സംസ്ഥാന സര്‍ക്കാര്‍ ആയുഷ് വകുപ്പിന്റെ ആഭിമുഖ്യത്തില്‍ സംഘടിപ്പിക്കുന്ന ആദ്യ അന്താരാഷ്ട്ര ആയുഷ് കോണ്‍ക്ലേവിന് ഫെബ്രുവരി 15ാം തീയതി വെള്ളിയാഴ്ച തിരുവനന്തപുരത്ത് തുടക്കമാകുന്നു. കോണ്‍ക്ലേവിന്റെ ഔപചാരികമായ ഉദ്ഘാടനം 16ന് ഗവര്‍ണര്‍ ജസ്റ്റിസ് പി. സദാശിവം നിര്‍വഹിക്കും.

ആയുഷ് കോണ്‍ക്ലേവിന് മുന്നോടിയായി എല്‍.എസ്.ജി. ലീഡേഴ്‌സ് മീറ്റ്, ആരോഗ്യ എക്‌സ്‌പോ എന്നിവ 15ന് ആരംഭിക്കും.

എല്‍.എസ്.ജി. ലീഡേഴ്‌സ് മീറ്റ് (രാവിലെ 10ന്)

ചരിത്രത്തിലാദ്യമായി തദ്ദേശ സ്വയംഭരണ സ്ഥാപനങ്ങളിലൂടെ നടപ്പിലാക്കപ്പെടുന്ന ആയുഷ് പദ്ധതികള്‍ക്ക് മികവിന്റെ മാറ്റുരയ്ക്കാന്‍ വേദിയൊരുക്കുകയാണ് എല്‍.എസ്.ജി.ഡി. മീറ്റിന്റെ ലക്ഷ്യം.

എല്‍.എസ്.ജി.ഡി. മീറ്റ് ജിമ്മി ജോര്‍ജ് ഇന്‍ഡോര്‍ സ്‌റ്റേഡിയത്തില്‍ വച്ച് ഇന്ന് രാവിലെ 10 മണിക്ക് ആരോഗ്യ, ആയുഷ് വകുപ്പ് മന്ത്രി കെ.കെ ശൈലജ ടീച്ചര്‍ അദ്ധ്യക്ഷത വഹിക്കുന്ന ചടങ്ങില്‍ തദ്ദേശ സ്വയംഭരണ ഭരണ വകുപ്പ് മന്ത്രി എ.സി. മൊയ്തീന്‍ ഉദ്ഘാടനം ചെയ്യും. അഡീഷണല്‍ ചീഫ് സെക്രട്ടറി (എല്‍.എസ്.ജി.ഡി.) റ്റി.കെ. ജോസ് മുഖ്യപ്രഭാഷണം നടത്തും. തദ്ദേശ ഭരണ സ്ഥാപനങ്ങളുടെ മേധാവികളും നിര്‍വഹണ ഉദ്യോഗസ്ഥരും ഈ പരിപാടിയില്‍ പങ്കെടുക്കും. പൊതുജനാരോഗ്യത്തിന് ആയുഷ് വിഭാഗങ്ങളുടെ സഹകരണത്തോടെ തദ്ദേശ സ്വയംഭരണ സ്ഥാപനങ്ങള്‍ നടപ്പാക്കിയ മികച്ച പദ്ധതിക്ക് സമ്മാനം നല്‍കും.

ജില്ലാതലത്തില്‍ സ്‌ക്രീനീംഗ് നടത്തി ഉത്തര ദക്ഷിണ സോണുകളിലായുള്ള മത്സരങ്ങളിലൂടെ തെരഞ്ഞെടുക്കപ്പെട്ട മികച്ച 12 പദ്ധതികളാണ് അവതരിപ്പിക്കുക. അവയില്‍ നിന്നും തെരഞ്ഞെടുക്കുന്ന മികച്ച പദ്ധതിക്ക് സമ്മാനം നല്‍കും. ആയുര്‍വേദത്തിലെ എട്ടും ഹോമിയോപ്പതിയിലെ നാലും പദ്ധതികളുമാണ് അവസാന ഘട്ടത്തില്‍ മാറ്റുരയ്ക്കുന്നത്. ഭിന്നശേഷിക്കാര്‍, ഗോത്രവര്‍ഗക്കാര്‍, പാലിയേറ്റീവ് രോഗികള്‍ തുടങ്ങി പാര്‍ശ്വവല്‍ക്കരിക്കപ്പെട്ട ജനവിഭാഗങ്ങള്‍ക്കിടയില്‍ നടപ്പിലാക്കിയ വിഭിന്നമായ ആയുഷ് ജനകീയാസൂത്രണ പദ്ധതികള്‍ ഇതില്‍പ്പെടും.


ആരോഗ്യ എക്‌സ്‌പോ (വൈകുന്നേരം 4ന്)

സൂര്യകാന്തി എക്‌സ്‌പോ ഗ്രൗണ്ടില്‍ ഫെബ്രുവരി 15 ന് വൈകുന്നേരം 4 മണിക്ക് ആരംഭിച്ച് നാലു ദിവസം നീണ്ടുനില്കുന്ന ആരോഗ്യ എക്‌സ്‌പോ ആയുഷ് കോണ്‍ക്ലേവിന്റെ പ്രധാന ആകര്‍ഷണമാണ്. 325 സ്റ്റാളുകളിലായി നടക്കുന്ന പ്രദര്‍ശനത്തില്‍ ആയുഷിലെ എല്ലാ വിഭാഗങ്ങളും പങ്കെടുക്കുന്നു. കേന്ദ്ര ഗവണ്‍മെന്റ് സ്ഥാപനങ്ങളും കേരളത്തിലെ ഗവണ്‍മെന്റ്, സ്വകാര്യ സ്ഥാപനങ്ങളും ആരോഗ്യ എക്‌സ്‌പോയില്‍ പങ്കെടുക്കുന്നു. ആരോഗ്യമേഖലയില്‍ ആയുഷ് വൈദ്യശാസ്ത്രങ്ങളുടെ ഇടപെടല്‍ സംബന്ധിച്ച് പൊതുജനങ്ങള്‍ക്ക് കൃത്യമായ അവബോധം ഉണ്ടാക്കുന്നതിന് ആരോഗ്യ എക്‌സ്‌പോയിലൂടെ കഴിയും.

എഡ്യൂക്കേഷന്‍ എക്‌സ്‌പോ

എഡ്യുക്കേഷന്‍ എക്‌സ്‌പോയില്‍ കേരളത്തിലെ എല്ലാ ആയുഷ് കോളേജുകളും പങ്കെടുക്കുന്നു. 17 ആയുര്‍വേദ കോളേജുകളും 5 ഹോമിയോ കോളേജുകളും യുനാനി, സിദ്ധ, യോഗ & നാച്ചുറോപ്പതി കോളേജുകളും എഡ്യുക്കേഷന്‍ എക്‌സ്‌പോയില്‍ പങ്കെടുക്കുന്നു. ഓരോ കോളേജും ആയുഷ് മേഖലയിലെ സ്‌പെഷ്യാലിറ്റികളെ സംബന്ധിച്ച് പൊതുജനങ്ങള്‍ക്ക് അറിവുപകരുന്ന വിധത്തിലാണ് എഡ്യുക്കേഷന്‍ എക്‌സ്‌പോ സംഘടിപ്പിച്ചിരിക്കുന്നത്.