സംഘടനയുടെ ബൈലോയിലെ ഏതെല്ലാം വ്യവസ്ഥകള്‍ ലംഘിച്ചു എന്ന് വ്യക്തമാക്കണം; കാരണം കാണിക്കല് നോട്ടീസിനു രാത്രി തന്നെ മറുപടിയുമായി നടി
താരസംഘടന 'അമ്മ' തനിക്കയച്ച കാരണം കാണിക്കല് നോട്ടീസില്‍ മറുപടിയുമായി അന്‍സിബ ഹസ്സന്‍. കാരണം കാണിക്കല് നോട്ടീസില്‍ വ്യക്തത വരുത്തണമെന്നും സംഘടന ചട്ടങ്ങള്‍ക്ക് വിരുദ്ധമായി താന്‍ എന്തു ചെയ്തുവെന്നും അന്‍സിബ ചോദിക്കുന്നു.
മറുപടി നല്‍കാന്‍ ഒരാഴ്ച സമയമുണ്ടായിരുന്നു എങ്കിലും രാത്രി തന്നെ നോട്ടീസിനു മറുപടി നല്‍കി അന്‍സിബ ഹസന്‍. സംഘടനയുടെ ബൈലോയിലെ ഏതെല്ലാം വ്യവസ്ഥകള്‍ ലംഘിച്ചു എന്ന് വ്യക്തമാക്കണം എന്ന് മറുപടിയില്‍ അന്‍സിബ ആവശ്യപ്പെട്ടിട്ടുണ്ട്
ലക്ഷ്മിപ്രിയയും ടിനി ടോമും ആയുള്ള വിഷയങ്ങള്‍ വ്യക്തിപരമാണ്. 'അമ്മ'യുടെ പ്രസിഡന്റ് ശ്വേത മേനോന്‍ തന്നെ ഇക്കാര്യം വ്യക്തമാക്കിയിട്ടുള്ളതാണെന്നും അന്‍സിബ പറഞ്ഞു. ടിനി ടോമിന്റെ നടപടികളില്‍ അമ്മ ഒരു നിലപാടും സ്വീകരിച്ചില്ല. ഈ സാഹചര്യത്തിലാണ് നേരിട്ട് നടപടികള്‍ തുടങ്ങാന്‍ നിര്‍ബന്ധിതയായതെന്നും അന്‍സിബ വ്യക്തമാക്കി,
ടിനി ടോമിനെതിരെ അന്‍സിബ നല്‍കിയ പരാതിയില്‍ പൊലീസ് അന്വേഷണവും നടക്കുന്നുണ്ട്. അതേസമയം, അന്‍സിബയുടെ മറുപടിയോടെ 'അമ്മ'യിലെ വിഷയങ്ങള്‍ തുടരും എന്ന് ഉറപ്പാണ്.
മാധ്യമങ്ങളിലൂടെയും സോഷ്യല്‍ മീഡിയയിലൂടെയും സംഘടനയ്‌ക്കെതിരെ നിരന്തരം പരസ്യ പ്രസ്താവനകള്‍ നടത്തി 'അമ്മ'യെ തകര്‍ക്കാന്‍ ശ്രമിച്ചെന്ന ഗുരുതരമായ ആരോപണത്തിന്മേലാണ് നടിക്ക് കാരണം കാണിക്കല് നോട്ടീസ് നല്‍കിയത് സംഘടനയ്ക്കുള്ളില്‍ ചര്‍ച്ച ചെയ്ത് രമ്യമായി പരിഹരിക്കാമായിരുന്ന ആഭ്യന്തര പ്രശ്‌നങ്ങളെ തെരുവിലേക്ക് വലിച്ചിഴച്ച് സംഘടനയ്ക്ക് വലിയ രീതിയില്‍ കളങ്കമുണ്ടാക്കിയെന്നാണ് ഭാരവാഹികളുടെ വിലയിരുത്തല്‍.
നടി ലക്ഷ്മിപ്രിയ, നടന്‍ ടിനി ടോം എന്നിവരുമായി ബന്ധപ്പെട്ട കടുത്ത നിയമപോരാട്ടങ്ങള്‍ക്കിടയിലാണ് അന്‍സിബയ്ക്ക് താരസംഘടനയില്‍ നിന്നും ഇപ്പോള്‍ പുതിയ തിരിച്ചടി നേരിട്ടിരിക്കുന്നത്. ലക്ഷ്മിപ്രിയയ്ക്കും തൃപ്പൂണിത്തുറ വനിതാ സ്‌റ്റേഷനിലെ എസ്‌ഐക്കുമെതിരെ താന്‍ നല്‍കിയ പരാതിയില്‍ കഴമ്പില്ലെന്ന പോലീസിന്റെ അന്തിമ റിപ്പോര്‍ട്ടിനെതിരെ അന്‍സിബ കടുത്ത പ്രതിഷേധവുമായി രംഗത്തെത്തിയിരുന്നു.
സ്‌റ്റേഷനില്‍ തന്നെ നിയമവിരുദ്ധമായി തടഞ്ഞുവെച്ച് മാനസികമായി പീഡിപ്പിച്ചെന്ന പരാതിയില്‍ കേസെടുക്കാനാവില്ലെന്ന എസിപിയുടെ കണ്ടെത്തല്‍ പൂര്‍ണ്ണമായി തള്ളിക്കളഞ്ഞ നടി, നീതിക്കായി കോടതിയെ സമീപിക്കുമെന്ന് വ്യക്തമാക്കിയിട്ടുണ്ട്. ഇതിനുപുറമേ, തനിക്കെതിരെ വര്‍ഗീയ പരാമര്‍ശങ്ങളും അധിക്ഷേപങ്ങളും നടത്തിയെന്ന് കാട്ടി നടന്‍ ടിനി ടോമിനെതിരെ കടവന്ത്ര പോലീസില്‍ നല്‍കിയ പരാതിയുമായും നടി മുന്നോട്ടുപോവുകയാണ്. പോലീസുമായുള്ള ഭിന്നതയും സഹപ്രവര്‍ത്തകര്‍ക്കെതിരെയുള്ള കേസുകളും നിലനില്‍ക്കുന്ന സാഹചര്യത്തിലാണ് 'അമ്മ'യില്‍ നിന്നുകൂടി താരത്തിന് തിരിച്ചടി നേരിട്ടിരിക്കുന്നത്.
https://www.facebook.com/Malayalivartha
