സംസ്ഥാന സര്‍ക്കാര്‍ പ്രഖ്യാപിച്ച ആരോഗ്യ നയം ഫലപ്രദമായി നടപ്പിലാക്കുന്നതിന് കാര്യമായ സംഭാവനകള്‍ നല്‍കാന്‍ സ്‌കൂള്‍ ഓഫ് ഹെല്‍ത്ത് പോളിസി ആന്റ് പ്ലാനിംഗ് സഹായകരമാകുമെന്ന് ആരോഗ്യ സാമൂഹ്യ നീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍. ആരോഗ്യ നയത്തിന് വേണ്ടിയുള്ള ആരോഗ്യ സര്‍വകലാശാലയുടെ പ്രത്യേക ബ്ലോക്കിന്റെ നിര്‍മ്മാണോദ്ഘാടനം മെഡിക്കല്‍ കോളേജ് ക്യാമ്പസില്‍ നിര്‍വഹിച്ച് സംസാരിക്കുകയായിരുന്നു മന്ത്രി.

ഈ ബ്ലോക്കിന്റെ നിര്‍മ്മാണം സമയബന്ധിതമായി പൂര്‍ത്തിയാക്കുന്നതാണെന്ന് മന്ത്രി വ്യക്തമാക്കി. ഇതിനായി 6.5 കോടി രൂപയുടെ ഭരണാനുമതി നല്‍കിയിരുന്നു. ഇതോടൊപ്പം സ്ഥാപനത്തിന് ആവശ്യമായ സ്ഥലം ത്വരിതഗതിയില്‍ ലഭ്യമാക്കുന്നതിന് ഈ സര്‍ക്കാര്‍ മുന്‍കൈയ്യെടുത്തു. ഒന്നാം ഘട്ട പ്രവര്‍ത്തങ്ങള്‍ക്കായി 3.5 കോടി രൂപ അനുവദിച്ചിട്ടുണ്ടെന്നും മന്ത്രി വ്യക്തമാക്കി.

ആര്‍.സി.സി.യ്ക്ക് സമീപമാണ് ബ്ലോക്ക് നിര്‍മ്മിക്കുന്നത്. 7 നിലകളിലായി 8,100 ചതു. മീറ്റര്‍ വിസ്തൃതിയിലുള്ള കെട്ടിടം നിര്‍മ്മിക്കാനാണ് വിഭാവനം ചെയ്തിട്ടുള്ളത്. കെട്ടിട നിര്‍മ്മാണം രണ്ട് ഘട്ടങ്ങളിലായാണ് സാധ്യമാക്കുന്നത്. ആദ്യഘട്ടത്തില്‍ 3 നിലകളും ഒരു ലോവര്‍ ഗ്രൗണ്ട് ലെവല്‍ പാര്‍ക്കിങ്ങുമാണുണ്ടാകുക. താഴത്തെ നിലയില്‍ എന്‍ട്രന്‍സ് ലോബി, വിവിധോദ്ദേശ ഹാള്‍, 450 ചതു. മീറ്ററുള്ള മറ്റൊരു ഹാള്‍ എന്നിവയും, ഒന്നാം നിലയില്‍ പരീക്ഷ പേപ്പര്‍, മൂല്യനിര്‍ണയം നടത്തുന്നതിന് ആവശ്യമായ ഹാള്‍, അനുബന്ധ സൗകര്യങ്ങള്‍, അതിഥി മുറികള്‍ എന്നിവയും രണ്ടാം നിലയില്‍ ഓഫീസ് മുറി, ബോര്‍ഡ് റൂം, കോണ്‍ഫറന്‍സ് ഹാള്‍ എന്നിവയുമാണ് ഉള്‍പ്പെടുത്തിയിരിക്കുന്നത്. രണ്ടാംഘട്ടമായി 4 നിലകള്‍ കൂടി നിര്‍മ്മിക്കുന്നതാണ്. ഇവയുടെ നിര്‍മ്മാണ പ്രവര്‍ത്തനങ്ങള്‍ ഉടന്‍ ആരംഭിക്കുമെന്നും മന്ത്രി പറഞ്ഞു.

ആരോഗ്യ സര്‍വകലാശാല വൈസ് ചാന്‍സര്‍ ഡോ. എം.കെ.സി. നായര്‍ അധ്യക്ഷത വഹിച്ച ചടങ്ങില്‍ പ്രോ. വൈസ് ചാന്‍സലര്‍ ഡോ. എ. നളിനാക്ഷന്‍, ആരോഗ്യ വിദ്യാഭ്യാസ വകുപ്പ് ഡയറക്ടര്‍ ഡോ. എ. റംല ബീവി, നഗരസഭ ക്ഷേമകാര്യ സമിതി ചെയര്‍പേഴ്‌സണ്‍ എസ്.എസ്. സിന്ധു, മെഡിക്കല്‍ കോളേജ് പ്രിന്‍സിപ്പല്‍ ഡോ. തോമസ് മാത്യു, കെ.ജി.എം.സി.ടി.എ. പ്രസിഡന്റ് ഡോ. ശശികല, രജിസ്ട്രാര്‍ ഡോ. എം.കെ. മംഗളം, കെ. രാജമോഹനന്‍, സതീഷ് കുമാര്‍ എസ്. എന്നിവര്‍ പങ്കെടുത്തു.