നമ്മുടെ സ്വന്തം തലസ്ഥാനത്തിന് മുകളിലൂടെ കഴിഞ്ഞ ദിവസം ഡ്രോണ്‍ പറന്ന് നടന്നത് സംസ്ഥാനത്തെ വല്ലാതെ ഞെട്ടിച്ചിരിക്കുകയാണ്. അതീവ സുരക്ഷാ മേഖലയില്‍ അര്‍ദ്ധരാത്രിയില്‍ ഡ്രോണ്‍ പറന്നത് സുരക്ഷാ ഉദ്യോഗസ്ഥരെ ഞെട്ടിച്ചിരിക്കുകയാണ്. നമ്മുടെ സുരക്ഷാ സംവിധാനം ഉറങ്ങിപ്പോയോയെന്നാണ് ഉയരുന്ന ചോദ്യം.

തലസ്ഥാനത്ത് കോവളം മുതല്‍ വി.എസ്.എസ്.സി ഉള്‍പ്പെടുന്ന തുമ്പ വരെയാണ് മണിക്കൂറുകളോളം ആകാശത്ത് ഡ്രോണ്‍ പറന്നത്. വെള്ളിയാഴ്ച അര്‍ദ്ധരാത്രി 12.45നാണ് കോവളം സമുദ്രാ ബീച്ചിന് സമീപം ഡ്രോണ്‍ താഴ്ന്നു പറക്കുന്നത് പൊലീസിന്റെ പട്രോളിംഗ് സംഘം കണ്ടത്. 2.55ന് വി.എസ്.എസ്.സിക്ക് അടുത്ത് കാണപ്പെട്ടു. ജനവാസ മേഖലയിലായതിനാല്‍ സി.ഐ.എസ്.എഫ് ജവാന്മാര്‍ വെടിവച്ചിട്ടില്ല. പിന്നീട് അപ്രത്യക്ഷമായി. പൊലീസും മറ്റ് ഏജന്‍സികളും ഇന്നലെ മുഴുവന്‍ അരിച്ചുപെറുക്കിയിട്ടും ഡ്രോണ്‍ കണ്ടെത്താനായിട്ടില്ല.തന്ത്രപ്രധാന മേഖലകളിലൂടെ ഡ്രോണ്‍ പറന്നത് കണ്ടയുടന്‍ പൊലീസ് വിമാനത്താവളത്തിനും ദക്ഷിണ വ്യോമകമാന്‍ഡിനും പാങ്ങോട് കരസേനാ സ്‌റ്റേഷനും വി.എസ്.എസ്.സിക്കും ജാഗ്രതാനിര്‍ദ്ദേശം നല്‍കി.

എന്താണ് ഡ്രോണ്‍?

ക്യാമറ സംവിധാനമുള്ള ചെറു വിമാനങ്ങളാണ് ഡ്രോണുകള്‍. മനുഷ്യനോ കമ്പ്യൂട്ടറിനോ റിമോട്ട് കണ്‍ട്രോളുപയോഗിച്ച് ഇത് നിയന്ത്രിക്കാനാകും എന്നതാണ് ഏറ്റവും വലിയ പ്രത്യേകത. നിരീക്ഷണത്തിനും ചാരപ്പണിക്കും വ്യോമാക്രമണത്തിനും പോലും ഡ്രോണുകള്‍ ഉപയോഗിക്കുന്നു. കേരളത്തില്‍ വിവാഹം, അവാര്‍ഡ് നിശകള്‍ എന്നിവയെല്ലാം ഡ്രോണുപയോഗിച്ച് ചിത്രീകരിക്കുന്നു. വിമാനത്താവളങ്ങളുടെ അഞ്ച് കിലോമീറ്റര്‍, സെക്രട്ടറിയേറ്റിന്റെ മൂന്ന് കിലോമീറ്റര്‍ പരിധിയില്‍ ഡ്രോണിന് നിരോധനം. പ്രതിരോധ സ്ഥാപനങ്ങള്‍ക്കു മുകളിലൂടെ പറത്താനാവില്ല. 250ഗ്രാമിന് മുകളില്‍ ഭാരമുള്ള ഡ്രോണുകള്‍ക്ക് രജിസ്‌ട്രേഷന്‍ നിര്‍ബന്ധം. 27,000 മുതല്‍ 5ലക്ഷം വരെയാണ് ഇതിന്റെ വില.

എന്തായാലും അര്‍ദ്ധരാത്രിയിലെ ഡ്രോണ്‍ പറക്കല്‍ അതീവ ജാഗ്രതയോടെയാണ് സംസ്ഥാന കേന്ദ്ര രഹസ്യാന്വേഷണ ഏജന്‍സികള്‍. സംഭവം നടന്നയുടന്‍ കേന്ദ്ര ഏജന്‍സികളെ വിവരമറിയിച്ചു. സൈനിക ഉദ്യോഗസ്ഥരും പൊലീസു്യോഗസ്ഥരും കൂടിക്കാഴ്ച നടത്തി. തുര്‍ന്ന് സൈന്യം അതീവജാഗ്രത പ്രഖ്യാപിച്ചു. കേന്ദ്ര ഇന്റലിജന്‍സ്, മിലിട്ടറി പൊലീസ്, റാ ഉദ്യോഗസ്ഥര്‍ അന്വേഷണം ആരംഭിച്ചു.വ്യോമസേനയുടെ മൂക്കുന്നിമലയിലെയും ദക്ഷിണവ്യോമ കമാന്‍ഡിലെയും റഡാര്‍ രേഖകള്‍ പരിശോധിച്ചെങ്കിലും ഡ്രോണിന്റെ വിവരങ്ങള്‍ ലഭിച്ചില്ല. വിമാനത്താവളത്തിലെ റഡാറിലും ഡ്രോണ്‍ പതിഞ്ഞില്ല.

