ശബരിമലയില് ഭരണഘടനാ ധാര്മ്മികത ചൂണ്ടിക്കാട്ടിയുള്ള സുപ്രീംകോടതി ഇടപെടലിനെ രൂക്ഷമായി വിമര്ശിച്ച് അറ്റോര്ണി ജനറല്
അറ്റോര്ണി ജനറല് കെ.കെ.വേണുഗോപാല്, ശബരിമല പോലുള്ള വിഷയങ്ങളില് ഭരണഘടനാ ധാര്മ്മികത ചൂണ്ടിക്കാട്ടിയുള്ള സുപ്രീംകോടതി ഇടപെടലിനെ രൂക്ഷമായി വിമര്ശിച്ചു.
ഇന്ത്യയിലെ പരമോന്നത കോടതി സ്വയം പ്രയോഗിക്കുന്നത്, ലോകത്തെ ഒരു സുപ്രീംകോടതിയും പ്രയോഗിക്കാത്ത വലിയ അധികാരമാണെന്ന് ഒരു പ്രഭാഷണത്തില് അറ്റോര്ണി ജനറല് പറഞ്ഞു. കോടതി ഇടപെട്ടില്ലെങ്കിലും രാജ്യം നശിക്കില്ല. അക്ഷരാഭ്യാസം ഇല്ലാത്തവര്ക്കു പോലും തങ്ങള്ക്ക് നല്ലത് ഏതാണെന്ന് അറിയാമെന്നും അദ്ദേഹം അഭിപ്രായപ്പെട്ടു.
സുപ്രീംകോടതിക്ക് ഭരണഘടനയുടെ 142-ാം അനുച്ഛേദം നല്കുന്ന അധികാരം അനിയന്ത്രിതമാണെന്ന് വ്യാഖ്യാനിക്കരുതെന്നും അദ്ദേഹം ഓര്മ്മിപ്പിച്ചു. ശബരിമലയില് സ്ത്രീകള്ക്ക് കയറാമെന്ന് ഭരണഘടനാ ധാര്മ്മികതയിലൂന്നി ഒരു വിധി പറയുന്നു. വിയോജനവിധിയും ഭരണഘടനാ ധാര്മ്മികതയെ തന്നെ ആശ്രയിക്കുന്നു. വലിയ മുറിവുകളുണ്ടാക്കാന് ഇടയാക്കുമെന്നതിനാല് ഭരണഘടനാ ധാര്മ്മികത അപകടകരമായ ആയുധമാണെന്നും അറ്റോര്ണി ജനറല് പറഞ്ഞു.
കഴിഞ്ഞ സെപ്റ്റംബര് 28-ന് ചീഫ് ജസ്റ്റിസ് ദീപക് മിശ്ര അധ്യക്ഷനായ അഞ്ചംഗ ബെഞ്ച് 4:1 വിധിയാണ് പ്രസ്താവിച്ചത്. യുവതീ പ്രവേശത്തെ അനുകൂലിക്കാതിരുന്ന ജസ്റ്റിസ് ഇന്ദു മല്ഹോത്രയുടെ വിധി യാഥാര്ഥ്യത്തിലേക്കു വെളിച്ചം വീശുന്നതാണെന്നും ജെ. ദാദചന്ജി സ്മാരക സംവാദത്തില് വേണുഗോപാല് പറഞ്ഞു. ഓരോ വ്യക്തിക്കും വിശ്വാസപരമായ അവകാശമുണ്ടെന്നും അതില് മറ്റാര്ക്കും, കോടതിക്കുള്പ്പെടെ, ഇടപെടാനാവില്ലെന്നുമാണ് ഭരണഘടനാപരമായ ധാര്മികത ആവശ്യപ്പെടുന്നതെന്ന് ജസ്റ്റിസ് ഇന്ദു മല്ഹോത്രയുടെ വിധിയില് പറയുന്നു.
വിശ്വാസപരമായ കാര്യങ്ങളില് കോടതിക്ക് ഇടപെടാനാവില്ല. അതേസമയം, മറ്റു ജഡ്ജിമാര് അവരുടെ തീരുമാനത്തെ ഭരണഘടനാപരമായ ധാര്മികതിയിലൂന്നി സമത്വത്തിന്റെ പ്രശ്നമായി ന്യായീകരിക്കുന്നു. നിയമത്തിനു മുന്നില് സമത്വമെന്നത് ഏതു വിഭാഗത്തില് പെട്ട സ്ത്രീയെയും വേര്തിരിക്കാതെ ഒന്നായി കാണുന്നതാണ്.
ഇങ്ങനെ പരമോന്നത നീതിപീഠത്തിലെ ഒരേ ബെഞ്ച് ഭരണഘടനയുടെ ധാര്മികതയെ തികച്ചും വ്യത്യസ്തമായ വിധം വ്യാഖ്യാനിച്ചു വിധി പറയുന്നത് അപകടകരമാണ്. ഈ ആശയ ഭിന്നത വരുംനാളുകളില് കൂടുതല് സംഘര്ഷത്തിലേക്കു നീങ്ങിയേക്കാം. സുപ്രീം കോടതിക്ക് നിയമം നിര്മിക്കാനാവില്ല. നിയമനിര്മാണസഭകളുടെ അധികാരം പ്രയോഗിക്കാന് സുപ്രീംകോടതി ശ്രമിക്കുന്നത് ഭരണഘടനയുടെ പരമാധികാരം സ്ഥാപിക്കലല്ല, മറിച്ച് സുപ്രീം കോടതിയുടെ പരമാധികാരം സ്ഥാപിക്കലാണ്. ഇത് അനുവദിക്കാനാവുന്നതല്ല അറ്റോര്ണി ജനറല് പറഞ്ഞു.
https://www.facebook.com/Malayalivartha
