പ്രധാനമന്ത്രി നരേന്ദ്രമോദിയെ പുകഴ്ത്തിയ മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ വെട്ടിലായി. തെരഞ്ഞെടുപ്പ് പ്രചരണത്തിന്റെ ഭാഗമായി കോഴിക്കോട്ടെത്തിയ നരേന്ദ്ര മോദിയെയാണ് മീണ പ്രശംസിച്ചത്. കോഴിക്കോട്ടെ തെരഞ്ഞെടുപ്പ് റാലിയില്‍ പങ്കെടുത്ത പ്രധാനമന്ത്രി ശബരിമല എന്ന വാക്ക് എവിടെയും പറഞ്ഞില്ലെന്ന് ചൂണ്ടിക്കാട്ടിയ ടിക്കാറാം മീണ ഈ ശൈലി എല്ലാവരും മാതൃകയാകണമെന്നും പറഞ്ഞു. എന്നാല്‍ മീണ പറഞ്ഞ് തീരും മുമ്പ് ചാനലുകളില്‍ സ്‌ക്രോളിംഗ വന്നു. കേരളത്തില്‍ അയ്യപ്പന്റെ പേര് ഉച്ചരിക്കാന്‍ പറ്റാത്ത അവസ്ഥ. ശബരിമലയെപ്പറ്റി പറഞ്ഞാല്‍ ജയിലിലടയ്ക്കും. മാതൃകാ പുരുഷന്‍ മോദി തമിഴ്‌നാട്ടിലും കര്‍ണാടകയിലും ശബരിമല തന്നെ പറഞ്ഞു. പിന്നെ ഒരു ദിവസത്തെ ചാനല്‍ ചര്‍ച്ച ശബരിമലയായി. ടിക്കാറാം മീണ മാതൃകയാക്കാന്‍ പറഞ്ഞ പ്രധാനമന്ത്രി തന്നെ ശബരിമല പൊളിച്ചടുക്കിയിരിക്കുകയാണ്. 

ദക്ഷിണേന്ത്യയില്‍ ശബരിമല വിഷയം മുഖ്യപ്രചരണായുധമാക്കിയിരിക്കുകയാണ് പ്രധാനമന്ത്രി മോദി. കേരളത്തില്‍ അയ്യപ്പന്റെ പേര് പറയാന്‍ പറ്റാത്ത അവസ്ഥയാണെന്ന് പ്രധാനമന്ത്രി. കമ്മ്യുണിസ്റ്റുകാര്‍ ഭരിക്കുന്നിടത്താണ് ഈ അവസ്ഥ. ബി.ജെ.പി സ്ഥാനാര്‍ത്ഥിക്ക് ജയിലില്‍ കിടക്കേണ്ടി വന്നുവെന്നും മോഡി പറഞ്ഞു. മംഗലാപുരത്ത് നടന്ന ബി.ജെ.പി തിരഞ്ഞെടുപ്പ് റാലിയില്‍ സംസാരിക്കുകയായിരുന്നു പ്രധാനമന്ത്രി.

ഇന്നലെ കോഴിക്കോട് നടന്ന റാലിയില്‍ ശബരിമലയുടെ പേര് പോലും പ്രധാനമന്ത്രി പരാമര്‍ശിച്ചിരുന്നില്ല. എന്നാല്‍ കേരളത്തിന് പുറത്ത്, പ്രത്യേകിച്ച് ദക്ഷിന്ത്യേ കേന്ദ്രീകരിച്ച് ശബരിമല വിഷയം മുഖ്യ വിഷയമാക്കുകയാണ് ബി.ജെ.പി. നേരത്തെ തമിഴ്‌നാട്ടിലെ തേനിയില്‍ നടന്ന തിരഞ്ഞെടുപ്പ് റാലിയിലും പ്രധാനമന്ത്രി ശബരിമല വിഷയം ഉന്നയിച്ചിരുന്നു. കോണ്‍ഗ്രസും മുസ്ലീം ലീഗും ശബരിമലയെ വച്ച് അപകടകരമായി കളിക്കുകയാണെന്ന് തേനിയില്‍ നടന്ന റാലയില്‍ മോഡി ആരോപിച്ചു. 

