ശബരിമലയില്‍ ആര്‍ക്ക് അനുഗ്രഹം കിട്ടും. മാസങ്ങളായി കേരളം സജീവമായി ചര്‍ച്ച ചെയ്യുന്ന ശബരിമല വിഷയം ലോക്‌സഭ തിരഞ്ഞെടുപ്പില്‍ ആര്‍ക്ക് അനുഗ്രഹമാകും. ഇപ്പോള്‍ നടക്കുന്ന അഭിപ്രായ സര്‍വേകളെല്ലാം യുഡിഎഫിന് മുന്‍തൂക്കം നല്‍കുന്നു. ശബരിമല വിഷയത്തില്‍ ഏത് പാര്‍ട്ടിയുടെ നിലപാടിനോടാണ് യോജിപ്പ് എന്ന ചോദ്യത്തിന് പൊതുജനങ്ങളില്‍ 41 ശതമാനം എന്‍ഡിഎ നിലപാടിനോടാണ് യോജിപ്പ് അറിയിച്ചത്. 25 ശതമാനം പേര്‍ യുഡിഎഫിനും 25 ശതമാനം പേര്‍ എല്‍ഡിഫ് നിലപാടിനോടും ആണ് തങ്ങള്‍ക്ക് യോജിപ്പ് എന്നറിയിച്ചു. 9 ശതമാനം പേര്‍ ഇക്കാര്യത്തില്‍ അഭിപ്രായമൊന്നും പറഞ്ഞില്ല. എന്നാല്‍ ശബരിമല വിഷയം ഏത് പാര്‍ട്ടിക്കാവും നേട്ടമാവുക എന്ന ചോദ്യം വന്നതോടെ അഭിപ്രായം മാറി. ശബരിമല വിഷയത്തില്‍ യുഡിഎഫ് രാഷ്ട്രീയ നേട്ടമുണ്ടാക്കും എന്ന ഉത്തരമാണ് സര്‍വേയില്‍ പങ്കെടുത്ത 32 ശതമാനം പേരും പങ്കുവച്ചത്. എല്‍ഡിഎഫ് നേട്ടമുണ്ടാക്കും എന്ന് 26 ശതമാനം പേര്‍ അഭിപ്രായപ്പെട്ടപ്പോള്‍ എന്‍ഡിഎയ്ക്ക് ശബരിമല വിഷയം രാഷ്ട്രീയനേട്ടമായി മാറും എന്ന് കരുതുന്നത് 21 ശതമാനം പേര്‍ മാത്രമാണ്. 21 ശതമാനം പേര്‍ക്ക് ഇക്കാര്യത്തില്‍ അഭിപ്രായമൊന്നുമില്ല.

ശബരിമല വിഷയത്തിലെ എല്‍ഡിഎഫ് നിലപാട് നല്ലതാണെന്ന് 37 ശതമാനം പേര്‍ കരുതുന്നു. യുഡിഎഫ് നിലപാട് നല്ലതാണ് എന്ന് 43 ശതമാനം പേരും വിശ്വസിക്കുന്നു. യുഡിഎഫ് നിലപാട് മോശമാണെന്ന അഭിപ്രായം 38 ശതമാനം പേര്‍ക്കും എല്‍ഡിഎഫ് നിലപാട് മോശമാണെന്ന അഭിപ്രായം 53 ശതമാനം പേര്‍ക്കുമുണ്ട്. ലോക്‌സഭാ തെരഞ്ഞെടുപ്പില്‍ കേരളത്തില്‍ യുഡിഎഫിന് അനുകൂലമായ ജനവിധിക്ക് സാധ്യതയെന്ന് ഫലങ്ങള്‍ വലിയ ചര്‍ച്ചയായി കഴിഞ്ഞു. 14 നും 16 നും ഇടയ്ക്ക് സീറ്റ് യുഡിഎഫ് പിടിക്കാനിടയുണ്ടെന്നാണ് അഭിപ്രായ വോട്ടെടുപ്പില്‍ പങ്കെടുത്തവര്‍ പറയുന്നത്. 44 ശതമാനം വോട്ട് വിഹിതം നേടിയാവും ഭൂരിപക്ഷം സീറ്റുകളും യുഡിഎഫ് നേടുകയെന്നാണ് സര്‍വ്വേ പ്രവചിക്കുന്നത്. ഇടതുപക്ഷ ജനാധിപത്യമുന്നണിയുടെ വോട്ട് വിഹിതം 30 ശതമാനമായി കുറയുമെന്നും മൂന്ന് മുതല്‍ അഞ്ച് വരെ സീറ്റുകള്‍ എല്‍ഡിഎഫിന് കിട്ടിയേക്കുമെന്ന് പ്രവചിക്കുന്നു. നിലവിലെ രാഷ്ട്രീയ സാഹചര്യത്തില്‍ ഒരു സീറ്റില്‍ എന്‍ഡിഎ വിജയിക്കാന്‍ സാധ്യതയുണ്ടെന്ന് സര്‍വേ പ്രവചിക്കുന്നു. 18 ശതമാനം വോട്ടുവിഹിതമായിരിക്കും എന്‍ഡിഎക്ക് കിട്ടുക. തെക്കന്‍ ജില്ലകളിലെ ഏഴ് സീറ്റുകളില്‍ ഒന്നില്‍ ബിജെപി വിജയിക്കും എന്നാണ് സര്‍വേയുടെ പ്രവചനം.