സിറ്റിങ് സീറ്റ് നിഷേധിക്കപ്പെട്ടതില്‍ അതൃപ്തി പ്രകടിപ്പിച്ച കെ.വി. തോമസിനെ അനുനയിപ്പിക്കാന്‍ ഹൈക്കമാന്‍ഡ് 3 വാഗ്ദാനങ്ങള്‍ നല്‍കിയെന്നു സൂചന. യുഡിഎഫ് കണ്‍വീനര്‍ പദവി, എഐസിസി ഉത്തരവാദിത്തം, പാര്‍ലമെന്ററി ദൗത്യം എന്നിവയാണിത്. ഹൈക്കമാന്‍ഡ് നിര്‍ദേശമനുസരിച്ചു തോമസുമായി കേരളത്തിന്റെ ചുമതലയുള്ള ജനറല്‍ സെക്രട്ടറി മുകുള്‍ വാസ്‌നിക് നടത്തിയ കൂടിക്കാഴ്ചയിലാണ് ഇവ ചര്‍ച്ചാവിഷയമായത്.
സ്ഥാനാര്‍ഥിയായതോടെ ബെന്നി ബഹനാന്‍ യുഡിഎഫ് കണ്‍വീനര്‍ സ്ഥാനം ഒഴിയും. ഈ പദവിയാണ് ഒരു സാധ്യത. എഐസിസി നേതൃത്വത്തില്‍ എ.കെ. ആന്റണി, ഉമ്മന്‍ ചാണ്ടി, കെ.സി. വേണുഗോപാല്‍, പി.സി. ചാക്കോ എന്നിവര്‍ ഇപ്പോള്‍ തന്നെയുണ്ടെങ്കിലും മുതിര്‍ന്ന നേതാവിനു യോജിച്ച പദവി നല്‍കാമെന്നും ഹൈക്കമാന്‍ഡ് പറയുന്നു.
നിയമസഭയിലേക്കു മത്സരിക്കണമോയെന്നു കെ.വി. തോമസിനു തീരുമാനിക്കാം. പാര്‍ലമെന്ററി ദൗത്യം തുടരുന്നതില്‍ തടസ്സമുണ്ടാവില്ലെന്നാണു വാസ്‌നിക് പറഞ്ഞതെങ്കിലും ഇതില്‍ രാജ്യസഭാ സീറ്റ് ഉള്‍പ്പെടുമോയെന്ന് വ്യക്തമല്ല. ഇന്നു യുപിഎ അധ്യക്ഷ സോണിയ ഗാന്ധിയുമായി തോമസ് കൂടിക്കാഴ്ച നടത്തും.
സിറ്റിങ് എംപിമാര്‍ക്കെല്ലാം സീറ്റു നല്‍കുകയെന്ന പൊതുധാരണ കെ.വി. തോമസിന്റെ കാര്യത്തില്‍ മാത്രമാണു പാലിക്കാതിരുന്നത്. അവസാന നിമിഷം വരെ പട്ടികയിലുണ്ടായിരുന്ന തോമസിനു തടസ്സമായതു ഡിസിസിയുടെയും ജില്ലയില്‍ നിന്നുള്ള എംഎല്‍എമാരുടെയും എതിര്‍പ്പാണ്. പി. രാജീവ് ഇടതു സ്ഥാനാര്‍ഥിയായതോടെ സാഹചര്യങ്ങള്‍ മാറിയെന്നും തോമസിന് ജയസാധ്യത കുറവാണെന്നുമുള്ള നിലപാട് സംസ്ഥാന നേതൃത്വവും സ്വീകരിച്ചു. ഉമ്മന്‍ ചാണ്ടി, രമേശ് ചെന്നിത്തല എന്നിവരും ഈ അഭിപ്രായത്തില്‍ ഉറച്ചുനിന്നു.

ഗ്രൂപ്പ് അനുഭാവിയല്ലെങ്കിലും പിന്തള്ളപ്പെടില്ലെന്ന ആത്മവിശ്വാസത്തിലായിരുന്നു തോമസ്. ഹൈബി ഈഡനെ സ്ഥാനാര്‍ഥിയാക്കുമെന്ന വാര്‍ത്ത പരന്നപ്പോഴും അന്തിമതീരുമാനം എതിരാവില്ലെന്ന ധാരണയിലായിരുന്നു അദ്ദേഹം. മുന്‍കൂട്ടി തീരുമാനമെടുത്ത ശേഷം തന്നെ ബോധപൂര്‍വം ഒറ്റപ്പെടുത്തിയെന്ന തോന്നലാണ് തോമസിനെ പ്രകോപിപ്പിച്ചത്.
തോമസിനെ ഒറ്റപ്പെടുത്തുന്നതിനോടു യോജിപ്പില്ലാതിരുന്ന സോണിയ ഗാന്ധി, വിശ്വസ്തനായ നേതാവിനെ പിണക്കി അയയ്ക്കരുതെന്നു നിര്‍ദേശം നല്‍കി. പ്രതിപക്ഷ നേതാവ് രമേശ് ചെന്നിത്തല തോമസിന്റെ വസതിയിലെത്തി കൂടിക്കാഴ്ച നടത്തിയത് ഇതിനു പിന്നാലെയാണ്.