില്ല. 

ഇതിനകം ഡി വൈ എസ് പിയെ രക്ഷിക്കാനുള്ള ശ്രമങ്ങള്‍ തുടങ്ങി കഴിഞ്ഞു. ഉന്നത ഉദ്യോഗസ്ഥനായ ഒരാള്‍ക്കെതിരെ അന്വേഷണം നടത്തുന്നത് എ എസ്പി റാങ്കിലുള്ള ഉദ്യോഗസ്ഥനാണ്. പട്ടി ദുരുഹമായി ചത്താല്‍ പോലും ഐ.ജി. അന്വേഷിക്കുന്ന നാടാണ് നമ്മുടേത്. അതായത് രക്ഷിക്കാനുള്ള എല്ലാ പഴുതുകളും ചേര്‍ത്താണ് അന്വേഷണം എന്നര്‍ത്ഥം. മുഖ്യമന്ത്രി വിഷയത്തില്‍ ഇടപെട്ടു എന്നത് മാത്രമാണ് ഒരു സമാധാനം. സാധാരണ ഗതിയില്‍ മുഖ്യമന്ത്രി ഇടപെടുന്ന വിഷയങ്ങള്‍ അട്ടിമറിക്കുന്നത് എളുപ്പമല്ല. ഹരികുമാറിനെ സസ്‌പെന്റ് ചെയ്യാന്‍ നിര്‍ദ്ദേശം നല്‍കിയത് മുഖ്യമന്ത്രി നേരിട്ടാണ്. പതിവിന് വിപരീതമായി അദ്ദേഹം നേരിട്ട് ഇക്കാര്യം മാധ്യമങ്ങളെ അറിയിക്കുകയും ചെയ്തു. എന്നാല്‍ സി പി എം വഴി വിഷയത്തില്‍ ഇടപെടല്‍ ഉണ്ടായി കൂടെന്നില്ല.