ഉപഗ്രഹ ക്യാമറകള്‍ പരിശോധിച്ച് ഡ്രോണ്‍ കണ്ടെത്താന്‍ ഐ.എസ്.ആര്‍.ഒയുടെ സഹായം തേടിയിട്ടുണ്ട്.കൊച്ചി നാവിക ആസ്ഥാനത്തെ റഡാറിലെ വിവരങ്ങളും ശേഖരിക്കുന്നുണ്ട്. കോസ്റ്റ്ഗാര്‍ഡും തീരദേശപൊലീസും കടലിലും പരിശോധന നടത്തി. ഡ്രോണ്‍ പറത്തിയവരെ കണ്ടെത്താന്‍ സിറ്റി പൊലീസും അന്വേഷണം തുടങ്ങി.

മൊബൈല്‍ ടവര്‍ കേന്ദ്രീകരിച്ച് സൈബര്‍ സെല്ലിന്റെ അന്വേഷണവും നടക്കുകയാണ്.സുരക്ഷാ പ്രശ്‌നങ്ങളുണ്ടാവാനിടയില്ലെന്നാണ് പൊലീസിന്റെ വിലയിരുത്തല്‍. 50 മീറ്റര്‍ ഉയരത്തില്‍ മാത്രം പറന്നതിനാലാണ് റഡാറില്‍ പതിയാത്തത്. വി.എസ്.എസ്.സി അടക്കമുള്ള സ്ഥാപനങ്ങള്‍ ഉപഗ്രഹ മാപ്പിംഗ് നടത്തിയിട്ടുള്ളതിനാല്‍ രാത്രി ദൃശ്യങ്ങള്‍ പകര്‍ത്തിയതു കൊണ്ട് പ്രത്യേകിച്ച് ഗുണമില്ല.

സ്വകാര്യ ചടങ്ങുകള്‍ക്കോ ഹോംസ്‌റ്റേയിലോ ആരെങ്കിലും ഉപയോഗിച്ച ഡ്രോണ്‍ നിയന്ത്രണം വിട്ട് സഞ്ചരിച്ച് ബാറ്ററി തീര്‍ന്ന് നിലത്ത് പതിച്ചിരിക്കാമെന്നാണ് പൊലീസിന്റെ നിഗമനം.ഡ്രോണ്‍ കണ്ടെത്താന്‍ തുമ്പ മേഖലയിലുടനീളം പൊലീസ് തെരച്ചില്‍ നടത്തുന്നുണ്ട്. കോവളത്തെ ഹോട്ടലുകളിലും ഹോംസ്‌റ്റേകളിലും റെയ്ഡ് നടത്തിയ പൊലീസ് വിദേശികളെയടക്കം ചോദ്യം ചെയ്‌തെങ്കിലും ഡ്രോണിന്റെ ഉടമയെ കണ്ടെത്താനായില്ല.

വ്യോമസേന നിരീക്ഷണത്തിനായി ഇത്തരം ഡ്രോണുകള്‍ അയയ്ക്കാറുള്ളതിനാല്‍ പൊലീസ് അന്വേഷിച്ചപ്പോള്‍ ഉപയോഗിച്ചിരുന്നില്ലെന്ന് മറുപടി കിട്ടി. ഡ്രോണ്‍ സുരക്ഷാമേഖലയില്‍ കടന്നിട്ടില്ലെന്ന് പ്രതിരോധ വകുപ്പും വിമാനത്താവളത്തിലെത്തിയില്ലെന്ന് പൊലീസും സ്ഥിരീകരിച്ചു.''ഡ്രോണ്‍ കണ്ടെത്താന്‍ റഡാറുകള്‍ വീണ്ടും പരിശോധിക്കും.

ഉപഗ്രഹസഹായവും തേടും. സുരക്ഷാഭീഷണിയില്ല..''മനോജ് എബ്രഹാം,ദക്ഷിണമേഖലാ അഡി. ഡി.ജി.പിചെറുവിമാനത്തിന്റെ പോക്ക്പരമാവധി 150മീറ്റര്‍ അകലെയിരുന്നേ ഡ്രോണ്‍ റിമോട്ട് കണ്‍ട്രോളുപയോഗിച്ച് നിയന്ത്രിക്കാനാവൂ. കോവളത്തുനിന്ന് തുമ്പവരെ 21കിലോമീറ്റര്‍, ഒരിടത്തിരുന്ന് നിയന്ത്രിക്കുക എളുപ്പമല്ലകോവളത്തിരുന്ന് പ്രവര്‍ത്തിപ്പിച്ച ഡ്രോണ്‍ നിയന്ത്രണം വിട്ട് ബാറ്ററി തീരുംവരെ പറന്നതാകാംബാറ്ററിയില്‍ രണ്ടരമണിക്കൂര്‍ തുടര്‍ച്ചയായി പ്രവര്‍ത്തിക്കാന്‍ ഇത്തരം ഡ്രോണുകള്‍ക്കാവും. തുമ്പഭാഗത്ത് ബാറ്ററി ചാര്‍ജ് തീര്‍ന്നപ്പോള്‍ നിലംപതിച്ചതാവാമെന്നും പൊലീസ്വമ്യോസേനയുടെ നിരീക്ഷണ ഡ്രോണ്‍ റൂട്ടില്‍നിന്ന് മാറിപ്പറന്ന് നിലം പതിച്ചതാവാനും സാദ്ധ്യത.