മുണ്ടത്തിക്കോട്ടെ പടക്ക നിര്‍മ്മാണശാലയിലുണ്ടായ പൊട്ടിത്തെറിയില്‍ പരിക്കേറ്റ് ചികിത്സയിലായിരുന്ന ഒരാള്‍ കൂടി മരണത്തിന് കീഴടങ്ങി. പാലക്കാട് പട്ടാമ്പി മുതുതല കൊഴിക്കോട്ടിരി സ്വദേശി കൂളിക്കുന്ന് വീട്ടില്‍ പ്രവീണ്‍ (45) ആണ് ബുധനാഴ്ച അന്തരിച്ചത്. ഇതോടെ നാടിനെ നടുക്കിയ ഈ ദുരന്തത്തില്‍ ജീവന്‍ നഷ്ടപ്പെട്ടവരുടെ എണ്ണം പതിനാലായി ഉയര്‍ന്നു.

ജീവിതത്തിലാദ്യമായാണ് പ്രവീണ്‍ ഒരു പടക്ക നിര്‍മ്മാണശാലയില്‍ ജോലിക്കായി എത്തുന്നത്. സുഹൃത്തായ സുരേഷ്, സുരേഷിന്റെ സഹോദരന്‍ സുജിത്ത് എന്നിവര്‍ക്കൊപ്പമാണ് പ്രവീണ്‍ മുണ്ടത്തിക്കോട്ടെ ഈ കേന്ദ്രത്തില്‍ എത്തിയത്.

അപകടം നടന്നയുടനെ കൂടെയുണ്ടായിരുന്ന സുരേഷും സുജിത്തും അത്ഭുതകരമായി ഓടി രക്ഷപ്പെട്ടെങ്കിലും പ്രവീണിന് പുറത്തെത്താന്‍ സാധിച്ചില്ല. കെട്ടിടത്തിനുള്ളില്‍ കുടുങ്ങിപ്പോയ പ്രവീണിന് 90 ശതമാനത്തിലേറെ പൊള്ളലേറ്റിരുന്നു. അതീവ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.