കണ്ണൂർ , കാസർഗോഡ് ജില്ലകളിലെ ട്രാൻസ്ജൻഡറുകൾക്ക് സൗജന്യമായി മരുന്ന് ലഭ്യമാക്കുന്ന പദ്ധതിക്ക് തുടക്കമായി . സന്നദ്ധരക്തദാനം , നിർധനരായ കിഡ്നി രോഗികൾക്ക് സൗജന്യ യാത്ര സേവനം , അന്നപൂർണ ഡ്രസ് ബാങ്ക് എന്നിവയ്ക്ക് നേതൃത്വം നൽക്കുന്ന അന്നപൂർണ കൂട്ടായ്മ നവഭാരത് ഐ.എ.എസ് അക്കാദമിയുമായി സഹകരിച്ചാണ് അന്നപൂർണ ആയുഷ് രേഖ മെഡിസിൻ ബാങ്ക് നടപ്പിലാക്കുന്നത് . തലശ്ശേരി ഗവ.ബ്രണ്ണൻ കോളേജിൽ വച്ച് നടന്ന ചടങ്ങ് ജില്ലാ സെഷൻസ് ജഡ്ജ് ആർ .എൽ . ബൈജു ഉദ്ഘാടനം ചെയ്തു .സമൂഹത്തോടൊപ്പം ചേർത്ത് നിർത്തപ്പെടേണ്ടവരാണ് ട്രാൻസ്ജൻഡറുകളെന്നും അവരുടെ ഉന്നമനത്തിന്നായി വിദ്യാർത്ഥി സമൂഹത്തിന് ക്രിയാത്മക പങ്ക് വഹിക്കാൻ സാധിക്കുമെന്നും ഉദ്ഘാടന പ്രസംഗത്തിൽ ആർ .എൽ .ബൈജു അഭിപ്രായപ്പെട്ടു ..

അന്നപൂർണ ആയുഷ് രേഖ പദ്ധതിയിലൂടെ കണ്ണൂരിൽ പ്രവർത്തിക്കുന്ന സാന്ത്വനം മെഡിക്കൽസ് , ബോംബെ മെഡിക്കൽസ് എന്നീ മെഡിക്കൽ സ്‌റ്റോറുകളിൽ നിന്ന് ട്രാൻസ്ജൻഡറുകൾക്ക് സൗജന്യമായി മരുന്ന് ലഭിക്കുമെന്ന് അന്നപൂർണ ജനറൽ സെക്രട്ടറി ജോഫിൻ ജയിംസ് അറിയിച്ചു . കണ്ണൂർ ,കാസർഗോഡ് ജില്ലകളിലെ ഇരുന്നൂറ്റി അൻപതോളം ട്രാൻസ്ജൻഡറുകൾക്ക് പദ്ധതിയുടെ ആനുകൂല്യം ലഭിക്കും .വരും ദിവസങ്ങളിൽ പദ്ധതി കൂടുതൽ ജില്ലകളിലേക്ക് വ്യാപിപ്പിക്കുമെന്ന് അന്നപൂർണ ചീഫ് - കോ-ഓർഡിനേറ്റർ നവീൻ ആർ.ടി അറിയിച്ചു .

" ട്രാൻസ്ജൻഡറുകളുടെ ഉന്നമനത്തിനായുള്ള പ്രവർത്തനങ്ങളിൽ ലോകത്തിനു മുന്നിൽ കേരളം എന്നും മാതൃകയാണെന്ന് അദ്ധ്യക്ഷപ്രസംഗത്തിൽ ഗവ.ബ്രണ്ണൻ കോളേജ് പ്രിൻസിപ്പാൾ പ്രൊഫ
കെ .ഫൽഗുനൻ അഭിപ്രായപ്പെട്ടു ".

വിശിഷ്ട സേവനത്തിനുള്ള മുഖ്യമന്ത്രിയുടെ പോലീസ് മെഡൽ നേടിയ സർക്കിൾ ഇൻസ്‌പെക്ടർ ഒ. ബാലകൃഷ്ണനെ ചടങ്ങിൽ പൊന്നാട നൽകി ആദരിച്ചു.

കണ്ണൂർ ആസ്റ്റർ മിംമ്സ് ഹോസ്പിറ്റൽ സി.ഇ.ഒ ഫർഹാൻ യാസിൻ , നോർത്ത് മലബാർ ചേംബർ ഓഫ് കൊമേഴ്സ് ഇൻറർനാഷണൽ ഡയറക്ടർ മഹേഷ് ചന്ദ്ര ബാലിഗ എന്നിവർ വിശിഷ്ടാതിഥികളായിരുന്നു . സാമൂഹ്യ പ്രവർത്തകൻ ബാബു പാറാൽ , ജില്ലാ ട്രാൻസ്ജൻഡർ ജസ്റ്റിസ് ബോർഡ് അംഗം സന്ധ്യ ജിജോ , ഗവ. ബ്രണ്ണൻ കോളേജ് ബോട്ടണി വിഭാഗം പ്രൊഫ. സലിലുള്ളാഹിം , തോമസ് ആലക്കോട് , ആസ്റ്റർ മിംമ്സ് ഇൻറർവെൻഷണൽ കാർഡിയോളജിസ്റ്റ് ഡോ.അനിൽകുമാർ എന്നിവർ സംസാരിച്ചു ..