എസ്.എസ്.എല്‍.സി. പരീക്ഷയുടെ കേന്ദ്രീകൃത മൂല്യനിര്‍ണയം ഏപ്രില്‍ അഞ്ചിന് ആരംഭിക്കും. മേയ് രണ്ടാംതീയതി അവസാനിക്കുന്നവിധത്തില്‍ രണ്ടുഘട്ടമായാണ് മൂല്യനിര്‍ണയം. ക്യാമ്പുകളില്‍ മൊബൈല്‍ഫോണ്‍ ഉപയോഗത്തിന് വിലക്കുണ്ടാകും.

ആദ്യഘട്ടം ഏപ്രില്‍ അഞ്ചിനാരംഭിച്ച് 13ന് അവസാനിക്കുകയും രണ്ടാംഘട്ടം 25ന് ആരംഭിച്ച് മേയ് രണ്ടിന് അവസാനിക്കുകയും ചെയ്യും. 14 ദിവസമാണ് മൂല്യനിര്‍ണയം നടക്കുക. 9.30 മുതല്‍ 4.30 വരെയാണ് ക്യാമ്പ്. 9.30 മുതലും 1.30 മുതലും രണ്ടരമണിക്കൂര്‍ മൂല്യനിര്‍ണയവും അതിനുശേഷം അരമണിക്കൂര്‍ മാര്‍ക്ക് ടാബുലേഷനുമാണ്. ഇതിനിടയില്‍ 12.30 മുതല്‍ 1.30 വരെ ഇടവേളയാണ്.

നിശ്ചയിച്ച സമയം മുഴുവന്‍ മൂല്യനിര്‍ണയത്തിന് വിനിയോഗിക്കണം. മൂല്യനിര്‍ണയം വേഗത്തില്‍ പൂര്‍ത്തിയാക്കി പുറത്തിറങ്ങി നടക്കുന്നവര്‍ക്കെതിരേ കര്‍ശന നടപടിക്കും ശുപാര്‍ശയുണ്ട്. ഒന്നരമണിക്കൂര്‍ ദൈര്‍ഘ്യമുള്ള പരീക്ഷകളുടെ 36 ഉത്തരക്കടലാസും രണ്ടരമണിക്കൂര്‍ ദൈര്‍ഘ്യമുള്ളവയുടെ 24 ഉത്തരക്കടലാസുമാണ് ഒരുദിവസം മൂല്യനിര്‍ണയം നടത്തേണ്ടത്.

ബാലാവകാശ കമ്മിഷന്റെ ഉത്തരവുള്ളതിനാല്‍ പെന്‍സില്‍ ഉപയോഗിച്ചുമാത്രമേ മൂല്യനിര്‍ണയം നടത്താവൂ. അസിസ്റ്റന്റ് എക്‌സാമിനര്‍മാര്‍ മൂല്യനിര്‍ണയം നടത്തിയവയില്‍നിന്ന് 20 ശതമാനം ഉത്തരക്കടലാസുകള്‍ അഡീഷണല്‍ ചീഫ് എക്‌സാമിനര്‍മാര്‍ പുനര്‍മൂല്യനിര്‍ണയം ചെയ്യും.

കാഴ്ചക്കുറവുള്ളവരെയും ശാരീരിക അംഗവൈകല്യംമൂലം കൈകകള്‍ ചലിപ്പിക്കാന്‍ കഴിയാത്തവരെയും ഗ്രാഫ്, ഡയഗ്രംസ്, ഡ്രോയിങ്, ജ്യോമെട്രിക്കല്‍ ഫിഗേഴ്‌സ് തുടങ്ങിയ ചോദ്യങ്ങള്‍ക്ക് ഉത്തരമെഴുതുന്നതില്‍ ഇളവുനല്‍കിയിട്ടുള്ളതിനാല്‍ മറ്റു ചോദ്യങ്ങള്‍ക്കു ലഭിച്ച മാര്‍ക്കിന്റെ ആനുപാതിക സ്‌കോര്‍ നല്‍കി ആകെ മാര്‍ക്ക് കണ്ടെത്തണം.

കേള്‍വിക്കുറവുള്ളവര്‍ക്കും ബുദ്ധിമാന്ദ്യമുള്ളവര്‍ക്കും ലഭിച്ച മാര്‍ക്കിന്റെ 25 ശതമാനം അധികം സ്‌കോര്‍ നല്‍കാം.