തിരുവനന്തപുരം: കെ.എസ്.ആര്‍.ടി.സിയുടെ പുതിയ എം.ഡിയായി എം.പി ദിനേശ് ചുമതലയേറ്റു. ഇന്നു പത്തരയോടെ തിരുവനന്തപുരത്ത് ചീഫ് ഓഫീസിലെത്തിയാണ് എം.പി ദിനേശ് ചുമതലയേറ്റത്. സി.എം.ഡിയായിരുന്ന ടോമിന്‍ തച്ചങ്കരിയെ മാറ്റിയ ഒഴിവിലാണ് കൊച്ചി സിറ്റി പോലീസ് കമ്മീഷണറായിരുന്ന എം.പി ദിനേശിനെ പുതിയ എം.ഡിയായി നിയമിച്ചത്.

ചുമതലയേറ്റ ശേഷം എല്ലാവരുമായി സഹകരിച്ച് മുന്നോട്ട് പോകുമെന്ന് എം പി ദിനേശഅറിയിച്ചു. മുന്‍ വിധിയോ മുന്‍ധാരണയോ ഇല്ല. സര്‍ക്കാര്‍ ഏല്‍പിച്ച ചുമതല നിര്‍വ്വഹിക്കുമെന്നും അദ്ദേഹം പറഞ്ഞു.

നാല് മാസം മാത്രമാണ് ദിനേശിന് സര്‍വ്വീസ് കാലാവധിയുള്ളത്. അതിന് ശേഷവും സര്‍ക്കാര്‍ അദ്ദേഹത്തിന് സമയം നീട്ടിക്കൊടുക്കുമെന്നാണ് സൂചന. മറ്റാരും എം.ഡി സ്ഥാനം ഏറ്റെടുക്കാന്‍ തയ്യാറാകാത്ത സാഹചര്യത്തിലായിരുന്നു ദിനേശ് ചുമതല സ്വീകരിച്ചത്.