ശബരിമല കയറാനെത്തിയ യുവതി ഭക്തരുടെ പ്രതിഷേധത്തിന് മുന്നില്‍ മുട്ടുമടക്കി മലയിറങ്ങി. ആന്ധ്രാ സ്വദേശിയായ യുവതി ഭര്‍ത്താവിനൊപ്പമാണ് ഇന്ന് രാവിലെ ദര്‍ശനത്തിനെത്തിയത്. മരക്കൂട്ടത്ത് വെച്ച് ഇവരെ തിരിച്ചറിഞ്ഞ ഭക്തര്‍ തടഞ്ഞു. അതോടെ പൊലീസ് യുവതിക്ക് സുരക്ഷയൊരുക്കി മലയിറങ്ങി. യുവതിക്ക് തിരിച്ചറിയല്‍ രേഖ സമര്‍പ്പിക്കാനുമായില്ല. ഭര്‍ത്താവ് ദര്‍ശനത്തിനായി പോവുകയും ചെയ്തു. കുംഭമാസ പൂജയ്ക്ക് നട തുറന്നിട്ട് മൂന്ന് ദിവസം പിന്നിടുമ്പോള്‍ നിരവധി അയല്‍സംസ്ഥാന യുവതികളാണ് ദര്‍ശനത്തിനെത്തിയത്. ഒരു യുവതി ദര്‍ശനത്തിനെത്തിയത് ഇന്നാണ്. നവോത്ഥാന കേരളം എന്ന ഫെയിസ്ബുക്ക് കൂട്ടായ്മ യുവതികള്‍ ദര്‍ശനത്തിന് എത്തുമെന്ന് അറിയിച്ചിരുന്നെങ്കിലും ആരും വന്നില്ല. രേശ്മാനിഷാന്ത്, ഷാനില എന്നീ യുവതികള്‍ സുരക്ഷ ആവശ്യപ്പെട്ട് ഹൈക്കോടിയെ സമീപിച്ചെങ്കിലും അതില്‍ തീരുമാനമായില്ല.

കോടതി വിധിയുണ്ടെന്ന് അറിയാമെങ്കിലും അതിനെതിരെ പ്രതിഷേധം നടക്കുന്നുണ്ടെന്ന് അറിയാതെയാണ് പല യുവതികളും ശബരിമലയ്‌ക്കെത്തുന്നത്. സമരക്കാരെ ഭയന്ന് എല്ലാവരും തിരിച്ചിറങ്ങുകയാണ് പതിവ്. അതേസമയം പല തവണ ദര്‍ശനം നടത്തിയിട്ടുള്ള, 50 കഴിഞ്ഞ യുവതികളെയും ഭക്തരുടെ നേതൃത്വത്തില്‍ തിരിച്ചിറക്കുന്നുണ്ട്. ഈമാസം നട തുറന്ന ശേഷം നാലോളം യുവതികളെ പൊലീസ് തിരിച്ചിറക്കി. സുരക്ഷാപ്രശ്‌നങ്ങളും മറ്റും ചൂണ്ടിക്കാട്ടി പൊലീസ് തന്നെയാണ് ഇവരെയെല്ലാം പിന്തിരിപ്പിച്ചത്. യുവതികള്‍ സുരക്ഷവേണമെന്ന കര്‍ശന നിലപാട് സ്വീകരിച്ചിരുന്നെങ്കില്‍ പൊലീസ് കുഴങ്ങിയേനേ. അതേസമയം ബി.ജെ.പിയുടെയും ശബരിമല കര്‍മസമിതിയുടെയും സമരം പഴയത് പോലെ ശക്തമല്ല. ലോക്‌സഭാ തെരഞ്ഞെടുപ്പ് അടുത്തിരിക്കുന്ന വേളയില്‍ പ്രതിഷേധങ്ങള്‍ കടുപ്പിച്ചാല്‍ തിരിച്ചടിയാകുമെന്ന് ഇവര്‍ വിലയിരുത്തുന്നു.

ഇതേ കാരണം കൊണ്ടാകാം സര്‍ക്കാരിനും പഴയ ഉത്സാഹമില്ല. നവോത്ഥാന കേരളം ഫെയിസ്ബുക്ക് കൂട്ടായ്മ എത്തുമെന്ന് പറഞ്ഞെങ്കിലും സി.പി.എമ്മിന്റെ പിന്തുണ വേണ്ടത്ര ലഭിക്കാത്തതിനാലാണ് ഇവര്‍ പിന്‍വാങ്ങിയതെന്ന് അറിയുന്നു. കണ്ണൂര്‍ സ്വദേശിയായ രേഷ്മാ നിശാന്തിന് മുമ്പ് സി.പി.എം എല്ലാ പിന്തുണയും നല്‍കിയിരുന്നു. പൊലീസ് ആവശ്യപ്പെട്ടിട്ടും സര്‍ക്കാര്‍ നിരോധനാഞ്ജ പ്രഖ്യാപിക്കാത്തതും ശ്രദ്ധേയമാണ്.
നിലയ്ക്കലിലും പമ്പയുലും സന്നിധാനത്തും എസ്പിമാര്‍ക്ക് സുരക്ഷാ ചുമതല നല്‍കിയിട്ടുണ്ട്. ഇവരുടെ കീഴില്‍ ആയിരക്കണക്കിന് പൊലീസുകാരെയും വിന്യസിച്ചിട്ടുണ്ട്. എന്നാല്‍ വലിയ നിയന്ത്രണങ്ങളില്ലാത്തതിനാല്‍ ഭക്തര്‍ക്ക് സുഗമമായി ദര്‍ശനം നടത്താന്‍ കഴിയുന്നുണ്ട്.

ബി.ജെ.പി നേതാവ് കെ.സുരേന്ദ്രന് ശബരിമല ദര്‍ശനം നടത്തുന്നതിനുള്ള വിലക്ക് തുടരുകയാണ്. അതിനാല്‍ മണ്ഡലകാലത്ത് ശരണം വിളിച്ചതിന് അറസ്റ്റിലായ ആര്‍.എസ്.എസ് നേതാവ് രാജേഷ് ഉള്‍പ്പെടെ കഴിഞ്ഞദിവസം സന്നിധാനത്തുണ്ടായിരുന്നു. യുവതികളെത്തിയാല്‍ സംഘര്‍ഷമുണ്ടാക്കാതെ പ്രതിഷേധം സംഘടിപ്പിക്കാനാണ് ആര്‍.എസ്.എസ് തീരുമാനം എന്നറിയുന്നു. യുവതികള്‍ക്കെതിരെ ആക്രമണം നടത്തിയാല്‍ തെരഞ്ഞെടുപ്പില്‍ തിരിച്ചടിയാകുമെന്ന വിലയിരുത്തലിനെ തുടര്‍ന്നാണിത്. തെരഞ്ഞെടുപ്പിന്റെ പ്രാരംഭ ചര്‍ച്ചകള്‍ക്കും പ്രവര്‍ത്തനങ്ങള്‍്കുമായി നേതാക്കളും തിരക്കിലാണ്.