തിരുവോണ നാളുകളെ നിഴലിലാഴ്ത്തിക്കൊണ്ട് സംസ്ഥാനത്ത് കാലവർഷം കനക്കുന്നു. വടക്കൻ കേരളത്തിലും മധ്യകേരളത്തിലും പലയിടങ്ങളിലും പ്രളയസമാനമായ സാഹചര്യമാണ് നിലവിലുള്ളത്. കണ്ണൂർ-വയനാട് അതിർത്തിയായ പാൽച്ചുരത്തിൽ വനത്തിനുള്ളിൽ ഉരുൾപൊട്ടലുണ്ടായതായി സംശയമുണ്ട്. കനത്ത മണ്ണൊലിപ്പിനെത്തുടർന്ന് ഈ റൂട്ടിൽ ഗതാഗതം പൂർണ്ണമായി തടസ്സപ്പെട്ടു. അതേസമയം, മലപ്പുറം ചാലിയാർ പുഴയിലെ തുരുത്തിൽ കുടുങ്ങിയ മൂന്ന് തൊഴിലാളികളെ അഗ്നിരക്ഷാസേന സാഹസികമായി രക്ഷപെടുത്തി. തീരപ്രദേശങ്ങളിൽ 'കള്ളക്കടൽ' പ്രതിഭാസത്തിന് സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുതെന്ന് ദുരന്തനിവാരണ അതോറിറ്റി കർശന നിർദേശം നൽകിയിട്ടുണ്ട്.