ആരാധകർക്കൊപ്പം സിനിമ കാണാൻ ലാൽ... മലയാളികളുടെ പ്രിയപ്പെട്ട 'ലാലേട്ടന്' ഇന്ന് 66-ാംപിറന്നാൾ. പിറന്നാൾ ദിനത്തിൽ തന്നെ, ആരാധകർ ഏറെ നാളായി കാത്തിരിക്കുന്ന ദൃശ്യം 3 ന്റെ റിലീസ് നടക്കുന്നുവെന്നതും ഇത്തവണത്തെ പ്രത്യേകതയാണ്. എറണാകുളം കവിതാ തിയേറ്ററിൽ ആരാധകർക്കൊപ്പം സിനിമ കാണാൻ ലാൽ എത്തിയിട്ടുണ്ട്.

മലയാളി മനസ്സിനെ ഇത്രയേറെ സ്വാധീനിച്ച മറ്റൊരു നടനുണ്ടാകില്ല. 'മഞ്ഞിൽ വിരിഞ്ഞ പൂക്കൾ' എന്ന ചിത്രത്തിലെ കുസൃതിയും ക്രൂരതയും നിറഞ്ഞ നരേന്ദ്രൻ എന്ന വില്ലനിൽ നിന്നായിരുന്നു ആരംഭം. പിന്നീട് 'രാജാവിന്റെ മകനിലെ' വിൻസെന്റ് ഗോമസ് എന്ന അധോലോക നായകനിലൂടെ മാസ്മരികമായ ഒരു നായകസങ്കൽപ്പത്തിന് അദ്ദേഹം അടിത്തറയിട്ടു. അമ്മയോടുള്ള വാത്സല്യമായി, കാമുകിയോടുള്ള പ്രണയമായി, സുഹൃത്തിനോടുള്ള വിശ്വസ്തതയായി, ശത്രുവിനോടുള്ള വീര്യമായി മോഹൻലാൽ ഇന്നും നമുക്കിടയിൽ ജീവിക്കുകയാണ്.

അഞ്ച് ദേശീയ ചലച്ചിത്ര അവാർഡുകൾ, ഒൻപത് സംസ്ഥാന പുരസ്‌കാരങ്ങൾ, ഇൻഫൻട്രി ബറ്റാലിയനിൽ 'ലെഫ്റ്റനന്റ് കേണൽ' പദവി, ഡി ലിറ്റ് ബിരുദങ്ങൾ, പദ്മ പുരസ്‌കാരങ്ങൾ, ഒടുവിൽ രാജ്യത്തെ പരമോന്നത ചലച്ചിത്ര പുരസ്‌കാരം ദാദാസാഹിബ് ഫാൽകേ അവാർഡ്. നടനകലയുടെ ആ മഹാസപര്യക്ക് അംഗീകാരങ്ങൾ തേടിയെത്തിക്കൊണ്ടേയിരിക്കുന്നു.