ചിത്തിരആട്ടവിശേഷത്തിന് സംഘപരിവാറിന്റെ അതിക്രമം കണ്ട് പൊലീസ് നോക്കുകുത്തിയായി നിന്നെങ്കില് മണ്ഡല കാലത്ത് ഭക്തര്ക്ക് നേരെ പൊലീസ് അതിക്രമം അഴിച്ചുവിടുന്നു, സ്ത്രീകള്ക്കും കുട്ടികള്ക്കും മര്ദ്ദനമേറ്റു
ശബരിമലയില് പൊലീസ് പിണറായി സര്ക്കാരിനെ തിരിഞ്ഞുകൊത്തുന്നു. കഴിഞ്ഞ ദിവസങ്ങളില് പൊലീസ് ഏര്പ്പെടുത്തിയ നിയന്ത്രണവും അതിനെതിരെ ഇന്നലെ രാത്രി ഉണ്ടായ അനിഷ്ട സംഭവങ്ങളും സര്ക്കാരിന് വലിയ തിരിച്ചടിയാണ് ഉണ്ടായിരിക്കുന്നത്. ജനക്കൂട്ടത്തെ നിയന്ത്രിക്കാനറിയാത്ത പൊലീസ് ഉദ്യോഗസ്ഥരാണ് കാര്യങ്ങള് വഷളാക്കുന്നത്.
ഇന്നലെ വിരിവയ്ക്കാന് സ്ഥലം ലഭിക്കാത്തതിനെ തുടര്ന്നാണ് നട അടയ്ക്കുന്നതിന് മുമ്പ് ഭക്തര് പ്രതിഷേധിച്ചത്. ഹരിവരാസനം കഴിഞ്ഞയുടന് തങ്ങള് പരിഞ്ഞ്പോകാമെന്നും ഇവര് എസ്.പി പ്രതീഷ്കുമാറിനെ അറിയിച്ചു. എന്നാല് പ്രതിഷേധത്തിന് നേതൃത്വം നല്കിയ ആര്.എസ്.എസ് പ്രവര്ത്തകന് രാജേഷിനെ നട അടച്ച ശേഷം എസ്.പി അറസ്റ്റ് ചെയ്യാന് തീരുമാനിച്ചതോടെയാണ് പ്രശ്നം ഉണ്ടായത്.
പമ്പയില് നിന്ന് നടന്ന് സന്നിധാനത്ത് എത്തുന്ന ഭക്തര്ക്ക് വിശ്രമിക്കാനാണ് വലിയ നടപ്പന്തല്. എന്നാല് ഇവിടെ ഭക്തരെ വിശ്രമിക്കാന് അനുവദിക്കാതെ പൊലീസ് വെള്ളം ഒഴിച്ചത് ശരിയായില്ലെന്ന വിമര്ശനം സര്ക്കാരില് നിന്ന് തന്നെ ഉയരുന്നുണ്ട്. ശബരിമലയില് ഇന്നലെ രാത്രി അറസ്റ്റ് ഉള്പ്പെടെ നടന്നെങ്കിലും സുരക്ഷാചുമതലയുള്ള ഐ.ജി വിജയ്സഖറെ സന്നിധാനത്തേക്ക് തിരിഞ്ഞ് നോക്കിയില്ല. ഇതേ തുടര്ന്ന് സര്ക്കാര് വിശദീകരണം തേടിയിട്ടുണ്ട്.
പ്രതിപക്ഷം പോലും സര്ക്കാരിനെ നേരിട്ട് ആക്രമിക്കുന്നില്ല, പൊലീസിനെയാണ് വിമര്ശിക്കുന്നത്. പൊലീസ് ഭക്തര്ക്ക് നേരെ കുതിരകയറുകയാണെന്നും അതിനെ ഭയന്ന് ഭക്തജനങ്ങള് സന്നിധാനത്തേക്ക് വരുന്നില്ലെന്നും പ്രതിപക്ഷനേതാവ് രമേശ് ചെന്നിത്തല ചൂണ്ടിക്കാണിച്ചത് അതിന് ഉദാഹരണമാണ്.
മുഖ്യമന്ത്രിയുടെ നിര്ദ്ദേശപ്രകാരമാണ് പൊലീസ് നിയന്ത്രണം ഏര്പ്പെടുത്തിയതെന്നും പൊലീസിന്റെ തേര്വാഴ്ചയ്ക്ക് സര്ക്കാര് കൂട്ടുനില്ക്കുകയാണ്. ചിത്തിരആട്ട വിശേഷത്തിന് ആര്.എസ്.എസ് പ്രവര്ത്തകര് സന്നിധാനത്ത് അഴിഞ്ഞാടിയപ്പോള് പൊലീസ് നോക്കുകുത്തിയായി നിന്നു. ഇപ്പോള് പൊലീസ് അതിക്രമം കാണിക്കുകയാണ്. ഇതെല്ലാം സര്ക്കാരിന്റെ ഒത്താശയോടെയാണ്. പ്രാഥമിക ആവശ്യങ്ങള്ക്ക് പോലും സൗകര്യം ഒരുക്കാതെയാണ് ഇതൊക്കെ സര്ക്കാര് ചെയ്യുന്നത്. വാവര് സ്വാമിയുടെ നടയില് ഭക്തര്ക്ക് കടക്കാനാവാത്ത വിധം ബാരിക്കേഡ് കൊണ്ട് മറ തീര്ത്തിരിക്കുന്നു. 70 ദിവസത്തെ തീര്ത്ഥാടനം കൂടുതല് ദുരുതപൂര്ണമാകുന്നു. ഓരോ ദിവസവും പ്രശ്നങ്ങള് കൂടുതല് സങ്കീര്ണമാവുകയാണ്.
https://www.facebook.com/Malayalivartha