സെന്കുമാറിന്റെ ഗവര്ണര് പദവിയ്ക്ക് കുരുക്കിട്ട് സർക്കാർ; ഇടതുപക്ഷ സർക്കാരിന്റെ കണ്ണിലെ കരടായിരുന്ന ടി.പി. സെന്കുമാറിനെ ഗവർണറാക്കുമെന്ന വാർത്തകൾ പുറത്ത് വന്നതിന് പിന്നാലെ നമ്പി നാരായണനെ ഇറക്കി പുതിയ ആരോപണം
ഇടതുപക്ഷ സർക്കാരിന്റെ കണ്ണിലെ കരടായിരുന്ന ടി.പി. സെന്കുമാറിനെ ഗവർണറാക്കുമെന്ന വാർത്തകൾ പുറത്ത് വന്നതിന് പിന്നാലെ പുതിയ കുരുക്കുമായി സംസ്ഥാന സര്ക്കാര്. ഐ.എസ്.ആര്.ഒ ചാരക്കേസില് നമ്ബി നാരായണനെ ദ്രോഹിക്കാന് സെന്കുമാര് ശ്രമിച്ചുവെന്ന് ആരോപിച്ചാണ് സംസ്ഥാന സര്ക്കാര് ഹൈക്കോടതിയില് സത്യവാങ്മൂലം സമര്പ്പിച്ചത്.
അഡ്മിനിസ്ട്രേറ്റീവ് ട്രൈബ്യൂണലിലെ തന്റെ നിയമനം സംസ്ഥാന സര്ക്കാര് മനപ്പൂര്വം വൈകിപ്പിച്ചുവെന്ന് ആരോപിച്ച് സെന്കുമാര് ഹൈക്കോടതിയില് സമര്പ്പിച്ച ഹര്ജിയിലാണ് സര്ക്കാര് സത്യവാങ്മൂലം നല്കിയത്. നിയമനങ്ങള്ക്ക് സെന്കുമാര് യോഗ്യനല്ലെന്നാണ് സര്ക്കാരിന്റെ നിലപാട്. തനിക്കെതിരായ ചാരക്കേസില് നഷ്ടപരിഹാരം ആവശ്യപ്പെട്ട് നമ്ബി നാരായണന് നല്കിയ പരാതിയില് ഏഴാം കക്ഷിയായി ചേര്ത്തിരിക്കുന്നത് സെന്കുമാറിനെയാണ്.
നായനാര് സര്ക്കാരിന്റെ കാലത്ത് സര്ക്കാര് ഉത്തരവ് പ്രകാരം നമ്ബി നാരായണനെതിരായ കേസ് പുനരന്വേഷിക്കാന് സെന്കുമാര് നിയോഗിക്കപ്പെട്ടു എന്നതാണ് സത്യം. കോടതിയുടെ ഉത്തരവോടെ കേസില് അന്വേഷണം തുടങ്ങിയെങ്കിലും സുപ്രീം കോടതി ഇടപെടലിനെ തുടര്ന്ന് അന്വേഷണം നിലച്ചു. കോടതിയെ തെറ്റിദ്ധരിപ്പിച്ച് തുടരന്വേഷണത്തിന് അനുമതി വാങ്ങിയത് സെന്കുമാറാണെന്ന വിചിത്ര വാദമാണ് സര്ക്കാര് ഉയര്ത്തുന്നത്. എന്നാല് സി.ബി.ഐ അന്വേഷിച്ച കേസ് തിരികെ വാങ്ങി പുനരന്വേഷിച്ചത് സര്ക്കാര് തീരുമാനമായിരുന്നുവെന്നാണ് സെന്കുമാര് പറയുന്നത്. നായനാര് സര്ക്കാര് ഉത്തരവിട്ടത് പ്രകാരമാണ് താന് ഐ.എസ്.ആര്.ഒ ചാരക്കേസ് അന്വേഷിച്ചതെന്നും ഇടതു സര്ക്കാരിന്റെ ഉത്തരവ് അംഗീകരിച്ചത് കുറ്റമാണോയെന്നും സെന്കുമാര് ചോദിക്കുന്നു.
ഉദ്യോഗസ്ഥനെന്ന നിലയില് സര്ക്കാര് ഉത്തരവ് അംഗീകരിക്കുകയാണ് ചെയ്തത്. തന്റെ പേരില് മുമ്ബ് ചുമത്തിയ കള്ളക്കേസുകള് പോലെ ഇതിനെയും നേരിടും. ഇപ്പോഴത്തെ കേസുകള്ക്കായി ചെലവഴിക്കുന്നത് സര്ക്കാര് ഫണ്ടാണോ എന്ന കാര്യം പരിശോധിക്കണമെന്നും അദ്ദേഹം ആവശ്യപ്പെട്ടു. തന്നെ പോലീസ് മേധാവി സ്ഥാനത്തുനിന്നു മാറ്റിയ നടപടിക്കെതിരേ സെന്കുമാര് സുപ്രീം കോടതിവരെ നിയമപോരാട്ടം നടത്തിയാണ് ഇടതുസര്ക്കാരിനെ മുട്ടുകുത്തിച്ചത്. സെന്കുമാര് വ്യാജരേഖയുണ്ടാക്കി നിയമനം നേടിയെന്ന അപ്പീല് ഹര്ജിയാകട്ടെ സുപ്രീം കോടതി പരിഗണിക്കുകപോലും ചെയ്യാതെ തള്ളി. സ്ഥാനമൊഴിഞ്ഞശേഷം അദ്ദേഹത്തെ കേന്ദ്ര അഡ്മിനിസ്ട്രേറ്റിവ് ട്രിബ്യൂണല് അംഗമായി നിയമിക്കാനുള്ള ഫയല് ഇതുവരെ സംസ്ഥാനസര്ക്കാര് ഗവര്ണര്ക്കു സമര്പ്പിച്ചിട്ടില്ല.
