ശമ്പളമില്ല, ആനുകൂല്യമില്ല, കെ.എം.ഷാജി എം.എല്.എയ്ക്ക് പദവി മാത്രം, സമ്മേളനത്തില് പങ്കെടുക്കാം, അയോഗ്യനാക്കിയ ഹൈക്കോടതി വിധി സുപ്രീംകോടതി സ്റ്റേ ചെയ്തു, അന്തിമവിധി വരും വരെയാണ് ഉപാധികള്
കെ.എം. ഷാജി എം.എല്.എയെ അയോഗ്യനാക്കിയ ഹൈക്കോടതി വിധിക്ക് സുപ്രീംകോടതിയുടെ സ്റ്റേ. ഉപാധികളോടെയാണ് സ്റ്റേ അനുവദിച്ചത്. കേസില് അന്തിമവിധി വരും വരെ വോട്ടിംഗില് പങ്കെടുക്കാനാവില്ല, ശമ്പളം ഉള്പ്പെടെയുള്ള ആനുകൂല്യങ്ങള് കൈപ്പറ്റാവുകയുമില്ല. ജനപ്രാതിനിധ്യനിയമപ്രകാരം ഉള്ള ഉപാധികളാണിത്. ജനുവരിയില് കേസ് വീണ്ടും പരിഗണിക്കും.
നവംബര് ഒന്പതിനാണ് ഹൈക്കോടതി ഷാജിയെ ആറ് വര്ഷത്തേക്ക് അയോഗ്യനാക്കിയത്. സുപ്രീംകോടതിയില് അപ്പീല് നല്കാന് അന്ന് തന്നെ ഡിവിഷന് ബെഞ്ച് ഉത്തരവ് രണ്ടാഴ്ചത്തേക്ക് സ്റ്റേ ചെയ്തിരുന്നു. എന്നാല് കേസ് പെട്ടെന്ന് പരിഗണിക്കാനാവില്ലെന്നും എം.എല്.എ ആയി തുടരാമെന്ന് സുപ്രീംകോടതി വാക്കാല് പറയുകയും ചെയ്തു. വാക്കാല് പറയുന്നത് കണക്കിലെടുക്കില്ലെന്നും ഉത്തരവ് വേണമെന്നും സ്പീക്കര് നിലപാട് എടുത്തതോടെ ഷാജി വീണ്ടും വെട്ടിലായിരുന്നു.
സ്പീക്കറുടെ നിലപാടിനെ തുടര്ന്ന് കണ്ണൂര് അഴീക്കോട് എം.എല്.എയുടെ നിയമസഭാംഗത്വം ഇല്ലാതായിതായി നിയമസഭാ സെക്രട്ടറി തിങ്കളാഴ്ച അറിയിച്ചു. ഈമാസം 24 മുതല് അംഗത്വം നിലനില്ക്കില്ലെന്നായിരുന്നു അറിയിപ്പ്. ചൊവ്വാഴ്ച നിയമസഭാ സമ്മേളനം തുടങ്ങാനിരിക്കെയാണ് ഇടിത്തീ പോലെ നടപടി വന്നത്. ഷാജിക്ക് നിയമസഭാ നടപടിക്രമങ്ങളില് പങ്കെടുക്കാമെന്നും അലവന്സും മറ്റ് ആനുകൂല്യങ്ങളും ലഭിക്കില്ലെന്നും സുപ്രീംകോടതി വാക്കാല് പരാമര്ശനം നടത്തിയെങ്കിലും അത് പോരാ എന്ന നിലപാടിലായിരുന്നു സ്പീക്കര്. കോടതി ഉത്തരവില്ലാതെ നിയമസഭയില് പങ്കെടുക്കാനാവില്ലെന്നും സ്പീക്കര് പി.ശ്രീരാമകൃഷ്ണന് വ്യക്തമാക്കിയിരുന്നു. തുടര്ന്നാണ് ഷാജി ഇന്ന് സുപ്രീംകോടതിയെ സമീപിച്ചത്.
ഇത്തരം കേസുകളില് കോടതികള് പലപ്പോഴും പല നിലപാടുകളാണ് സ്വീകരിച്ചിട്ടുള്ളത്. അത് നിയമവിദഗ്ധരെ തന്നെ ആശയക്കുഴപ്പത്തിലാക്കിയിട്ടുണ്ട്. വര്ഗീയപ്രചരണം നടത്തി തെരഞ്ഞെടുപ്പില് വിജയിച്ചെന്ന് കണ്ടെത്തിയതിനെ തുടര്ന്നാണ് കെ.എം ഷാജിയെ ഹൈക്കോടതി ഈമാസം ഒന്പതിന് അയോഗ്യനാക്കിയത്. എതിര്സ്ഥാനാര്ത്ഥിയായ എം.വി നികേഷ് കുമാര് നല്കിയ പരാതിയിലായിരുന്നു തീരുമാനം.
കെ.എം ഷാജിയെ ആറ് വര്ഷത്തേക്കാണ് അയോഗ്യനാക്കിയത്. മുസ്്ലിംമായ തനിക്ക് വോട്ട് ചെയ്യണമെന്നും അമുസ്്ലിമായ നികേഷിന് വോട്ട് ചെയ്യരുതെന്നും കാട്ടി മുസ്്ലിംവീടുകളില് ലഘുലേഖകള് വിതരണം ചെയ്തിരുന്നു. ഇതിന്റെ പകര്പ്പ് സഹിതമാണ് നികേഷ്കുമാര് പരാതി നല്കിയത്. അതേസമയം പരാതിക്കാരനായ തന്നെ വിജയിയാക്കി പ്രഖ്യാപിക്കണമെന്ന നികേഷിന്റെ ആവശ്യം ഹൈക്കോടതി അംഗീകരിച്ചില്ല.
https://www.facebook.com/Malayalivartha
