കൊച്ചിയിൽ വൈറലായ പരസ്യവാചകം ഏറ്റെടുത്തിരിക്കുകയാണ് സോഷ്യൽ മീഡിയ. ബ്രാഹ്മണ കുടുംബങ്ങളില്‍ നിര്‍മ്മിച്ച അച്ചാറുകള്‍, വറ്റലുകള്‍, കറിക്കൂട്ടുകള്‍ ഇവിടെ ലഭ്യം എന്ന പരസ്യ വാചകത്തോടെ പൊടിപിടിച്ച ബിസിനസ് തന്ത്രം പൊളിച്ചടുക്കിയിരിക്കുകയാണ് യുവാവ്. കഴിഞ്ഞ രണ്ട് ദിവസമായി സമൂഹമാധ്യമങ്ങള്‍ നിരവധി ചോദ്യങ്ങളുമായി വൈറലാവുകയാണ് ഈ പരസ്യ വാചകം. ഈ പരസ്യത്തിനു പിന്നാലെ കൃത്യമായ അജണ്ട വ്യക്തമാക്കി അനുരാജ് ഗിരിജ എന്ന വ്യക്തി പങ്കുവെച്ച കുറിപ്പും ഇതിനോടകം ചര്‍ച്ചയ്ക്ക് വഴിവെച്ചിട്ടുണ്ട്.

യുവാവിന്റെ ഫേസ്ബുക് കുറിപ്പിലൂടെ...

Unique Selling Point അഥവാ USP എന്നൊരു സംഗതിയുണ്ട്‌. ഒരു പ്രോഡക്റ്റിനെ മാർക്കറ്റിലുള്ള മറ്റ്‌ പ്രോഡക്റ്റുകളിൽ നിന്നും വേറിട്ട്‌ നിർത്തുന്ന ഘടകം.

ഉദാഹരണത്തിന് മിൽമ പാൽ എടുക്കുക. പലതരം പാലുകൾ ലഭ്യമാണെങ്കിലും മിൽമ പാലിന് "കേരളത്തിലെ ക്ഷീരകർഷകരുടെ അംഗീകൃത സഹകരണസംഘം വഴി ഉണ്ടാക്കുന്ന" എന്നൊരു USP ഉണ്ട്‌. കേരളത്തിന്റെ ഏത്‌ മൂലയിലും ഒരു മിൽമ പാൽ സംഭരണ കേന്ദ്രമുണ്ടാകും എന്നത്‌ ഈ പാലിന് പുറത്തെ വിശ്വാസം കൂട്ടാൻ സഹായിക്കും.

ഇനി ഈ ചിത്രം നോക്കുക. ആ കടയുടെ മുന്നിൽ നിൽക്കുന്ന ചേട്ടൻ വിൽക്കുന്ന പ്രോഡക്റ്റിന്റെ USP അഥവാ Unique Selling Point എന്താണ്?

സംശയം വേണ്ട. "ബ്രാഹ്മണ കുടുംബങ്ങളിൽ നിർമ്മിച്ചതാണ്" എന്നതാണ് USP. അതെങ്ങനെയാണ് ബ്രാഹ്മണകുടുംബം എന്നതൊരു USP ആകുന്നത്‌? ഒരു പുലയകുടുംബം അല്ലെങ്കിൽ ഈഴവകുടുംബം അല്ലെങ്കിൽ വിശ്വകർമ്മ കുടുംബം എന്നതൊന്നും ഇതുപോലൊരു പോസ്റ്ററിൽ വരാൻ പോകുന്നില്ല.

അവിടെയാണ് ജാതിയുടെ കളി.

ജാതി വ്യവസ്ഥ എന്നത്‌ ശ്രേണീകൃതമായ അസമത്വമാണ്. ഒരു വലിയ ഏണിയുടെ ഓരോ പടിയിലും ഓരോ ജാതിക്കാർ നിൽക്കുന്നു എന്ന് കരുതുക. ആ ഏണിയുടെ മുകളിലേക്ക്‌ പോകും തോറും ശുദ്ധി കൂടി വരുന്നു എന്നും താഴേക്ക്‌ പോകും തോറും അശുദ്ധി കൂടി വരുന്നു എന്ന രീതിയിലാണ് ജാതി വ്യവസ്ഥ നമ്മളെ കണ്ടീഷൻ ചെയ്യുന്നത്‌.

ഈ പോസ്റ്ററിൽ ബ്രാഹ്മണ കുടുംബം എന്നത്‌ വൃത്തിയും ശുദ്ധിയുമുള്ള വീട്‌ എന്നൊരു ഇമേജ്‌ ആണ് നമുക്ക്‌ തരുന്നത്‌. പല ജാതിക്കാരുടേയും വൃത്തിയും വെടിപ്പുമുള്ള ഒട്ടനേകം വീടുകൾ നമ്മൾ കണ്ടിട്ടുണ്ടാകും. ഒരുപക്ഷേ വൃത്തി അത്രത്തോളമില്ലാത്ത ബ്രാഹ്മണകുടുംബങ്ങളും കണ്ടിരിക്കാം. എന്നാൽ ബ്രാഹ്മണകുടുംബം എന്ന് കേൾക്കുമ്പോൾ തന്നെ നമ്മുടെ തലയിൽ "വൃത്തിയുള്ള വീട്"‌ എന്ന ഇമേജ്‌ വന്നിട്ടുണ്ടെങ്കിൽ നമ്മൾ ജാതി വ്യവസ്ഥയിൽ അത്രത്തോളം മുങ്ങിക്കിടക്കുന്നു എന്ന് തന്നെയാണ് അർത്ഥം.

ഒരു സമൂഹം മുഴുവൻ അങ്ങനെ ജാതിയിൽ മുങ്ങിക്കിടക്കുന്നു എന്നതാണ് ഇങ്ങനെയൊരു പോസ്റ്റർ അടിക്കാൻ ഇവർക്ക്‌ ധൈര്യം നൽകുന്നത്‌‌.

‌ഒരു പ്രത്യേകതരം ജീവിതമാണ് നമ്മൾ ഇന്ത്യാക്കാരുടേത്‌!