അയ്യപ്പഭക്തരുടെ വാഹനങ്ങള്‍ തല്ലിതകര്‍ത്ത സംഭവത്തില്‍ പൊലീസിന് വീണ്ടും ഹൈക്കോടതിയുടെ വിമര്‍ശനം. അത് പിണാറായി വിജയന് ആഭ്യന്തര വകുപ്പിനുള്ള തിരിച്ചടിയായി. അന്വേഷണത്തിന് പോലിസിന് ഉദാസീനതയെന്ന് കോടതി. പോലീസിന്റെ നടപടി അപലപനീയമെന്നും കോടതി വിലയിരുത്തി. തെളിവുകള്‍ ഉണ്ടായിട്ടും എന്തുകൊണ്ട് പോലീസുകാരെ തിരിച്ചറിയാനായില്ലെന്നും കോടതി ആരാഞ്ഞു.

സംഭവത്തിന്റെ വീഡിയോയടക്കമുള്ള തെളിവുകള്‍ പോലീസിന് ലഭിച്ചിരുന്നു. എന്നിട്ടും എന്ത് കൊണ്ടാണ് പൊലീസുകാരെ തിരിച്ചറിയാന്‍ സാധിക്കാത്തതെന്നും കോടതി ചോദിച്ചു. ഇനിയും പോലീസിന്റെ മെല്ലെപ്പോക്ക് തുടര്‍ന്നാല്‍ അന്വേഷണത്തിന് വേറെ ഏജന്‍സിയെ ഏല്പിക്കുന്ന കാര്യം ആലോചിക്കുമെന്നും കോടതി പറഞ്ഞു. അതേസമയം, സര്‍ക്കാര്‍ സത്യവാങ്മൂലം ഫയല്‍ ചെയ്യാന്‍ വിണ്ടും രണ്ടാഴ്ച സമയം ആവശ്യപ്പെട്ടു. അതോടൊപ്പം ശബരിമല വികസനത്തിന് വനം വകുപ്പ് തടസം നില്‍ക്കുന്നതായി ദേവസ്വം ബോര്‍ഡ് പ്രസിഡണ്ടിനും പറയേണ്ടി വന്നു. ഹൈ പവര്‍ കമ്മറ്റി യില്‍ എടുക്കുന്ന തീരുമാനങ്ങള്‍ നടപ്പിലാക്കുന്നതില്‍ നിന്നും വനം വകുപ്പ് പിന്നോട്ട് പോകുന്നു. ശബരിമല വികസനത്തിന് എതിരായ നിലപാടാണ് വനംവകുപ്പിന്റെതെന്നും, ഇതിനെതിരെ പരാതി നല്‍കുമെന്നും ദേവസ്വം ബോര്‍ഡ് പ്രസിഡന്റ് എ പത്മകുമാര്‍ പറഞ്ഞു. നിലവില്‍ 63 ഏക്കര്‍ വനഭൂമി ശബരിമലയില്‍ ദേവസ്വം ബോര്‍ഡിന് ഉണ്ടെന്ന് സംയുക്ത സര്‍വ്വെയില്‍ കണ്ടെത്തി. എന്നാല്‍, പല സമയങ്ങളില്‍ അനുവദിച്ചതുള്‍പ്പെടെ 95 ഏക്കര്‍ ഭൂമിയാണ് ദേവസ്വത്തിനുള്ളതെന്ന വാദം വനം വകുപ്പ് തള്ളി. ഇത് ലഭിക്കാന്‍ സുപ്രീംകോടതിയെ സമീപിക്കാനാണ് ദേവസ്വം ബോര്‍ഡിന്റെ തീരുമാനം. ഇതിന് പിന്നാലെയാണ് മണല്‍ വിഷയത്തിലെ തര്‍ക്കം. പ്രളയത്തില്‍ പമ്പയില്‍ അടിഞ്ഞ മണല്‍ നിര്‍മ്മാണങ്ങള്‍ക്കായി ഉപയോഗിക്കാന്‍ ദേവസ്വം ബോര്‍ഡിന് വനം വകുപ്പ് ഉന്നതതല യോഗത്തില്‍ അനുവാദം നല്‍കി. എന്നാല്‍ ഈ മണലിന് 6 കോടി 76 ലക്ഷം രൂപ വേണമെന്നാവശ്യപ്പെട്ട് വനംവകുപ്പ് ദേവസ്വം ബോര്‍ഡിന് നോട്ടീസ് അയച്ചു. വനംവകുപ്പിനെതിരെ മുഖ്യമന്ത്രിയ്ക്ക് പരാതി നല്‍കാനാണ് ദേവസ്വം ബോര്‍ഡിന്റെ തീരുമാനം. സംയുക്ത തീരുമാനങ്ങള്‍ വനം വകുപ്പിലെ ചില ഉദ്യോഗസ്ഥര്‍ അട്ടിമറിക്കുന്നതായാണ് ദേവസ്വം ബോര്‍ഡ് പ്രസിഡന്റിന്റെ ആരോപണം. പമ്പയില്‍ നിന്ന് റോപ് വെ നിര്‍മ്മിക്കാന്‍ തൂണുകള്‍ സ്ഥാപിക്കാനുള്ളത് വനം വകുപ്പിന്റെ ഭൂമിയിലാണ്. എന്നാല്‍ അതിനായ് മണ്ണ് ടെസ്റ്റ് ചെയ്യാന്‍ വനം വകുപ്പ് അനുവാദം വൈകിപ്പിക്കുന്നതായും ആക്ഷേപം ഉണ്ട്.