24 മണിക്കൂറിലധികമായി കോതമംഗലം പള്ളിക്ക് മുന്നില് കാറിലിരിക്കുന്ന തോമസ് പോളിനെ പള്ളിയില് കയറ്റാമെന്നും ഓര്ത്തഡോക്സ് വിഭാഗം പുരോഹിതനായ റമ്പാന് തോമസ് പോളിനെ കയറ്റില്ലെന്നും യാക്കോബായസഭയുടെ കട്ടായം
ഓര്ത്തഡോക്സ് റമ്പാന് തോമസ് പോളിന് യാക്കോബായ സഭ വക പണി പാഴ്സലായി. തോമസ് പോളിനെ കോതമംഗലം ചെറിയ പള്ളിയില് കയറ്റാമെന്നും എന്നാല് റമ്പാന് തോമസ് പോളിന് പ്രവേശനമില്ലെന്നും യാക്കോബായ വിഭാഗം അറിയിച്ചു. 24 മണിക്കൂറിലധികമായി പള്ളിക്ക് മുന്നില് കാറിലിരിക്കുകയാണ് റമ്പാന് തോമസ് പോള്.
ഓര്ത്തഡോക്സ് വിഭാഗം പുരോഹിതനായി തോമസ് പോളിനെ കയറ്റില്ലെന്ന് കട്ടായം പിടിക്കുകയാണ് യാക്കോബായ നേതൃത്വം. തോമസ് പോളിനെ മാമോദീസ മുക്കിയ പള്ളിയാണ് കോതമംഗലം ചെറിയപള്ളി. തര്ക്കങ്ങളെ തുടര്ന്നാണ് അദ്ദേഹം അവിടെ പ്രവേശിക്കാതിരുന്നത്. എന്നാല് 2017ലെ സുപ്രീംകോടതി ഉത്തരവിനെ തുടര്ന്ന് ശിശ്രൂഷകള് നിര്വഹിക്കാനാണ് താന് എത്തിയതെന്ന് തോമസ് പോള് റമ്പാന് പറഞ്ഞു.
കോടതിവിധികളല്ല വിശ്വാം സംരക്ഷിക്കുകയാണ് പ്രധാനമെന്ന് യാക്കോബായ വിഭാഗം മാധ്യമങ്ങളോട് പറഞ്ഞു. മലബാര് ഭദ്രാസനത്തിലെ പള്ളിത്തര്ക്കം പരിഹസിച്ചത് പോലെ സമവായ ചര്ച്ചകള്ക്ക് തയ്യാറാണെന്നും യാക്കോബായ നേതൃത്വം അറിയിച്ചു. എന്നാല് സുപ്രീംകോടതി വിധി നടപ്പാക്കാതെ മടങ്ങില്ലെന്ന ഉറച്ചനിലപാടിലാണ് തോമസ് പോള് റമ്പാന്. റമ്പാനും നാല് ഓര്ത്തഡോക്സ് വിശ്വാസികളും വന്ന കാറിന് മുന്നില് നൂറുകണക്കിന് വിശ്വാസികളാണ് തടിച്ച് കൂടിയിരിക്കുന്നത്. റമ്പാന് കാറില് നിന്ന് ഇറങ്ങിയാല് വിശ്വാസികള് പാഞ്ഞടുക്കും. ഒരു ദിവസം പിന്നിടുമ്പോഴും ഇരുവിഭാഗവും വിട്ട് വീഴ്ചയ്ക്ക തയ്യാറായിട്ടില്ല. അതിനിടെയാണ് തോമസ് പോളിന് കയറാമെന്ന തന്ത്രം യാക്കോബായ സഭ മുന്നോട്ട് വെച്ചത്. അത് അംഗീകരിക്കാന് അദ്ദേഹം തയ്യാറല്ല.
ഇരുസഭകളും തമ്മിലുള്ള തര്ക്കം തെരുവിലേക്ക് വ്യാപിച്ചതോടെ ക്രമസമാധാന പ്രശ്നമായി മാറിയിരിക്കുകയാണ്. കോടതി വിധി നടപ്പാക്കണമെന്ന് ഓര്ത്തഡോക്സ് വിഭാഗവും സമവായ ചര്ച്ച വേണമെന്ന് യാക്കോബായ വിഭാഗവും ആവശ്യപ്പെടുന്നു. തങ്ങളുടെ വസ്തുവകകള് ആര്ക്കും വിട്ട് കൊടുക്കില്ലെന്നും ഓര്ത്തഡോക്സ് സഭ കയ്യേറാന് വന്നിരിക്കുകയാണെന്നും തോമസ് പ്രഥമന് കാതോലിക്കബാവ കഴിഞ്ഞ ദിവസം വ്യക്തമാക്കിയിരുന്നു. ഇത് വിശ്വാസികള്ക്ക് വലിയ ആവേശമായി. വ്യാഴാഴ്ച രാവിലെ എത്തിയ റമ്പാന് പ്രതിഷേധം കാരണം മടങ്ങിയപ്പോള് വിശ്വാസികള് പിരിഞ്ഞ് പോകരുതെന്നും റമ്പാന് മടങ്ങിവരുമെന്നും യാക്കോബായ പുരോഹിതന്മാര് മൈക്കിലൂടെ അറിയിച്ചു. അതോടെയാണ് വിശ്വാസികള് പള്ളിയിലും പരിസരത്തും തമ്പടിച്ചത്.
വിശ്വാസി സമൂഹം തനിക്കൊപ്പം ഉണ്ടെന്നും പൊലീസാണ് തന്നെ പള്ളിയില് പ്രവേശിപ്പിക്കാത്തതെന്നും റമ്പാന് ആരോപിക്കുന്നു. രണ്ടായിരത്തിലധികം വിശ്വാസികളുള്ള കോതമംഗലം വലിയപള്ളിയില് ഭൂരിപക്ഷവും യാക്കോബായ വിഭാഗമാണ്. കോടതിവിധി നടപ്പാക്കിയാലും അവര്ക്ക് അവിടെ ആരാധന തുടരാമെന്ന് ഓര്ത്തഡോക്സ് വിഭാഗം പറയുന്നുണ്ടെങ്കിലും ഇരുസഭകളുടെയും ആരാധനക്രമത്തില് അടിസ്ഥാനപരമായി വ്യത്യാസമുണ്ടെന്നാണ് യാക്കോബായ പുരോഹിതനായ സീബ പറയുന്നത്. എന്നാലത് തെറ്റാണെന്ന് ഓര്ത്തഡോക്സ് പുരോഹിതന് എം.ഒ ജോണ് പറയുന്നു.
https://www.facebook.com/Malayalivartha
