തൃപ്പൂണിത്തുറ മില്‍മ ജീവനക്കാരനും ചോറ്റാനിക്കര സ്വദേശിയുമായ തലക്കോട് ചീറനാട്ടുപറമ്പില്‍ മനോഹരന്‍ , മറ്റൊരാളുടെ വാഹന നമ്പറില്‍ തനിയ്ക്ക് വാഹന ലോണ്‍ അനുവദിച്ചതിനെത്തുടര്‍ന്ന് വെട്ടിലായി. ആര്‍സി ബുക്കിലെ നമ്പറും അനുബന്ധ രേഖകളിലെ നമ്പറും വ്യത്യസ്തമായതാണ് പ്രശ്‌നമായത്.

പ്രശ്‌നം പരിഹരിച്ച് തരാന്‍ ലോണ്‍ നല്‍കിയ സ്ഥാപനമോ മോട്ടോര്‍ വകുപ്പോ പോലീസോ തയാറാകുന്നില്ലെന്ന് പറഞ്ഞുകൊണ്ട് ഇന്നലെ എസ്പിക്ക് പരാതി നല്‍കി. വാഹനം വാങ്ങി ആറ് മാസം കഴിഞ്ഞപ്പോഴാണ് തനിക്ക് പറ്റിയ അമളി തിരിച്ചറിഞ്ഞത്. എന്നാല്‍ തെറ്റ് തിരുത്തി തരേണ്ടതിനു പകരം ഇപ്പോള്‍ ഭീഷണിപ്പെടുത്തുകയാണ് ചെയ്യുന്നതെന്ന് എസ്പിക്കു നല്‍കിയ പരാതിയില്‍ പറയുന്നു.

തിരുവാണിയൂരിലെ എല്‍എംഎല്‍ (ഹീറോ) മോട്ടോഴ്‌സില്‍നിന്നാണ് ഇരുചക്ര വാഹനം 2017 ഓഗസ്റ്റ്-10 ന് വാങ്ങുന്നത്. കെഎല്‍ 39 എല്‍ 5718 എന്ന നമ്പറിലാണ് രജിസ്റ്റര്‍ ചെയ്തത്. ആദ്യ ഗഡു 10,000 രൂപയും തവണ വ്യവസ്ഥയില്‍ 36 മാസം 2,520 രൂപയും അടയ്ക്കാനുമാണ് ഹിന്ദുജ ഫിനാന്‍സ് എന്ന സ്ഥാപനവുമായി ധാരണയുണ്ടായത്. ബാങ്ക് ചെക്ക് ലീഫുകള്‍ ഒപ്പിട്ടു നല്‍കിയ പ്രകാരം രണ്ടു മാസം മോഹനന്റെ അക്കൗണ്ടില്‍നിന്ന് 5,040 രൂപ സ്ഥാപനം പിന്‍വലിക്കുകയും ചെയ്തു.

എന്നാല്‍ ബാങ്ക് അക്കൗണ്ടില്‍നിന്ന് തുക പിന്നീട് പിന്‍വലിക്കാനാകുന്നില്ലെന്ന് പറഞ്ഞതിനാല്‍ അഞ്ച് മാസത്തെ ഗഡു ഏജന്റിനു നേരിട്ട് നല്‍കി രസീത് വാങ്ങി. ഇതിനുശേഷം ലഭിച്ച ഫിനാന്‍സ് സ്റ്റേറ്റ്‌മെന്റിലാണ് വാഹന നമ്പര്‍ തെറ്റായി രേഖപ്പെടുത്തിയതായി കണ്ടത്. എന്നാല്‍ വാരിയം റോഡിലുള്ള ഹിന്ദുജ ലേലാന്റ് ഫിനാന്‍സ് ലിമിറ്റഡ് എന്ന സ്ഥാപനം ഇത് അംഗീകരിക്കാന്‍ തയാറാകുന്നില്ലെന്ന് പരാതിയില്‍ പറയുന്നു. പകരം ഭീഷണിപ്പെടുത്തി തുക അടപ്പിക്കാനാണ് ഇവരുടെ ശ്രമം.

രേഖകളില്‍ നല്‍കിയിരിക്കുന്ന നമ്പറായ കെഎല്‍ 42 എന്‍ 3757 എന്നത് പറവൂര്‍ ചേന്ദമംഗലം സ്വദേശിയുടെ പേരിലാണ് ഉള്ളത്. ആ വാഹന ഉടമയ്ക്ക് ഫിനാന്‍സ് കമ്പനിയുമായി ബന്ധമില്ലെന്നാണ് പറയുന്നത്. ചോറ്റാനിക്കര പോലീസ് സ്റ്റേഷനില്‍ രണ്ട് തവണ, തൃപ്പൂണിത്തുറ ആര്‍ടിഒ, മൂവാറ്റുപുഴ ഡിവൈഎസ്പി എന്നിവര്‍ക്ക് പലപ്പോഴായി പരാതി നല്‍കിയെങ്കിലും ഫലമുണ്ടാകുന്നില്ലെന്ന് പരാതിക്കാരനായ സി.ഡി. മോഹനന്‍ പറയുന്നു.

പ്രസവ സമയത്ത് അനസ്തീഷ്യ നല്‍കിയതുമായി ബന്ധപ്പെട്ട് മോഹനന്റെ ഭാര്യ കിടപ്പിലാണ്. ചോറ്റാനിക്കര പോലീസും ആര്‍ടിഒയും കൈവിട്ട സ്ഥിതിക്ക് ആലുവ എസ്പി ഇടപെട്ട് നീതി നടപ്പാക്കുമെന്ന പ്രതീക്ഷയിലാണ് മോഹനന്‍.