വീണ്ടും എച്ച് വണ്‍ എന്‍ വണ്‍ രോഗ ഭീഷണി. ഒരു യുവതി കൂടി മരണത്തിന് കീഴടങ്ങി. കിളിമാനൂരില്‍ നഗരൂര്‍ തണ്ണിക്കോണം വിളയില്‍ക്കട ലില്ലി നിവാസില്‍ ലില്ലിയുടെ മകള്‍ സന്ധ്യ (28) യാണ് മരിച്ചത്.ഇതോടെ കഴിഞ്ഞ പത്ത് ദിവസത്തിനിടയില്‍ രോഗബാധയെ തുടര്‍ന്ന് മേഖലയില്‍ മരിച്ചവരുടെ എണ്ണം മൂന്നായി. ഇപ്പോഴും നിരവധി പേര്‍ ചികിത്സയിലാണ്. ആറ് ദിവസങ്ങള്‍ക്ക് മുമ്പ് പനി ബാധയെ തുടര്‍ന്ന് കേശവപുരം കമ്യൂണിറ്റി ഹെല്‍ത്ത് സെന്ററില്‍ ചികിത്സ ക്കെത്തിയ സന്ധ്യയെ വിദഗ്ധ ചികിത്സക്കായി മെഡിക്കല്‍ കോളേജ് ആശുപത്രിയിലേക്ക് അയച്ചു.
എന്നാല്‍ സാമ്പത്തിക ബുദ്ധിമുട്ടുകാരണം ഇവര്‍ മെഡിക്കല്‍ കോളേജില്‍ പോയില്ല. വെള്ളിയാഴ്ച വീണ്ടും പനി കലശലായതിനെ തുടര്‍ന്ന് ആറ്റിങ്ങല്‍ വലിയകുന്ന് താലൂക്ക് ആശുപത്രിയില്‍ എത്തി. അവിടെനിന്നും തിരുവനന്തപുരം മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും വൈകുന്നേരം അഞ്ചുമണിയോടെ മരിച്ചു. ശനിയാഴ്ച ഉച്ചയോടെ വീട്ടിലെത്തിച്ച മൃതദേഹം സംസ്‌കരിച്ചു. ഡി. എം.ഒ യുടെ നേതൃത്വത്തില്‍ ആരോഗ്യപ്രവര്‍ത്തകരും, പഞ്ചായത്ത് പ്രസിഡന്റ് രഘുവിന്റെ നേതൃത്വത്തില്‍ പഞ്ചായത്തംഗങ്ങളും വീട്ടിലെത്തി. സന്ധ്യയുടെ ഭര്‍ത്താവ് മടവൂര്‍ പുലിയൂര്‍ക്കോണം സ്വദേശി അരുണ്‍കുമാര്‍ രണ്ട് വര്‍ഷം മുമ്പ് വിവാഹ ബന്ധം വേര്‍പെടുത്തി ഉപേക്ഷിച്ചിരുന്നു. മക്കളായ അര്‍ച്ചന മൂന്നിലും ആദിത്യ ഒന്നിലും പഠിക്കുകയാണ്.