ബി.ജെ.പി. ദേശീയാധ്യക്ഷന് അമിത് ഷാ അടുത്തിടെ കേരളത്തിലെത്തിയപ്പോള് സെന്കുമാര് അദ്ദേഹത്തെ സന്ദര്ശിച്ചിരുന്നു. അന്നു ഷായെ സന്ദര്ശിച്ച പ്രമുഖരില് പലരും ബി.ജെ.പിയില് ചേര്ന്നെങ്കിലും സെന്കുമാര് അംഗത്വമെടുക്കാതിരുന്നത്, അദ്ദേഹത്തെ തേടിയെത്താനിരിക്കുന്ന പദവിക്കു മുന്നോടിയായാണെന്ന് അഭ്യൂഹമുയര്ന്നിരുന്നു. ശബരിമല വിവാദം മുന്നിര്ത്തി, വിവിധ മേഖലകളില്നിന്നു കൂടുതല് പ്രമുഖരെയും മറ്റു പാര്ട്ടി അണികളെയും ബി.ജെ.പിയിലേക്ക് ആകര്ഷിക്കാനുള്ള തന്ത്രങ്ങളാണ് അണിയറയില് ഒരുങ്ങുന്നത്.
കോണ്ഗ്രസ് നേതാവും തിരുവിതാംകൂര് ദേവസ്വം ബോര്ഡ് മുന് പ്രസിഡന്റുമായ ജി. രാമന് നായര്, ഐ.എസ്.ആര്.ഒ. മുന് ചെയര്മാന് ജി. മാധവന് നായര്, സംസ്ഥാന വനിതാ കമ്മിഷന് മുന് അംഗം ജെ. പ്രമീളാദേവി, മലങ്കര സഭാംഗം സി. തോമസ് ജോണ്, ജനതാദള് (എസ്) തിരുവനന്തപുരം ജില്ലാ വൈസ് പ്രസിഡന്റ് കരകുളം ദിവാകരന് എന്നിവര് അടുത്തിടെ ബി.ജെ.പിയില് ചേര്ന്നിരുന്നു. കഴിഞ്ഞവര്ഷം ബി.ജെ.പി. മുഖപത്രമായ "ജന്മഭൂമി"യുടെ പരിപാടിയില് പങ്കെടുത്തതോടെയാണു സെന്കുമാറിനെ കാവിക്കൂടാരത്തില് എത്തിക്കാനുള്ള നീക്കങ്ങള് ആരംഭിച്ചത്.
ശബരിമലയിലെ പോലീസ് നടപടികളെ സെന്കുമാര് നിശിതമായി വിമര്ശിച്ചത് ആര്.എസ്.എസ് ബന്ധമുള്ള ചാനലിലൂടെയായിരുന്നു. ശബരിമലയില് നിരോധനാജ്ഞ പ്രഖ്യാപിച്ചതു തെറ്റാണെന്നും തന്ത്രിയുടെ ചുമതല പോലീസ് ഏറ്റെടുക്കുകയാണെന്നുമാണ് അദ്ദേഹം ആരോപിച്ചത്. ശബരിമലയെക്കുറിച്ചു വ്യക്തമായ ധാരണയുള്ള നിരവധി ഉദ്യോഗസ്ഥര് പോലീസിലുണ്ടെന്നും അവരെ തനിക്കറിയാമെന്നും സെന്കുമാര് അഭിപ്രായപ്പെട്ടിരുന്നു.
പോലീസില് താക്കോല്സ്ഥാനത്തുള്ള ഒട്ടേറെ ഐ.പി.എസുകാര് സെന്കുമാറിന്റെ അടുപ്പക്കാരാണ്. സെന്കുമാറിനെ കേരളത്തില്തന്നെ ഗവര്ണറാക്കണമെന്നു ബി.ജെ.പിയിലെ ചില നേതാക്കള് ആവശ്യപ്പെടുന്നുണ്ട്. എന്നാല്, ഗവര്ണറാക്കുന്നയാള്ക്ക് അതേ സംസ്ഥാനത്തുതന്നെ നിയമനം നല്കുന്ന കീഴ്വഴക്കമില്ല. അങ്ങനെ ചെയ്യരുതെന്നു ഭരണഘടനയില് പറയുന്നുമില്ല.
https://www.facebook.com/Malayalivartha
