സര്ക്കാരിന്റെ നിലപാട് ഇന്ന്... പത്മനാഭ സ്വാമി ക്ഷേത്ര ഉടമസ്ഥാവകാശം സംബന്ധിച്ച് ആശങ്കകള് നിലനില്ക്കെ സംസ്ഥാന സര്ക്കാര് സുപ്രീംകോടതിയില് ഇന്ന് നിലപാടറിയിക്കും; ക്ഷേത്ര ഭരണം തിരുവിതാംകൂര് രാജ കുടുംബത്തിന് മാത്രമായി കൈമാറരുതെന്ന സര്ക്കാര് നിലപാട് ആവര്ത്തിക്കുമോ?
ശബരിമല യുവതീ പ്രവേശനം സംബന്ധിച്ച വിവാദം ഇപ്പോഴും കെട്ടടങ്ങിയിട്ടില്ല. അതിനിടയ്ക്ക് പത്മനാഭസ്വാമി ക്ഷേത്രത്തിന്റെ ഭരണം സംബന്ധിച്ച് സുപ്രീംകോടതിയില് സംസ്ഥാന സര്ക്കാര് ഇന്ന് നിലപാട് വ്യക്തമാക്കും. ഹൈക്കോടതി വിധി റദ്ദാക്കിയാലും ക്ഷേത്ര ഭരണം തിരുവിതാംകൂര് രാജ കുടുംബത്തിന് മാത്രമായി കൈമാറരുതെന്ന് സര്ക്കാര് ഇന്നലെ ആവശ്യപ്പെട്ടതിന്റെ തുടര്ച്ചയായാണ് ഇന്നത്തെ വാദം.
സര്ക്കാര് എന്തെങ്കിലും പുതിയ മാതൃക മുന്നോട്ട് വയ്ക്കുമോ എന്നത് ശ്രദ്ധേയമാകും. വിരമിച്ച ഹൈക്കോടതി ജഡ്ജിയുടെ നേതൃത്വത്തില് ഭരണ സമിതി രൂപീകരിക്കണമെന്ന് ആവശ്യപ്പെട്ട് ക്ഷേത്രം ട്രസ്റ്റി രാമ വര്മ്മ ഇന്നലെ പുതിയ ശുപാര്ശ കോടതിക്ക് കൈമാറിയിരുന്നു. രാജ കുടുംബത്തിലെ മറ്റ് അംഗങ്ങളുടെ അറിവോടെയല്ല ശുപാര്ശ കോടതിക്ക് കൈമാറിയത് എന്നാണ് സൂചന.
തിരുവിതാംകൂറിലെ അവസാനത്തെ രാജാവിന് ശേഷമുള്ള ഭരണാധികാരി സംസ്ഥാന സര്ക്കാരാണെന്നും ക്ഷേത്രം രാജാവിന്റെ അനന്തരാവകാശിക്ക് കൈമാറാന് വ്യവസ്ഥയില്ലാത്തതിനാല് അത് സര്ക്കാരില് നിക്ഷിപ്തമാകുമെന്നുമായിരുന്നു 2011 ജനുവരി 31ലെ ഹൈക്കോടതി വിധി.
അതേസമയം ശ്രീ പത്മനാഭ സ്വാമി ക്ഷേത്രം പൊതുസ്വത്തെന്ന് തിരുവിതാംകൂര് മുന് രാജകുടുംബം വ്യക്തമാക്കിയിരുന്നു. സ്വകാര്യ ക്ഷേത്രമെന്ന മുന്നിലപാട് തിരുത്തി കൊണ്ടാണ് ക്ഷേത്രം പൊതുസ്വത്തെന്ന തിരുവിതാംകൂര് കുടുംബത്തിന്റെ സുപ്രീം കോടതിയിലെ നിലപാട് മാറ്റം. ക്ഷേത്രത്തിന്റെ ആസ്തി രാജുകുടുംബത്തിന്റെ സ്വത്തല്ലെന്നും ക്ഷേത്ര സമ്പത്ത് വിഗ്രഹത്തിന്റേതാണെന്നുമാണ് മുന്രാജകുടുംബത്തിന്റെ പുതിയ നിലപാട്.
ക്ഷേത്രത്തിന്റെ ആസ്തി തിരുവിതാംകൂര് കുടുംബത്തിന്റെ സ്വകാര്യ സ്വത്തല്ലെന്നും എന്നാല് ക്ഷേത്രഭരണത്തിന് രാജുകുടുംബത്തിന് അവകാശം വേണമെന്നുമാണ് തിരുവിതാംകൂര് രാജകുടുംബത്തിന്റെ ആവശ്യം. നേരത്തെ ക്ഷേത്രം സ്വകാര്യ സ്വത്താണെന്നാണ് ഹൈക്കോടതിയില് മുന് രാജകുടുംബം നിലപാട് സ്വീകരിച്ചിരുന്നത്.
