സംസ്ഥാനത്ത് വീണ്ടും ഷിഗെല്ല മരണം. കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന ഏഴ് വയസുകാരൻ മരിച്ചു. മലപ്പുറം പൂക്കോട്ടൂർ സ്വദേശിയാണ് മരിച്ചത്. ഈ വർഷം നാലാമത്തെ ഷിഗെല്ല മരണമാണിത്.

സംസ്ഥാനത്ത് ഷിഗെല്ല കേസുകൾ വർദ്ധിക്കുന്നു. ജനുവരി മുതൽ 135 ആളുകൾക്കാണ് സംസ്ഥാനത്ത് ഇതുവരെ ഷിഗെല്ലെ സ്ഥിരീകരിച്ചത്. ഇതിൽ 68 കേസുകളും കോഴിക്കോട് ജില്ലയിലാണ്.

നിലവിൽ മെഡിക്കൽ കോളേജിൽ ചികിത്സയിലുള്ള ഒരു വയസുകാരൻറെയും ആരോഗ്യനില ഗുരുതരമായി തുടരുന്നു. അതിനിടെ ഷിഗെല്ലെ സാന്നിധ്യം കണ്ടെത്തിയതിനെ തുടർന്ന് മലപ്പുറം തിരൂരങ്ങാടിയിൽ ഇളനീർ പാർലർ അടപ്പിക്കുകയും ചെയ്തു.

രണ്ടാഴ്ച മുമ്പ് ഭക്ഷ്യ സുരക്ഷാ വകുപ്പിൻറെ സ്പെഷ്യൽ സ്ക്വാഡ് കടയിൽ നിന്നും ശേഖരിച്ച വെള്ളത്തിൻറെ സാമ്പിളിലാണ് ബാക്ടീരയുടെ സാന്നിധ്യം കണ്ടെത്തിയത്. ഷിഗെല്ല മരണം റിപ്പോർട്ട് ചെയ്യപ്പെട്ട സാഹചര്യത്തിൽ മലപ്പുറം ജില്ലയിൽ കർശന പരിശോധന തുടരുമെന്ന് ഭക്ഷ്യ സുരക്ഷാ വകുപ്പ്.