ശബരിമല നിരോധനാജ്ഞ പിന്‍വലിക്കണമെന്നാവശ്യപ്പെട്ട് നിയമസഭയ്ക്കകത്ത് പ്രതിപക്ഷത്തിന്റെ പ്രതിഷേധം. വെള്ളപ്പൊക്ക ദുരിതവുമായി ബന്ധപ്പെട്ട മുഖ്യമന്ത്രി നടത്തിയ പ്രസംഗം തടസ്സപ്പെടുത്തി പ്രതിപക്ഷം നടുത്തളത്തിലിറങ്ങി. പ്ലക്കാര്‍ഡുകളും ബാനറുകളുമായാണ് പ്രതിപക്ഷം സമ്മേളനത്തിനെത്തിയത്. അതേസമയം ശബരിമല യുവതീപ്രവേശന വിഷയത്തിൽ കറുപ്പ്​ വസ്​ത്രമണിഞ്ഞ്​ പ്രതിഷേധിച്ച്​ പൂഞ്ഞാർ എം.എൽ.എ പി.സി ജോർജ്​.

കറുപ്പ്​ ഷർട്ടും തോളിൽ കറുത്ത ഷാളും അണിഞ്ഞാണ്​ അദ്ദേഹം നിയമസഭയിൽ എത്തിയത്​. ശബരിമല ഭക്തർക്ക്​ പിന്തുണ പ്രഖ്യാപിച്ചാണ്​ കറുപ്പ്​ വസ്​ത്രം ധരിച്ചത്​. ഇന്നുമാത്രമാണ്​ കറുത്ത വേഷത്തിൽ പ്രതിഷേധിക്കുക. നാളെ മുതൽ എന്തുവേണമെന്ന്​ പാർട്ടി യോഗം ചേർന്ന്​ തീരുമാനിക്കുമെന്നും പി.സി ജോർജ്​ പറഞ്ഞു. ശബരിമല വിഷയത്തിൽ ബി.ജെ.പിയെ പിന്തുണക്കുന്നു. കേരള ജനപക്ഷ പാർട്ടിയെ പിന്തുണക്കുന്ന ആരുമായും സഹകരിക്കും. എല്ലാവരും വർഗീയത പറയുന്നുണ്ട്​, ബി.ജെ.പിയെ മാത്രം വർഗീയ പാർട്ടിയെന്ന്​ പറയുന്നതി​ന്റെ അർഥമെന്താണ്​.

സംസ്ഥാനത്ത്​ എൽ.ഡി.എഫും യു.ഡി.എഫും മാറിമാറി ഭരിച്ചുകൊണ്ടിരിക്കയാണ്​. കേരളത്തിൽ മാറ്റം വരണം. പൂഞ്ഞാറിൽ എല്ലാ പാർട്ടികൾക്കും എതിരെ 20000ലധികം വോട്ടുകൾക്ക്​ വിജയിച്ച വ്യക്തിയാണ്​ താൻ. അത്​ സംസ്ഥാനത്തിലെ എല്ലാ മണ്ഡലങ്ങളിലും നടപ്പാകണമെന്നാണ്​ തന്റെ ആഗ്രഹ​മെന്നും പി.സി ജോർജ്​ കൂട്ടിച്ചേർത്തു. ബി.ജെ.പിയുമായി സഹകരിച്ചു മുന്നോട്ടുപോകുമെന്ന് കഴിഞ്ഞ ദിവസം വാർത്താസമ്മേളനത്തിൽ പി.സി ജോർജ്​ വ്യക്തമാക്കിയിരുന്നു. ന‌ിയമസഭയിൽ ഒ.രാജഗോപാലിനൊപ്പം പ്രത്യേക ബ്ലോക്കായി ഇരിക്കാനാണ് തീരുമാനം.