ശബരിമല, പെരിയ കൊലപാതകം, ഷുക്കൂര്വധം, ബന്ധുനിയമനം അങ്ങനെ രാഷ്ട്രീയ കാലാവസ്ഥ എല്ലാംകൊണ്ടും അനുകൂലമായിട്ടും കോണ്ഗ്രസ് നേതാക്കള് പാളയത്തില് പടതുടരുന്നു...
ശബരിമല, പെരിയ കൊലപാതകം, ഷുക്കൂര്വധം, ബന്ധുനിയമനം അങ്ങനെ രാഷ്ട്രീയ കാലാവസ്ഥ എല്ലാംകൊണ്ടും അനുകൂലമായിട്ടും കോണ്ഗ്രസ് നേതാക്കള് പാളയത്തില് പടതുടരുന്നു... ഭൂരിഭാഗം നേതാക്കളും പ്രവര്ത്തകരും അണികളും ആശങ്കയിലാണ്. എന്നാല് ഇതൊക്കെ പാര്ട്ടിയില് പതിവാണെന്നും ക്ളൈമാക്സില് കുതിച്ച്കയറി വെന്നിക്കൊടി പാറിക്കുമെന്നുമാണ് കെ.പി.സി.സിയിലെ പല നേതാക്കളും പറയുന്നത്. വയനാട് സീറ്റിനെ ചൊല്ലിയുള്ള തര്ക്കമാണ് പാര്ട്ടിക്ക് മോശം പ്രതിച്ഛായ സൃഷ്ടിക്കുന്നത്. കോട്ടയം സീറ്റിന്റെയും ലീഗിന്റെ മൂന്നാം സീറ്റിന്റെയും പേരില് തുടങ്ങിയ തര്ക്കം പെട്ടെന്ന് പരിഹരിച്ചിരുന്നു. അതിന് പിന്നാലെ പി.ജെ. ജോസഫ് ഇടഞ്ഞു. ഇടുക്കിയില് തനിക്ക് മത്സരിക്കണമെന്നായിരുന്നു ജോസഫിന്റെ ആവശ്യം.
ജയസാധ്യത കൂടി പരിഗണിച്ച് കോണ്ഗ്രസ് അതിന് വഴങ്ങി. എന്നാല് ഹൈക്കമാന്ഡ് കട്ടക്കലിപ്പിലായി. അതോടെ നേതൃത്വം എല്ലാം വെച്ചുകെട്ടി. ഹൈക്കമാന്ഡ് നേതാക്കളെ ഡല്ഹിക്ക് വിളിപ്പിച്ചു. അവിടെയും അടി തുടര്ന്നു. ഇതിനിടെയില് എല്.ഡി.എഫ് പ്രചാരണത്തില് ഒരു വള്ളപ്പാടകലെ മുന്നിലെത്തി. സിറ്റിംഗ് എം.പി കെ.വി തോമസിന് സീറ്റ് നിഷേധിച്ചതോടെ അദ്ദേഹം പൊട്ടിത്തെറിച്ചതും ബി.ജെ.പിയിലേക്ക് പോകുമെന്ന് സൂചന നല്കിയതും തിരിച്ചടിയായി. സിറ്റിംഗ്് എം.പിമാര്ക്ക് സീറ്റ് നല്കുമെന്ന് ആദ്യമേ ഹൈക്കമാന്ഡ് പ്രഖ്യാപിച്ചെങ്കിലും കേരളത്തിലെ നേതാക്കളും എറണാകുളം ഡി.സി.സിയും മണ്ഡലത്തിലെ ഏഴ് എം.എല്.എമാരും തോമസ് മാഷിന് നൈനായിട്ട് പണി കൊടുത്തു. ഇക്കാര്യം നേരത്തെ പറഞ്ഞ് അദ്ദേഹത്തിന് മറ്റ് ഉറപ്പുകള് കൊടുത്തിരുന്നെങ്കില് പൊട്ടലും ചീറ്റലും ഒഴിവാക്കാമായിരുന്നു.
പാലക്കാട് കെ.വി ശ്രീകണ്ഠനാണ് സ്ഥാനാര്ത്ഥി. എന്നാല് മണ്ഡലത്തിലെ പലയിടങ്ങളിലും ഷാഫി പറമ്പിലിനെ സ്ഥാനാര്ത്ഥിയായി പ്രഖ്യാപിച്ച് പോസ്റ്ററുകള് പതിപ്പിച്ചത് പ്രവര്ത്തകര്ക്കിടിയല് ആശയക്കുഴപ്പമുണ്ടാക്കി. പത്തനംതിട്ടയില് ആന്റോ ആന്റണിയെ സ്ഥാനാര്ത്ഥിയാക്കരുതെന്ന് ഡി.സി.സി പ്രമേയം പാസാക്കിയിരുന്നു. എന്നിട്ടും സ്ഥാനാര്ത്ഥിയാക്കിയത് പ്രചരണത്തെ ബാധിക്കുമെന്ന് ആശങ്കയുണ്ട്. ജില്ലയില് നിന്നുള്ള നേതാവിനെ തന്നെ സ്ഥാനാര്ത്ഥിയാക്കണമെന്നായിരുന്നു അവരുടെ ആവശ്യം. കാസര്കോട്ട് സുബ്ബറാവുവിന് പകരം രാജ്മോഹന് ഉണ്ണിത്താനെ സ്ഥാനാര്ത്ഥിയാക്കയതും പ്രതിഷേധത്തിനിടയാക്കി. പ്രാദേശികവികാരം കോണ്ഗ്രസില് ശക്തിപ്പെടുന്നതില് നേതൃത്വത്തിന് ആശങ്കയുണ്ട്.
വയനാട് സീറ്റിനെ ചൊല്ലിയുടെ തര്ക്കമാണ് ഏറ്റവും രൂക്ഷം. ചെന്നിത്തലയും ഉമ്മന്ചാണ്ടിയും യാതൊരുതരത്തിലുമുള്ള ഒത്തുതീര്പ്പിന് തയ്യാറാകാത്തതും ഇരുവരും പാതിവഴിയില് ചര്ച്ച ഉപേക്ഷിച്ചതും ഐക്യത്തെ ബാധിച്ചു. പ്രശ്നങ്ങള് പരിഹരിക്കുന്നതില് കെ.പി.സി.സി അധ്യക്ഷന് അത്ര കരുത്ത് പോരാ. മത്സരരംഗത്തോട് അടുക്കുന്തോറും പാര്ട്ടിയില് എല്ലാം ശരിയാകുമെന്ന ഉറച്ചവിശ്വാസത്തിലാണ് നേതാക്കള്. എന്നാല് പാളയത്തിലെ പട ആശങ്കസൃഷ്ടിക്കുന്നുണ്ട്. പരസ്പ്പരം കാലുവാരിയാല് സി.പി.എമ്മിന് ഏറെ ഗുണം ചെയ്യും. കാരണം 16 സീറ്റിലാണ് അവര് മത്സരിക്കുന്നത്. അതുകൊണ്ട് ഇതുവരെയുളളതെല്ലാം പരിഹരിച്ച് ഒത്തൊരുമിച്ച് മുന്നേറണമെന്നാണ് ഹൈക്കമാന്ഡ് നല്കിയിരിക്കുന്ന നിര്ദ്ദേശം.
https://www.facebook.com/Malayalivartha
