പൊതുമുതല് നശിപ്പിച്ചാല് ഇനി പിടിവീഴും: അക്കൗണ്ടില് നിന്നോ സ്വത്ത് വകകളില് നിന്നോ പണം പിടിക്കാന് തീരുമാനം
ഹര്ത്താലില് പൊതുമുതല് നശിപ്പിക്കുന്നത് പതിവു കാഴ്ചയാണ്. ഓരോ ഹര്ത്താലുകള് കഴിയുമ്പോഴും ഉണ്ടാകുന്നത് കോടികളുടെ നഷ്ടമാണ്. ഇതോടെ സര്ക്കാര് കര്ശന നിലപാട് സ്വീകരിച്ചിരിക്കുകയാണ്. ഏതെങ്കിലും തരത്തില് ആക്രമണം അഴിച്ചു വിടുകയോ പൊതുമുതല് നശിപ്പിക്കുകയോ ചെയ്യുന്നവര്ക്ക് പിടിവീഴും. പൊതുമുതല് നശിപ്പിക്കുന്നവരുടെ കയ്യില് നിന്ന് നഷ്ടത്തിന് തുല്യമായ തുക അക്കൗണ്ടില് നിന്നോ, സ്വത്തു വകകളില് നിന്നോ ഈടാക്കും. അതിനാല് കണ്ണില്കാണുന്നതെല്ലാം അടിച്ചു തകര്ക്കുന്നതിനു മുന്പ് ഹര്ത്താല് അനുകൂലികള് ഇതിനേക്കുറിച്ച് ചിന്തിക്കേണ്ടതാണ്.
ജനജീവിതം സാധാരണ രീതിയിലാക്കുന്നതിന് എല്ലാ നടപടികളും സ്വീകരിക്കുന്നതിന് ജില്ലാ പൊലീസ് മേധാവിമാര്ക്കു നിര്ദേശം നല്കിയിട്ടുണ്ട്. അക്രമത്തിനു മുതിരുകയോ നിര്ബന്ധമായി കടകളും സ്ഥാപനങ്ങളും അടപ്പിക്കാന് ശ്രമിക്കുകയോ ചെയ്യുന്നവരെ ഉടനടി അറസ്റ്റ് ചെയ്യുമെന്നും ഡിജിപി വ്യക്തമാക്കി. കടകള് തുറന്നാല് അവയ്ക്ക് ആവശ്യമായ സംരക്ഷണം നല്കും. ബലം പ്രയോഗിച്ചു കടകള് അടപ്പിക്കാന് ശ്രമിക്കുന്നവര്ക്കെതിരെ കര്ശന നടപടി സ്വീകരിക്കാനും നിര്ദേശിച്ചിട്ടുണ്ട്. അക്രമത്തിനു മുതിരുന്നവര്ക്കെതിരെ കേസ് റജിസ്റ്റര് ചെയ്തു നടപടി സ്വീകരിക്കണം. വ്യക്തികള്ക്കും വസ്തുവകകള്ക്കും എതിരെയുളള അക്രമങ്ങള് കര്ശനമായി തടയണം.
സര്ക്കാര് ഓഫിസുകള്, കെഎസ്ഇബി, മറ്റ് ഓഫിസുകള് എന്നിവയ്ക്ക് ആവശ്യമായ സുരക്ഷ ഏര്പ്പെടുത്തണം. കെഎസ്അര്ടിസി ബസുകള് സ്വകാര്യ ബസുകള് എന്നിവ തടസ്സം കൂടാതെ സര്വീസ് നടത്തുന്നതിനു സൗകര്യം ഒരുക്കണം. കോടതികളുടെ പ്രവര്ത്തനം സുഗമമായി നടത്തുന്നതിനു പ്രത്യേക നടപടികള് സ്വീകരിക്കണം. ആവശ്യമായ സ്ഥലങ്ങളില് പൊലീസ് പിക്കറ്റും പട്രോളിങ്ങും ഏര്പ്പെടുത്തണം.
ഹര്ത്താലുകള് നിര്ബന്ധിത ഹര്ത്താലായി മാറാതിരിക്കുന്നതിന് ആവശ്യമായ നടപടികള് സ്വീകരിക്കണമെന്ന ഹൈക്കോടതി ഉത്തരവുകള് നടപ്പാക്കുന്നതിനു ജില്ലാ പൊലീസ് മേധാവിമാര്ക്കു നിര്ദേശം നല്കിയിട്ടുണ്ട്. സ്ഥിതിഗതികള് നിരീക്ഷിച്ച് ആവശ്യമായ നടപടി സ്വീകരിക്കണമെന്ന് റേഞ്ച് ഐജിമാരോടും സോണല് എഡിജിപിമാരോടും ആവശ്യപ്പെട്ടിട്ടുണ്ട്.
https://www.facebook.com/Malayalivartha