വിശ്വാസങ്ങളെയും ആചാരങ്ങളെയും തകര്‍ക്കാനുള്ള അപകടകരമായ നീക്കമാണ് നടന്നതെന്നും മോഡി തേനി റാലിയില്‍ ആരോപിച്ചു. വിശ്വാസങ്ങളെയും ആചാരങ്ങളെയും തകര്‍ക്കാനുള്ള അപകടകരമായ നീക്കമാണ് നടക്കുന്നത്. കേരളത്തില്‍ ബി.ജെ.പി ഉള്ളടത്തോളം അത് നടക്കില്ലെന്ന് മോഡി പറഞ്ഞു. ശബരിമല വിഷയത്തില്‍ കോണ്‍ഗ്രസ്, കമ്മ്യൂണിസ്റ്റ് പാര്‍ട്ടികള്‍ക്കൊപ്പം മുസ്ലീം ലീഗിനെ കൂടി ചേര്‍ത്തുവയ്ക്കുന്നതിലൂടെ ഹൈന്ദവ ഏകീകരണമാണ് മോഡി ലക്ഷ്യം വയ്ക്കുന്നത്. 

കോഴിക്കോട് നടന്ന എന്‍.ഡി.എ തിരഞ്ഞെടുപ്പ് റാലിയിയിലും പ്രധാനമന്ത്രി ശബരിമല വിഷയം ഉന്നയിച്ചിരുന്നു. ആചാരാനുഷ്ടാനങ്ങള്‍ സംരക്ഷിക്കാന്‍ ബി.ജെ.പി ഒപ്പമുണ്ടാകുമെന്ന് പ്രധാനമന്ത്രി പറഞ്ഞു. വിശ്വാസം തകര്‍ക്കുന്ന നടപടിയോട് യോജിക്കാനാവില്ല. സുപ്രീം കോടതി വിധിയുടെ പേരില്‍ പാരമ്പര്യ വിശ്വാസങ്ങളെ തകര്‍ക്കുന്ന നയത്തിനോട് യോജിപ്പില്ലെന്നും പ്രധാനമന്ത്രി ഇന്നലെ കോഴിക്കോട് റാലിയില്‍ പറഞ്ഞു. എന്നാല്‍ ശബരിമല എന്ന് പരാമര്‍ശിക്കാതെയായിരുന്നു പ്രധാനമന്ത്രിയുടെ കോഴിക്കോട് പ്രസംഗം.

അയ്യപ്പന്റെ പേര് പറയാതെ പറയുകയെന്ന ഈ തന്ത്രപരമായ നിലപാടാണ് ബിജെപിക്ക്. അയ്യപ്പന്റെയോ ശബരിമലയുടെയോ പേരുപയോഗിക്കില്ല. എന്നാല്‍, വോട്ടര്‍മാരുടെ ശ്രദ്ധയെല്ലാം ശബരിമലയിലേക്കു തിരിപ്പിക്കുകയും വേണം. പരിശീലനം ലഭിച്ച സ്‌ക്വാഡ് വര്‍ക്കര്‍മാര്‍ ആഴ്ചകള്‍ക്കു മുന്‍പു തന്നെ എല്ലാ മണ്ഡലങ്ങളിലും വീടുവീടാന്തരം കയറി പ്രചാരണം തുടങ്ങിയിരുന്നു.

ടിക്കാറാം മീണയെ എകെജി സെന്ററിലെ ക്ലാര്‍ക്കിന്റെ പണി എടുക്കാന്‍ അനുവദിക്കില്ലെന്നും അയ്യപ്പനു വേണ്ടി രക്തസാക്ഷിത്വം വരിക്കാന്‍ തയ്യാറാണെന്നുമാണ് ബിജെപി പറയുന്നത്. വീണ്ടും ശബരിമല വിഷയം തിരഞ്ഞെടുപ്പ് ആയുധമായതോടെ പ്രതിരോധിക്കാന്‍ എല്‍ഡിഎഫും ശ്രമം തുടങ്ങി. ബിജെപിക്ക് നേട്ടമുണ്ടാകുമെന്നു കരുതുന്ന മണ്ഡലങ്ങള്‍ കേന്ദ്രീകരിച്ചാണ് വരുംദിവസങ്ങളില്‍ മുഖ്യമന്ത്രി പിണറായി വിജയന്റെയും സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെയും പൊതുയോഗങ്ങള്‍. അപ്പോള്‍ ടിക്കാറാം മീണ മോദിയെ മാതൃകയാക്കണമെന്ന് പറഞ്ഞത് പൂര്‍ത്തിയാകും...