എന്നാല് സുപ്രീംകോടതിയിലെത്തിയപ്പോള് പത്മനാഭ സ്വാമി ക്ഷേത്രം പൊതുസ്വത്താണെന്ന് രാജകുടുംബം പറഞ്ഞു. ക്ഷേത്ര സ്വത്തില് അവകാശം ഇല്ലെന്ന ഹൈക്കോടതി വിധി ചോദ്യം ചെയ്ത് തിരുവിതാംകൂര് രാജകുടുംബം സമര്പ്പിച്ച അപ്പീലാണ് സുപ്രീം കോടതി പരിഗണിക്കുന്നത്. പത്മനാഭ സ്വാമി ക്ഷേത്രക്കേസില് സുപ്രീംകോടതി വാദം ഇന്നും തുടരും.
ജസ്റ്റിസുമാരായ യു യു ലളിത്, ഇന്ദു മല്ഹോത്ര എന്നിവരുടെ ബഞ്ചാണ് പത്മനാഭ സ്വാമി ക്ഷേത്ര കേസ് പരിഗണിക്കുന്നത്.
തിരുവനന്തപുരം പത്മനാഭസ്വാമിക്ഷേത്ര ഭരണത്തിനായി അഞ്ച് അംഗ ഭരണസമിതി വേണമെന്ന് മുന് രാജകുടുംബാംഗവും ക്ഷേത്രം ട്രസ്റ്റിയുമായ രാമവര്മ്മ. നിര്ദ്ദേശം കേസ് പരിഗണിക്കുന്ന സുപ്രീം കോടതി ബെഞ്ച് മുമ്പാകെ വെച്ചിരുന്നു. കേരളാ ഹൈക്കോടതിയില് നിന്ന് വിരമിച്ച ജഡ്ജിയുടെ അദ്ധ്യക്ഷതയിലായിരിക്കണം ഭരണസമിതി, അദ്ധ്യക്ഷനെ കേരള ഹൈക്കോടതി ചീഫ് ജസ്റ്റിന് നോമിനേറ്റ് ചെയ്യാം എന്നിങ്ങനെയാണ് നിര്ദ്ദേശങ്ങള് മുന്നോട്ട് വച്ചത്.
ഹൈക്കോടതി വിധി റദ്ദാക്കിയാലും ക്ഷേത്ര ഭരണം തിരുവതാംകൂര് മുന്രാജകുടുംബത്തിന് മാത്രമായി കൈമാറരുതെന്ന് സര്ക്കാരിന് വേണ്ടി ഹാജരായ അഭിഭാഷകന് വാദിച്ചു. കോടതിക്ക് കൈമാറിയ ശുപാര്ശയിലെ പ്രസക്ത ഭാഗങ്ങള് ഇതാണ്.
ഭരണസമിതിയിലെ ഒരു അംഗത്തിനെ ക്ഷേത്രം ട്രസ്റ്റിക്ക് നോമിനേറ്റ് ചെയ്യാം.
കേരള സര്ക്കാരിനും കേന്ദ്ര സാംസ്കാരിക മന്ത്രാലയത്തിനും ഓരോ അംഗങ്ങളെ വീതം നോമിനേറ്റ് ചെയ്യാം. അഞ്ചാമത്തെ അംഗം പത്മനാഭസ്വാമി ക്ഷേത്രത്തിലെ മുഖ്യതന്ത്രി ആയിരിക്കണം.
അഞ്ച് ഭരണസമിതിയംഗങ്ങളും ഹിന്ദുമതവിശ്വാസികള് ആയിരിക്കണം.
ക്ഷേത്രനവീകരണം, തീര്ത്ഥാടകര്ക്ക് സൗകര്യം ഒരുക്കല് എന്നിവയുള്പ്പെടെ ക്ഷേത്രത്തിന്റെ ദൈനംദിന ഭരണം സംബന്ധിച്ച കാര്യങ്ങളില് ഭരണസമിതി തീരുമാനമെടുക്കും. വിശ്വാസം, ആചാരം എന്നവയുമായി ബന്ധപ്പെട്ട കാര്യങ്ങള് ഭരണസമിതി തന്ത്രിക്ക് വിടണം. തുടങ്ങിയവയാണ് കോടതിക്ക് കൈമാറിയ ശുപാര്ശയിലെ പ്രസക്ത ഭാഗങ്ങള്.
https://www.facebook.com/Malayalivartha
