ദേശീയ തലത്തിൽ ആയുര്വേദ ഗവേഷണ രംഗത്തെ ഏറ്റവും വലിയ സംരംഭം; അന്താരാഷ്ട്ര ആയുര്വേദ ഗവേഷണ കേന്ദ്രത്തിന്റെ ശിലാസ്ഥാപനം മുഖ്യമന്ത്രി പിണറായി വിജയൻ നിര്വ്വഹിക്കുന്നു
തിരുവനന്തപുരം: കണ്ണൂര് കല്യാട് സ്ഥാപിക്കുന്ന അന്താരാഷ്ട്ര ആയുര്വേദ ഗവേഷണ കേന്ദ്രത്തിന്റെ ശിലാസ്ഥാപനം ഫെബ്രുവരി 22-ാം തീയതി വെള്ളിയാഴ്ച വൈകുന്നേരം 5 മണിക്ക് മുഖ്യമന്ത്രി പിണറായി വിജയന് നിര്വഹിക്കും. ആരോഗ്യ ആയുഷ് വകുപ്പ് മന്ത്രി കെ.കെ. ശൈലജ ടീച്ചര് ചടങ്ങില് അധ്യക്ഷത വഹിക്കും. വ്യവസായ സ്പോര്ട്സ് യുവജനകാര്യ വകുപ്പ് മന്ത്രി ഇ.പി. ജയരാജന് മുഖ്യാതിഥിയായും തുറമുഖ മ്യൂസിയം പുരാവസ്ത പുരാരേഖ വകുപ്പുമന്ത്രി രാമചന്ദ്രന് കടന്നപ്പള്ളി വിശിഷ്ടാതിഥിയായും പങ്കെടുക്കുന്ന ചടങ്ങില് ജില്ലയില് നിന്നുള്ള എം.പി.മാര്, എം.എല്.എ.മാര് മറ്റ് ജനപ്രതിനിധികള്, വകുപ്പ് തലവന്മാര് എന്നിവര് പങ്കെടുക്കും.
ആയുര്വേദ ഗവേഷണ രംഗത്ത് രാജ്യത്തുതന്നെ ആദ്യത്തെ ഏറ്റവും വലിയ സംരംഭമാണിത്. ഉത്തരമലബാറിന്റെ വികസനക്കുതിപ്പിനൊപ്പം ആയുര്വ്വേദ മേഖലയ്ക്കും ഏറ്റവും വലിയ സംഭാവനയായി മാറും ഈ ഗവേഷണകേന്ദ്രം. ആധുനിക ശാസ്ത്ര സാങ്കേതിക വിദ്യകള് സമന്വയിപ്പിച്ച് ചികിത്സാരംഗത്തും ഔഷധനിര്മാണ രംഗത്തും ഗവേഷണ പ്രവര്ത്തനങ്ങള് വിപുലപ്പെടുത്തുന്നതിനും മണ്മറഞ്ഞ് പോകുന്ന നാട്ടറിവുകളേയും ഔഷധസസ്യങ്ങളേയും സംരക്ഷിച്ച് ശാസ്ത്രീയമായ പരീക്ഷണ നിരീക്ഷണങ്ങളിലൂടെ നിലനിര്ത്തുന്നതിനുമാണ് അന്താരാഷ്ട്ര നിലവാരത്തിലുള്ള ഗവേഷണകേന്ദ്രം സ്ഥാപിക്കുന്നത്. നമ്മുടെ നാട്ടിലെ അന്യം നിന്നുപോയ പല വൈദ്യ കുടുബങ്ങളിലെ അമൂല്യമായ താളിയോലകളും കൈയെഴുത്തു പ്രതികളുമടക്കം അപൂര്വ്വ അറിവുകളെ സംരക്ഷിക്കാന് ഏറ്റവും നൂതനമായ മാനുസ്ക്രിപ്റ്റ് റീഡിങ്ങ് സമ്പ്രദായവും ഉപയോഗപ്പെടുത്തുന്നതാണ്.
നാട്ടിലെ രോഗികള്ക്കും ആയുര്വേദ വിദ്യാത്ഥികള്ക്കും ഗവേഷകര്ക്കും മാത്രമല്ല വിദേശ രാജ്യത്തടക്കം കേരളത്തിന്റെ യശസ്സ് ഉയര്ത്തുന്നതിന് ഈ സ്ഥാപനം കാരണമാകും. ആദ്യഘട്ടത്തില് ആധുനിക ശാസ്ത്ര സാങ്കേതിക വിദ്യ സമന്വയിപ്പിച്ചു കൊണ്ട് വിവിധ രോഗങ്ങള്ക്കായുള്ള ക്ലിനിക്കല് റിസര്ച്ച്, ഇതിന്റെ ഭാഗമായുള്ള അന്തരാഷ്ട്ര നിലവാരത്തിലുള്ള ഹോസ്പിറ്റല് എന്നിവ ഈ ഗവേഷണ കേന്ദ്രത്തിലുണ്ടാകും. വിവിധ ആയുര്വേദ കോളേജുകളെ കണ്ണി ചേര്ത്ത് കൊണ്ട് വിപുലമായ ഗവേഷണ പദ്ധതിയാണ് ഒരുക്കുന്നത്. ജീവിതശൈലി രോഗങ്ങള്, വാര്ധ്യക്യകാല രോഗ ചികിത്സ എന്നിവയിലുള്ള ഗവേഷണ പരിപാടികള് ആണ് തുടക്കത്തില് ആരംഭിക്കുക.
ആയുര്വേദ അറിവും ലോകമെങ്ങുമുള്ള പാരമ്പര്യ ചികിത്സാ രീതിക രിതികളും പ്രദര്ശിപ്പിക്കുന്ന അന്തരാഷ്ട്ര മ്യൂസിയം ഇതിന്റെ ഭാഗമായി നിലവില് വരും. മരുന്ന് നിര്മ്മാണ മേഖലയില് നല്ല നിലയിലുള്ള ഗവേഷണ പ്രവര്ത്തനങ്ങള് നടത്തുന്ന നൂതന ലാബ് സൗകര്യങ്ങളും ഒരുക്കുന്നതാണ്. ആയുര്വേദ രംഗത്തെ വലിയ മുതല്ക്കൂട്ടായിരിക്കും ഈ ഗവേഷണ കേന്ദ്രം.
https://www.facebook.com/Malayalivartha
