ശബരിമല വിഷയത്തില്‍ ഇടപെടണമെന്ന് ആവശ്യപ്പെട്ട് ബി.ജെ.പി നേതൃസംഘം രാഷ്ട്രപതി രാംനാഥ് കോവിന്ദിനു മുന്നില്‍. ഭരണഘടനാപരമായി രാഷ്ട്രപതിയുടെ ഏതുവിധത്തിലുള്ള ഇടപെടലാണ് സാധ്യമാവുക എന്ന് വ്യക്തമല്ല. രാഷ്ട്രപതി ഭരണം ഏര്‍പ്പെടുത്തണമെന്ന് ആവശ്യപ്പെട്ടിട്ടില്ലെന്ന് നേതാക്കള്‍ വിശദീകരിച്ചു.കേരളത്തില്‍ ക്രമസമാധാനനില തകര്‍ന്നുവെന്നും രാഷ്ട്രപതിയുടെ ഉചിതമായ ഇടപെടല്‍ ഉണ്ടാകുമെന്നാണ് പ്രതീക്ഷയെന്നും ബി.ജെ.പി സംസ്ഥാന പ്രസിഡന്റ് പി.എസ്. ശ്രീധരന്‍ പിള്ള പറഞ്ഞു.

യുവതി പ്രവേശനത്തെ തുടര്‍ന്നുണ്ടായ ക്രമസമാധാന പ്രശ്‌നങ്ങള്‍ നേതൃസംഘം രാഷ്്ട്രപതിയോട് വിശദീകരിച്ചു. ശബരിമലയിലെ സ്ഥിതി പഠിക്കാന്‍ ബി.ജെ.പി ദേശീയ അധ്യക്ഷന്‍ അമിത് ഷാ നിയോഗിച്ച സമിതിയുടെ റിപ്പോര്‍ട്ട് രാഷ്ട്രപതിക്ക് കൈമാറിയിട്ടുണ്ട്. ശബരിമല വിഷയത്തില്‍ ഈ മാസം 22ന് സുപ്രീംകോടതി സ്വീകരിക്കുന്ന നിലപാടിനു ശേഷം ഓര്‍ഡിനന്‍സ് അടക്കമുള്ള കാര്യങ്ങളില്‍ നിലപാട് എടുക്കുമെന്ന് നേതാക്കള്‍ പറഞ്ഞു.