ദക്ഷിണേന്ത്യന് വനങ്ങളിലെ ഏകീകൃത കഴുകന് സര്വേ ഏപ്രിലില്
കര്ണാടകയിലെ ബന്ദിപ്പുര, നാഗര്ഹോള, തമിഴ്നാട്ടിലെ മുതുമല കടുവാസങ്കേതങ്ങളിലും വയനാട് വന്യജീവി സ്ങ്കേതത്തിലെ കുറിച്യാട് റേഞ്ചിലും ഉണ്ടായ തീപിടിത്തത്തെ തുടര്ന്ന് മാറ്റിവച്ച ഏകീകൃത കഴുകന് സര്വേ ദക്ഷിണേന്ത്യന് വനങ്ങളില് ഏപ്രിലില് നടത്തും.ആന്ധ്രപ്രദേശ്, കര്ണാടക, തമിഴ്നാട്, കേരളം എന്നീ സംസ്ഥാനങ്ങളില് കഴുകന്മാരുടെ സാന്നിധ്യമുള്ള വനമേഖലകളില്, വള്ച്ചര് കണ്സര്വേഷന് വര്ക്കിംഗ് ഗ്രൂപ്പ് ഫെബ്രുവരി-മാര്ച്ച് മാസങ്ങളില് നടത്താനിരുന്ന സര്വേയാണ് ഏപ്രിലിലേക്കു മാറ്റിയത്.
ദക്ഷിണേന്ത്യന് വനങ്ങളില്, പ്രത്യേകിച്ചും കാട്ടുതീ വന് നാശം വിതച്ച പ്രദേശങ്ങളില് വേനല്മഴ ലഭിച്ചതിനുശേഷം സര്വേ തീയതി തീരുമാനിക്കുമെന്ന് വര്ക്കിംഗ് ഗ്രൂപ്പ് മെമ്പറും കണ്സര്വേഷന് ബയോളജിസ്റ്റുമായ സി.കെ. വിഷ്ണുദാസ് പറഞ്ഞു. ദിവസം 100 കിലോമീറ്റര് വരെ സഞ്ചരിക്കുന്ന പക്ഷിയാണ് കഴുകന്.
തെന്നിന്ത്യയില് വയനാട് വന്യജീവി സങ്കേതം, തമിഴ്നാട്ടിലെ മുതുമല കടുവ സങ്കേതം, സത്യമംഗലം വനം, കര്ണാടകയിലെ ബന്ദിപ്പുര കടുവ സങ്കേതം, നാഗര്ഹോള ദേശീയോദ്യാനം, ആന്ധ്രപ്രദേശിലെ ശ്രീശൈലം എന്നിവിടങ്ങളിലാണ് പ്രധാനമായും കഴുകന്മാരുള്ളത്. കഴുകന്മാരെ ഇനം തിരിച്ച് അറിയുന്നതില് പാടവമുള്ള 250 ഓളം പേരാണ് നാലു സംസ്ഥാനങ്ങളിലുമായി സര്വേയില് പങ്കെടുക്കുക.
വയനാട്ടില് സി.കെ. വിഷ്ണുദാസ്, പക്ഷിശാസ്ത്രജ്ഞന് സി. ശശികുമാര്, തമിഴ്നാട്ടില് വര്ക്കിംഗ് ഗ്രൂപ്പ് കോ ഓര്ഡിനേറ്ററുമായ കണ്സര്വേഷന് ബയോളജിസ്റ്റ് ഭാരതിദാസന്, കര്ണാടകയില് വൈല്ഡ് ലൈഫ് കണ്സര്വേഷന് ഫൗണ്ടേഷന് മേധാവി രാജ്കുമാര് ദേവരാജെ അര്സ്, ആന്ധ്രപ്രദേശില് പക്ഷി ശാസ്ത്രജ്ഞനും പരിസ്ഥിതി പ്രവര്ത്തകനുമായ ഹുസൈന് എന്നിവര് സര്വേയ്ക്കു നേതൃത്വം നല്കും. വയനാട്ടില് മാത്രം 35 പേര് സര്വേ ടീമിലുണ്ടാകും.
തവിട്ടുകഴുകന്, ചുട്ടിക്കഴുകന്, കാതിലക്കഴുകന്, തോട്ടിക്കഴുകന് എന്നിവയാണ് ദക്ഷിണേന്ത്യയില് കാണുന്ന മുഖ്യ കഴുകന് ഇനങ്ങള്. നീലഗിരി ജൈവമണ്ഡലത്തിന്റെ ഭാഗമായ വനപ്രദേശങ്ങളില് കരിങ്കഴുകന്(യൂറേഷ്യന് ബ്ലാക്ക് വള്ച്ചര്), ഹിമാലയന് കഴുകന് എന്നീ ഇനങ്ങളുടെ സാന്നിധ്യവും സ്ഥിരീകരിച്ചിട്ടുണ്ട്.
https://www.facebook.com/Malayalivartha
