പ്രായമായവരെ എങ്ങനെയും കബളിപ്പിക്കാം എന്നതിന്റെ ഏറ്റവും വലിയ ഉദാഹരണമാണ് ഇന്നലെ വാകത്താനത്ത് നടന്നത്. 75 വയസുള്ള വയോധികയെ കബളിപ്പിച്ച് 41000 രൂപയാണ് നിമിഷങ്ങള്‍ക്കകം തട്ടിയെടുത്തത്. ഗള്‍ഫിലുള്ള മകന് എട്ടു ലക്ഷം രൂപ ലോട്ടറിയടിച്ചെന്നാണ് ഒരു വിരുതന്‍ വീട്ടിലെ ലാന്‍ഡ് ഫോണില്‍ വിളിച്ച് തട്ടിവിട്ടത്. പക്ഷേ വിദേശത്തു നിന്നുള്ള പണം ലഭിക്കുന്നതിന് ഏറെ കടമ്പകളുണ്ടെന്നും അതിന് അങ്ങോട്ട് അല്‍പം പണം കൊടുക്കണമെന്നുമാണ് വിളിച്ചയാള്‍ പറഞ്ഞത്.

ആരോടും ഇക്കാര്യം പറയരുത് പരമ രഹസ്യമായിരിക്കണമെന്നും പ്രത്യേകം പറഞ്ഞു. വയോധികയും ഭര്‍ത്താവും ചായകുടിച്ചുകൊണ്ടിരിക്കെയാണ് ഫോണ്‍ കോള്‍ വന്നത്. ഉടനെ വയോധിക പണവുമെടുത്ത് ഭര്‍ത്താവിനോടു പോലും പറയാതെ ഓട്ടോറിക്ഷയില്‍ കോട്ടയം റെയില്‍വേ സ്‌റ്റേഷനിലേക്ക് പാഞ്ഞു.

റെയില്‍വേ സ്‌റ്റേഷനില്‍ വരുന്നയാളുടെ അടയാളവും പറഞ്ഞിരുന്നു. അയാള്‍ ഒരു കുപ്പിവെള്ളം കൈയ്യില്‍ പിടിക്കുമെന്നായിരുന്നു അടയാളം. പിന്നെ ഷര്‍ട്ടിന്റെ നിറവും. സ്‌റ്റേഷനില്‍ ഓട്ടോയിറങ്ങിയ വയോധിക വേഗം റെയില്‍വേ സ്‌റ്റേഷനിലേക്ക് കയറി അടയാളം നോക്കി ആളെ കണ്ടുപിടിച്ച് പണം നല്‍കി. വേഗം തിരികെ വീട്ടിലെത്തി.

ഇതിനിടെ കൊച്ചുമകനോട് മാത്രം വിവരം പറഞ്ഞു. കൊച്ചുമകന് സംശയം തോന്നി വാകത്താനം പോലീസില്‍ വിവരം ധരിപ്പിച്ചു. പോലീസ് എത്തുന്നതിനു മുന്‍പേ വയോധിക പണം നല്‍കി വീട്ടിലെത്തിയിരുന്നു. ഇതിനിടെ വയോധിക ഗള്‍ഫിലുള്ള മകനെ വിളിച്ച് എപ്പോഴാണ് ലോട്ടറിയുടെ പണം കിട്ടുന്നതെന്ന് ചോദിച്ചപ്പോഴാണ് തട്ടിപ്പ് ശരിക്കും ബോധ്യപ്പെട്ടത്.

എന്തായാലും തട്ടിപ്പുകാരന്റെ ചിത്രം റെയില്‍വേ സ്‌റ്റേഷനിലെ സിസിടിവി കാമറയില്‍ നിന്നുള്ളത് പോലീസിന് ലഭിച്ചിട്ടുണ്ട്. പാന്റ്‌സും ഷര്‍ട്ടും ധരിച്ച തട്ടിപ്പുകാരനെ ഉടനെ കുടുക്കാന്‍ കഴിഞ്ഞേക്കുമെന്നാണ് പോലീസ് നിഗമനം.