ആലുവ പെരിയാര് വീണ്ടും പേടിപ്പിക്കുന്നു; മായാത്ത ചോരക്കറകള് എപ്പോഴും പെരിയാറിനെയും പരിസരത്തെയും പേടിപ്പിക്കുന്നു
പെരിയാറിലെ ചോരക്കറയ്ക്ക് പിന്നില്. ആലുവ പെരിയാര് വീണ്ടും പേടിപ്പിക്കുന്നു. മായാത്ത ചോരക്കറകള് തന്നെയാണ് എപ്പോഴും പെരിയാറിനെയും പരിസരത്തെയും പേടിപ്പിക്കുന്നു. ഒന്നും രണ്ടുമല്ല നിരവധി കഥകള്. പെരിയാറില് മംഗലപ്പുഴ പാലത്തിനടുത്ത് വിന്സെഷന് സെമിനാരിയുടെ കടവില്, അടിഞ്ഞ സ്ത്രീയുടെ മൃതദേഹം കൊലപാതകത്തിന് ശേഷം പുഴയില് തള്ളിയതാണെന്ന് സൂചന പുറത്ത് വരുമ്പോള് പെരിയാര് തീരം ആശങ്കയിലാണ്. യുവതിയെ പുതപ്പില് ചെറിയ പ്ലാസ്റ്റിക് കയറു പയോഗിച്ച് വരിഞ്ഞ് കെട്ടി 40 കിലോ ഭാരമുള്ള കരിങ്കല്ലില് കെട്ടി താഴ്ത്തിയ നിലയിലാണ് കണ്ടെത്തിയത്. മൃതദേഹം അഴുകിയതോടെ പുഴയില് ഒഴുകി ഇവിടെ എത്തിയതാണെന്ന് കരുതുന്നു. മൃതദേഹത്തിന് രണ്ട് ദിവസത്തിലധികം പഴക്കമുണ്ട്.
ഏകദേശം മുപ്പതിനും 40നുമിടയില് പ്രായവും 154 സെന്റിമീറ്റര് ഉയരവുമുള്ള യുവതിയുടേതാണ് മൃതദേഹം. ലെഗിന്സും ടി ഷര്ട്ടുമാണ് ധരിച്ചിരുന്നത്. വായില് തുണി തിരുകിയ നിലയിലാണ് മൃതദേഹം കാണപ്പെട്ടത്.
കൊലപ്പെടുത്തിയ ശേഷമോ അബോധാവസ്ഥയിലോ ആകാം മൃതദേഹം പുഴയില് തള്ളിയതെന്ന് കരുതുന്നു. ഒന്നില് കൂടുതല് ആളുകള് കൊലപാതകത്തിന് പിന്നിലുണ്ടെന്ന് വ്യക്തമാണെന്ന് പോലീസ് പറഞ്ഞു. മൃതദേഹം ആലുവ റൂറല് എസ്.പി രാഹുല് ആര് നായറുടെ നേതൃത്വത്തില് പോസ്റ്റ് മോര്ട്ടത്തിനായി കളമശ്ശേരി മെഡിക്കല് കോളേജിലേക്ക് മാറ്റി. പെരിയാറില് നഴ്സിംഗ് വിദ്യാര്ഥിനിയായ ആന്ലിയ ദുരൂഹസാഹചര്യത്തില് മരിച്ച സംഭവത്തിന്റെ ആശങ്ക മാറും മുന്പാണ് പുതിയ സംഭവം. ആന്ലിയയുടെ മരണത്തില് ക്രൈം ബ്രാഞ്ച് അന്വേഷണം ശരിയായ ദിശയിലല്ലെന്ന് പിതാവ് ഹൈജിനസ്. മരണത്തില് ആന്ലിയയുടെ ഭര്ത്താവിന്റെ പങ്ക് വ്യക്തമാക്കുന്ന കാര്യങ്ങളിലേക്ക് അന്വേഷണം നീളുന്നില്ലെന്നാണ് ആരോപണം.
കേസ് ക്രൈംബ്രാഞ്ച് ഏറ്റെടുത്ത് 10 ദിവസം കഴിഞ്ഞിട്ടും കൊച്ചിയിലുള്ള ആന്ലിയയുടെ പിതാവില് നിന്നോ കുടുംബത്തില് നിന്നോ ക്രൈംബ്രാഞ്ച് മൊഴിയെടുത്തില്ല. ആദ്യഘട്ടത്തില് തന്നെ മകളുടെ മരണം ആത്മഹത്യയെന്ന് ക്രൈംബ്രാഞ്ചിനെ ഉദ്ധരിച്ച് വാര്ത്തകള് വരുമ്പോള് വലിയ ആശങ്കയിലാണ് കുടുംബം.
സമൂഹമാധ്യമങ്ങളില് ആന്ലിയയെ മോശമായി ചിത്രീകരിക്കുന്ന പോസ്റ്റുകള്ക്കും കമന്റുകള്ക്കുമെതിരെ നിയമനടപടി ആലോചിക്കുകയാണ് കുടുംബം. ജസ്റ്റിന്റെ വീട്ടിലുള്ള കുഞ്ഞിന് തിരികെ കിട്ടാനും നടപടികളെടുക്കും. വിദേശത്തുള്ള മാതാപിതാക്കളെ വിഷമിക്കേണ്ടെന്ന് കരുതി പലതും ആന്ലിയ മറച്ച് വെച്ചിരുന്നുവെന്ന് അടുത്ത ബന്ധുക്കള് പറഞ്ഞു.
കേസില് പ്രതിയായ ജസ്റ്റിന് ഇപ്പോള് വിയ്യൂര് സെന്ട്രല് ജയിലിലാണ്. കൊലപാതകത്തിലേക്ക് വിരല് ചൂണ്ടുന്ന തെളിവുകള് ഇത് വരെ ലഭിച്ചിട്ടില്ലെന്നാണ് ക്രൈംബ്രാഞ്ച് അന്വേഷണ സംഘം പറയുന്നത്.
https://www.facebook.com/Malayalivartha
