ഹയര്‍ സെക്കന്‍ഡറി , എസ്.എസ്.എല്‍.സി, പരീക്ഷകള്‍ ഒരുമിച്ച് നടത്താനുള്ള ശ്രമം പൊതുവിദ്യാഭ്യാസവകുപ്പ് ഉപേക്ഷിച്ചേക്കും. 14 ലക്ഷത്തിലധികം വിദ്യാര്‍ഥികള്‍ക്ക് ഒരേസമയം പരീക്ഷ നടത്തുന്നത് സങ്കീര്‍ണതകള്‍ക്ക് വഴിവെക്കുമെന്ന വിലയിരുത്തലിലാണ് വകുപ്പ്. പരീക്ഷണാര്‍ഥം അര്‍ധവാര്‍ഷിക പരീക്ഷ ഒരുമിച്ച് നടത്താന്‍ നേരത്തേ തീരുമാനിച്ചിരുന്നെങ്കിലും പിന്നീട് നീക്കം ഉപേക്ഷിച്ചു. ഫെബ്രുവരിയില്‍ മോഡല്‍ പരീക്ഷകള്‍ ഒന്നിച്ചുനടത്താന്‍ ആലോചിച്ചിരുന്നെങ്കിലും ഇപ്പോള്‍ അക്കാര്യവും പരിഗണനയിലില്ല.
നേരത്തേ പൊതുവിദ്യാഭ്യാസ ഡയറക്ടറുടെ അധ്യക്ഷതയില്‍ ചേര്‍ന്ന ക്യു.ഐ.പി യോഗമാണ് വേനല്‍ക്കാല ചൂട് പരിഗണിച്ച് എസ്.എസ്.എല്‍.സി പരീക്ഷ രാവിലെ നടത്താന്‍ ശിപാര്‍ശ ചെയ്തത്. ഇക്കാര്യത്തില്‍ സര്‍ക്കാര്‍ തീരുമാനമെടുത്തിരുന്നില്ല. നിലവില്‍ ഹയര്‍ സെക്കന്‍ഡറി, വി.എച്ച്.എസ്.ഇ പരീക്ഷകള്‍ രാവിലെയും എസ്.എസ്.എല്‍.സി പരീക്ഷ ഉച്ചക്കുശേഷവുമാണ് നടത്തുന്നത്. ഇവ ഒന്നിച്ച് രാവിലെ നടത്താനായിരുന്നു ശ്രമം.
കഴിഞ്ഞവര്‍ഷം 4,41,103 പേര്‍ എസ്.എസ്.എല്‍.സി പരീക്ഷയും 9,25,580 കുട്ടികള്‍ ഹയര്‍ സെക്കന്‍ഡറി പരീക്ഷയും 58,688 പേര്‍ വി.എച്ച്.എസ്.ഇ പരീക്ഷയും എഴുതിയിരുന്നു. ഇത്രയും വിദ്യാര്‍ഥികള്‍ക്ക് ഒന്നിച്ച് പരീക്ഷാസൗകര്യം ഒരുക്കുന്നതാണ് പ്രധാന വെല്ലുവിളി. മാര്‍ച്ച് ആറ് മുതല്‍ 27വരെ രാവിലെ നടക്കുന്നരീതിയില്‍ ഹയര്‍ സെക്കന്‍ഡറി പരീക്ഷയുടെ വിജ്ഞാപനം പ്രസിദ്ധീകരിച്ചിട്ടുണ്ട്. പ്രളയകാലത്തെ അധ്യയനനഷ്ടം നികത്തുന്നതുകൂടി പരിഗണിച്ച് എസ്.എസ്.എല്‍.സി പരീക്ഷ മാര്‍ച്ച് 13 മുതല്‍ 27വരെയാണ് നടത്താന്‍ നിശ്ചയിച്ചത്.

ഉച്ചക്കുശേഷം നടത്തുന്ന രീതിയിലാണ് ടൈംടേബിള്‍ ക്രമീകരിച്ചതെങ്കിലും സര്‍ക്കാര്‍ ഉത്തരവുകള്‍ക്കനുസൃതമായി സമയത്തില്‍ മാറ്റമുണ്ടാകാമെന്ന് വിജ്ഞാപനത്തില്‍ വ്യക്തമാക്കിയിട്ടുണ്ട്. ഒരുമിച്ച് നടത്തുന്നെങ്കില്‍ ഈ പരീക്ഷകളുടെ ടൈംടേബിള്‍ പുനഃക്രമീകരിക്കേണ്ടിവരും. പരീക്ഷണത്തിന് മുതിരുന്നത് കൈവിട്ട കളിയാകുമെന്ന ഭയം വിദ്യാഭ്യാസവകുപ്പിനുണ്ട്.

എസ്.എസ്.എല്‍.സി വിദ്യാര്‍ഥികള്‍ക്ക് ഒമ്പത് പരീക്ഷദിനങ്ങളിലും ഇരിപ്പിടം മാറ്റമില്ലാതെ തുടരാം. എന്നാല്‍, സയന്‍സ്, കൊമേഴ്‌സ്, ഹ്യുമാനിറ്റീസ് സ്ട്രീമുകളില്‍ 24 വിഷയ കോമ്പിനേഷനുകളിലുള്ള ഹയര്‍ സെക്കന്‍ഡറിക്കാര്‍ക്ക് എസ്.എസ്.എല്‍.സിക്കാര്‍ക്ക് ഒപ്പം ഇരിപ്പിടം ഒരുക്കല്‍ ശ്രമകരമായിരിക്കും. എസ്.എസ്.എല്‍.സിയുടെയും ഹയര്‍ സെക്കന്‍ഡറിയുടെയും പരീക്ഷ സമയദൈര്‍ഘ്യം വ്യത്യസ്തമാണ്. ഒരുമിച്ച് തുടങ്ങുന്ന പരീക്ഷകള്‍ വ്യത്യസ്ത സമയങ്ങളിലാണ് അവസാനിക്കുക. ഇത് പരീക്ഷാ ഹാളില്‍ ആശയക്കുഴപ്പവും സങ്കീര്‍ണതയും സൃഷ്ടിക്കും.